Gráu hárunum fjölgar

"Það er töluverð starfsemi hjá okkur," segir Arngrímur Jóhannsson um hið 68 ára gamla Flugmálafélag Íslands en hann var endurkjörinn forseti á þingi þess fyrir skemmstu. "Þetta er grasrótarhreyfing og við snúumst í öllu sem við kemur flugi. Félagið á aðild að alþjóðsasamtökum og nú eru aðalmálin breyttar reglur um læknisskoðanir og ábyrgða- og skírteinamál fyrir einkaflugmenn." Áhugi Arngríms á flugi og flugmálum ríður ekki við einteyming og vart hefur annað komist að í lífi hans. Sem polli varði hann dögunum við flugvelli og fylgdist með vélunum koma og fara. Þessu er öðruvísi háttað í dag. "Fjórtán ára strákur fer ekki lengur út á Reykjavíkurflugvöll til að skoða flugvélar. Öryggismálin verða sífellt stífari og stífari og áhugamönnum er haldið frá flugvöllum," segir Arngrímur heldur óhress með þróun mála því þetta bitnar óneitanlega á áhuganum. "Það er synd að gráu hárunum fjölgar á þessu áhugamannaliði, það er ekki næg endurnýjun." Auk þess að flugvellirnir eru nú rammgerðari en fyrr viðurkennir Arngrímur að sportið sé dýrt og því ekki á allra færi að stunda það. Þrátt fyrir nokkurn vilja á Flugmálafélagið ekki athygli Arngríms óskipta, enn er hann stjórnarformaður Atlanta auk þess sem hann flýgur fyrir félagið og þjálfar flugmenn þess. Arngrímur hlær þegar hann er spurður hvort sé skemmtilegra: "Það er voða lítið spenandi að sitja við skrifborð," segir hann og stekkur upp í flugvél á leið til Akureyrar. Á mánudaginn eru svo áfangastaðirnir Dubai og Kúala Lúmpúr.