Lögregla afhendir rannsóknargögn

Hæstiréttur hefur dæmt lögreglustjórann í Reykjavík til að afhenda verjanda útlendings, sem er grunaður um að tengjast ólöglegum fólksflutningum til Vesturheims, rannsóknargögn í málinu. Maðurinn er í hópi þriggja útlendinga af arabískum uppruna sem sitja í gæsluvarðhaldi eftir að hafa verið handteknir með stolin og fölsuð vegabréf. Lögreglu grunar að þeir tengist skipulagðri alþjóðlegri glæpastarfsemi sem snýst fyrst og fremst um fólksflutninga til Kanada og Bandaríkjanna. Mennirnir hafa verið úrskurðaðir í gæsluvarðhald til 16. júní. Lögreglan neitaði verjendum mannanna um að fá rannsóknargögnin í hendur og Héraðsdómur Reykjavíkur féllst á þá ákvörðun með vísan til rannsóknarhagsmuna, brotin væru óupplýst og misræmis gætti í því sem fyrir lægi í málinu. Einn af verjendunum, Jón Einar Jakobsson lögmaður, kærði þennan úrskurð til Hæstaréttar og hafði erindi sem erfiði. Hæstiréttur bendir á þá meginreglu að verjandi skuli jafnskjótt og unnt er fá endurrit af öllum skjölum varðandi málið. Lögreglan hafi heimild vegna rannsóknarhagsmuna að draga það í viku og dómari getur - þegar svo ber undir - framlengt þann frest um þrjár vikur. Hæstiréttur telur hins vegar að skilyrðin séu ekki uppfyllt í þessu tilviki til að neita lögmanni hins grunaða um aðgang að gögnum málsins. Útlendingurinn, sem lögregu hefur ekki tekist að bera kennsl á svo að óyggjandi sé, hefur ekki verið leiddur fyrir dóm til að gefa skýrslu. Lögreglu finnst það ekki tímabært. Hæstiréttur er á öðru máli og segir að lögreglan hafi haft nægilegt ráðrúm til að fara fram á skýrslutöku fyrir dómi. Úrskurður Héraðsdóms er því felldur úr gildi og lögreglunni gert skylt að afhenda lögmanninum gögnin.