Um 100 þúsund söfnuðust

Það var Kristinn Ásgrímsson, starfsmaður hjá Flugþjónustunni í Keflavík, sem ákvað að efna til samskota handa fjölskyldu litlu stúlkunnar sem verið hafði fyrirvinna hennar. Upphaflega var söfnunin bundin við meðlimi Fíladelfíusafnaðarins í Keflavík og fór hún fram á söngsamkomu síðastliðið fimmtudagskvöld. Kristinn sagði að þar hefðu safnast 40 þúsund, en síðan hefði komið í ljós að fleiri hefðu viljað leggja fólkinu úti í Kabúl lið. Þannig hefðu safnast 60 þúsund til viðbótar. Þess mætti geta að opnaður hefði verið reikningur í Sparisjóðnum í Keflavík: 1109 - 26 - 3477. Kristinn kvaðst þegar vera kominn í samband við Rauða krossinn til að koma peningunum til fjölskyldunnar. "Mér hefði þótt skemmtilegast að sonur minn, Ómar, sem starfar hjá friðargæslunni þarna úti, hefði getað afhent þetta," sagði Kristinn. "En hann kemur bráðlega heim, þannig að ég veit ekki hvort það tekst með þeim hætti."