Hafnarfjarðarhöfn lokað

Nú er verið að vinna að því að loka Hafnarfjarðarhöfn en þann 1. júlí síðastliðinn tóku gildi lög um siglingavernd sem stuðla m.a. að því að loka þarf hafnarsvæðum til að koma í veg fyrir að óviðkomandi aðilar eða hlutir komist að skipum. Ennfremur verður haftasvæðum hafna lokað þar sem farmur er geymdur til útflutnings. Víkurfréttir greina frá þessu. Unnið er að lokun Suðurhafnarinnar og hafnarinnar í Straumsvík í samræmi við lögin um siglingavernd. Sett er upp girðing frá norðurhorni Óseyrarbryggju yfir Fornubúðir í suðausturhorn Fornubúða 5 (SÍF-hússins), úr norðvesturhorni sama húss yfir Cuxhavengötu, þaðan vestur að Skipagötu og vestur fyrir Hvaleyrarbakka. Fjögur hlið verða á girðingunni og lýkur uppsetningu á þeim í næstu viku. Hliðin verða við Fornubúðir, Cuxhavengötu, á Suðurgarði og á Skipagötu. Þrjú síðastnefndu hliðin verða rafdrifin aksturs- og gönguhlið. Allur aðgangur um hafnarhliðið verður takmarkaður við þá eina sem eiga þangað brýnt erindi. Allir sem fá heimild til inngöngu verða að bera á sér sýnileg auðkenni og hafa sérstök spjöld í gluggum bifreiða meðan þeir eru á hafnarsvæðinu. Ennfremur verða settar upp myndavélar til eftirlits með hafnarbökkum ásamt innsiglingunni inn í höfnina og lýkur uppsetningu þeirra að mestu í þessari viku. Upptökur og stillingar verða prófaðar í næstu viku. Áætlað er að hafnarsvæðinu verði lokað 1. september en tíminn fram til mánaðamóta verður notaður til æfinga og prófana.