Vatnslaust í Eyjum á næstunni?

Báðar ferskvatnsleiðslurnar ofan af landi til Vestmannaeyja rofnuðu í gær og gæti orðið vatnsskortur í Eyjum eftir nokkra daga. Grunur leikur á að grafa á dýpkunarpramma, sem verið hefur við vinnu við innsiglinguna til Eyja að undanförnu, hafi rofið leiðsluna. Síðdegis í gær kom í ljós að ekki væri allt með felldu og voru kafarar sendir niður til að kanna málið en þá þyrlaði ferskvatn upp botnlögum þannig að ekkert sást. Skrúfað hefur verið fyrir leiðslurnar uppi á landi og verða kafarar aftur sendir niður með morgninum. Fimm þúsund tonna varageymar eru í Eyjum, og ætti vatnið í þeim að duga í allt að þrjá daga, en úr því verður vatnslaust í eyjum, ef ekki hefur tekist að gera við leiðsluna fyrir þann tíma.