3 og hálft ár fyrir kynferðisbrot

Karlmaður var í Hæstarétti í dag dæmdur í þriggja og hálfs árs fangelsi fyrir að nauðga fyrrverandi sambýliskonu sinni og svipta hana frelsi. Hæstiréttur staðfesti þar með dóm Héraðsdóms í málinu. Maðurinn hefur verið dæmdur 22 sinnum á síðustu 13 árum. Hann fékk meðal annars hálfs árs dóm fyrir tvær líkamsárásir gegn sambýliskonu sinni fyrrverandi, tveimur mánuðum áður en brotin voru framinn sem hann var dæmdur fyrir í dag. Hann var dæmdur fyrir að halda konunni nauðugri í íbúð hennar klukkustundum saman, beita hana ofbeldi og nauðga henni með því að hóta henni með hnífi. Þá vann hann ýmsar skemmdir á íbúð hennar og eignum. Hæstiréttur segir manninn hafa ítrekað beitt konuna ofbeldi. Hún sé að niðurlotum komin og örmagna andlega. Búast megi við, að það taki hana langan tíma að jafna sig eftir að hafa búið lengi við ógnandi aðstæður. Auk þriggja og hálfs árs fangelsis , var maðurinn dæmdur til að greiða konunni tæpar 1400 þúsund krónur í bætur. Maðurinn hefur líka verið kærður fyrir að hafa hótað konunni með ofbeldi til að undirrita yfirlýsingu um að hún drægi til baka kæruna á hendur honum. Sú kæra er enn til meðferðar.