Mótmælendur skutu upp neyðarblysum

Tilkynning barst stjórnstöð Landhelgisgæslunnar kl. 12:24 í gær um að neyðarblys hefði sést út af Gróttu á Seltjarnarnesi. Stjórnstöðin óskaði þegar eftir því við strandarstöðvarnar að þær kölluðu út til skipa á svæðinu. Slysavarnarfélagið Landsbjörg var einnig beðið um að senda björgunarbát þangað. Rétt fyrir klukkan tvö var upplýst að mótmælahópur hjá Perlunni hefði skotið upp neyðarblysum. Eftir það var allur viðbúnaður afturkallaður. Samkvæmt reglugerð um skotelda er almenn notkun og sala á skoteldum til almennings óheimil nema á tímabilinu 28. desember til 6. janúar að báðum dögum meðtöldum. Ljóst er að eingöngu er heimilt að nota neyðarblys þegar hætta er á ferðum.