ASÍ skorar á félagsmálaráðherra

Fólk í fæðingarorlofi á ekki rétt á sumarleyfisdögum meðan á orlofi stendur. Þetta er niðurstaða héraðsdóms í máli sem ASÍ höfðaði gegn Tryggingastofnun. ASÍ skorar á félagsmálaráðherra að eiga frumkvæði að því að tryggja þennan rétt. Tryggingastofnun var í morgun sýknuð af kröfum ASÍ sem taldi að reikna bæri orlofsdaga í fæðingarorlofi og Fæðingarorlofssjóður skyldi standa straum af því. Ríkisstarfsmenn í aðildarfélögum ASÍ sömdu um þennnan rétt í síðustu kjarasamningum og eiga því rétt á orlofsgreiðslum frá vinnuveitanda á meðan á fæðingarorlofi stendur. Niðurstaða Héraðsdóms er rökstudd með því að engin fyrirmæli um þetta séu í lögum um fæðingar og foreldraorlof né öðrum lögum. Misræmi milli réttinda ríkisstarfsmanna og launþega á almennum vinnumarkaði breyti engu þar um. Halldór Grönvold skrifstofustjóri ASÍ segir að dómurinn sé óásættanlegur og í ósamræmi við yfirlýst markmið laganna um að jafna aðstöðu fólks á vinnumarkaði. Hann segir dóminn staðfesta það að fæðingarorlof sé styttra en lögin geri ráð fyrir. Með þessari framkvæmd sé tekið af hefðbundnum orlofrétti fólks í fæðingarorlofi. Halldór segir ekki víst að dómnum verði áfrýjað enda sé þetta kannski fremur pólitísk spurning en lögfræðileg. Hann bendir ennfremur á að fyrrverandi félagsmálaráðherra hafi haft sama skilning á málinu og ASÍ. Hann segir þetta spurningu um það hvort fólk á vinnumarkaði eigi að njóta jafnréttis eða ekki. Það sé hlutverk félagsmálaráðherra að eiga frumkvæði að breytingum.