Næsti fundur eftir viku

Samningafundi kennara við fulltrúa sveitarfélaganna, sem hófst hjá Ríkissáttasemjara klukkan níu í morgun var slitið á tólfta tímanum, án þess að árangur hafi náðst. Nýr fundur hefur ekki verið boðaður fyrr en eftir viku, segir Ásmundur Stefánsson, ríkissáttasemjari, sem ekki vill fjölyrða um ástæðuna. Hann segir deiluaðila verða að gera grein fyrir því af hverju svo langur tími líður. Eiríkur Jónsson, formaður kennarasambandsins, segir ástæðu þess að svo illa hafi gengið á fundinum vera þá að samninganefnd sveitarfélaganna hafi ekki haft neitt nýtt fram að leggja, hvorki varðandi vinnutíma né launaþáttinn. Það séu röng skilaboð út í samfélagið að funda til þess eins að láta líta út fyrir að eitthvað sé að gerast. Eiríkur segir engar tilslakanir hafa átt sér stað á fundinum, frá hvorugum aðilanum og það sé mikilvægt að heiðarleiki ríki og það verði bara að segjast eins og er að ekker sé að gerast nú. Birgir Björn Sigurjónsson, sem fer fyrir launanefnd sveitafélaganna segir sáttasemjara hafa stungið upp á því að menn hittust á mánudaginn til þess að viðra hugmyndir óformlega, en kennarar hafi alfarið hafnað því. Þeir hafi sagt sínar kröfur algerlega ófrávíkjanlegar og hafi ekki verið tilbúnir til þess að láta líta út fyrir að því væri öðruvísi fyrir komið. Því sé olnbogarými til samninga afar lítið hjá kennurum. Birgir segir útlitið ekki bjart ef kennarar séu ekki tilbúnir að slaka neitt á kröfum sínum, en vill þó engu spá um hve langt verkfallið verði, en báðir aðilar og ekki síst kennarar verði að fara yfir það í sínum herbúðum hvað megi verða til lausna.