6 handteknir vegna LSD máls

6 manns haf verið handteknir og þar af 4 úrskurðaðir í gærluvarðhald í kjölfar þess að stór sending af ofskynjunarlyfinu LSD fannst í póstsendingu til Vestmannaeyja nýverið og reyndist vera angi af einhverju stærsta fíkniefnamáli sem upp hefur komið hér á landi til þessa. Bæði Fréttablaðið og Morgunblaðið greina frá því að málið megi rekja aftur til þess að þrjú kíló af anfetamíni og talsvert af Kókaíni fundust í vörusendingu í Dettifossi í mars, síðan enn meira magn í sama skipi í júlí og loks þrjú þúsund skammtar í póstsendingu til Vestmannaeyja fyrir tíu dögum. Hófust þá handtökur og auk þeirra fjögurra, sem eru nú í gæsluvarðhaldi, eru einn Hollendingur og einn Íslendingur í vörslu hollensku lögreglunnar vegna málsins. Við húsleit ytra fannst mikið af fíkniefnum í fórum þeirra. Verði þeir úrskurðaðir í gærluvarðhald ytra, verður óskað eftir framsali á þeim hingað til lands. Þótt endanlegt magn sé ekki gefið upp, er þegar ljóst að söluandvirði efnanna hér á landi nemur tugum milljóna króna. Ein kona er í hópi hinna handteknu.