„Spuni er að vera maður sjálfur“

Franskur spunasnillingur er staddur hér á landi. Í dag fengu tónleikagestir í Hallgrímskirkju að heyra hvað gerist þegar slíkur snillingur leikur kunnuglegt stef af fingrum fram. Thierry Mechler vakti snemma athygli fyrir tónlistargáfu og spunahæfileika. Á námsárum sínum í Strassbúrg og París vann hann til fjölda verðlauna og starfar nú sem prófessor í spuna við tónlistarháskólann í Köln í Þýskalandi. Hann segir spuna, eða leik af fingrum fram, nauðsynlegan fyrir tónlistarmenn til að miðla ástríðum sínum. Aðspurður hvort það sé í raun hægt að kenna fólki að leika af fingrum fram segir Mechler það vitanlega vera nokkuð erfitt því spuni sé afar persónulegur. Hann segir listina að vera maður sjálfur - og aðeins maður sjálfur - felast í spunanum og því ekki heiglum hent að miðla því til nemenda. Það sé hins vegar hægt að kenna þeim vissar aðferðir og gefa góð ráð til að finna „sinn“ spuna. Mechler leikur verk eftir Bach, Liszt og Reubke á hádegistónleikum í Hallgrímskirkju á morgun, auk þess sem hann mun spinna tónlist yfir stef frá tónleikagestum. Fréttamaður lék fréttastef Stöðvar 2 fyrir spunasnillinginn sem skilaði sér í ögn flóknari útsetningu en við eigum að venjast. Heyra má afraksturinn með því að smella á hlekkinn með fréttinni eða með því að fara inn á Veftíví síðuna.