Áfrýjar fimm ára fangelsisdómi

;Við höfum tekið ákvörðun um að áfrýja dómnum," segir Guðmundur B. Ólafsson, lögmaður Fanta Sillah 26 ára gamallar barnshafandi konu frá Sierra Leone, sem dæmd var í fimm ára fangelsi þann 23. júlí síðastliðinn. Fanta Sillah var tekin með um 5034 e-töflur á Keflavíkurflugvelli í sumar en töflurnar voru vandlega faldar í bakpoka sem hún bar. Guðmundur segir að krafist verði sýknu eða verulegrar lækkunar á refsingu. "Þó héraðsdómi hafi þótt frásögn hennar ótrúverðug verðum við að leggja það í mat Hæstaréttar hvort hann sé sama sinnis. Hún er einlæg í sinni frásögn og það verður lagt fyrir dóminn," segir Guðmundur. Fanta Sillah er enn á sjúkrahúsi en búið var að leggja hana inn þegar héraðsdómur kvað upp sinn dóm. Að sögn Guðmundar er heilsa Fanta ágæt en að öllum líkindum verði hún á sjúkrahúsi þar til barnið fæðist vegna erfiðleika á meðgöngu, hún þurfi að hvílast. En hún þarf trúlega að fara keisaraskurð.