Fæðingum fjölgar á Norðurlöndunum

Fæðingum í norrænu ríkjunum fimm hefur fjölgað talsvert á milli ára en það hefur ekki gerst í háa herrans tíð. Fyrir voru fæðingar fleiri á Norðurlöndum en í öðrum ríkjum í Evrópu og séu fæðingartölur frá árunum 2002 og 2003 bornar saman kemur í ljós að forskot norræna kvenna er að aukast. Íslenskar konur bera af í þessum efnum sem fyrr. Þetta kemur fram í Norrænum hagtölum 2004 sem út komu í gær. Ólöf Garðarsdóttir, á Hagstofu Íslands, segir margar skýringar liggja að baki. Ein er sú að þar sem fólksfjöldi á Norðurlöndum vex stöðugt fjölgar fæðingum í samræmi við það. Séu tölur um frjósemi skoðaðar, þ.e. fjöldi lifandi fæddra barna á ævi hverrar konu, má greina örlitla aukningu á öllum Norðurlöndunum, sérstaklega í Svíþjóð. Ýmsar ástæður eru fyrir því að fæðingar á Íslandi eru fleiri en víðast hvar. Viðhorf til barneigna er almennt jákvætt hérlendis og íslenska velferðarkerfið hefur gert konum kleift að eignast börn á meðan þær taka þátt í atvinnulífinu. Íslenskar konur eignast að jafnaði tvö börn á lífsleiðinni. Í fyrra fæddust 4.146 börn á landinu, samanborið við 4.056 árið áður.