Láta ekki hótanir stoppa sig

Ritsjórar DV ætla ekki að láta af umfjöllun sinni um handrukkara og aðra glæpamenn, þrátt fyrir árásir og hótanir frá þrem mönnum fyrr í dag. Ritstjórarnir segjast ekki vita hvað mönnunum hafi gengið til, en umfjöllun blaðsins um handrukkara og glæpamenn muni halda áfram hvað sem öllum hótunum líður. Yfirlýsing sem ritstjórarnir sendu frá sér í dag er svohljóðandi: „ Eins og fram hefur komið í fjölmiðlum þá hafa starfsfólki DV og fjölskyldum þeirra borist hótanir frá óþjóðalýð sem veður uppi í samfélaginu og ofsækir borgarana. DV hefur fjallað um þessa menn og fórnarlömb þeirra og mun ekki láta af þeirri umfjöllun. Í hádeginu í dag, miðvikudag, ruddust inn á ritstjórn DV þrír menn og vildu ná tali af ritstjóra DV. Réðust þeir á fréttastjóra blaðsins og hrintu niður hillum eftir að þeir voru beðnir að yfirgefa skrifstofur DV þar sem ritstjórinn væri ekki viðlátinn. Ekki er vitað hvað þessum mönnum gekk til. Allt þetta hefur verið kært til lögreglu. Skemmst er að minnast þess að ritstjóri DV óskaði á dögunum eftir nálgunarbanni á þekktan handrukkara. Það hefur ekki fengist. Allir þessir menn sem veist hafa að starfsfólki DV, hótað þeim eða fjölskyldum þeirra, ganga lausir. En eins og komið hefur fram í DV virðist lögreglan lítið geta gert varðandi þessa ofbeldisseggi sem eru enn sem fyrr frjálsir ferða sinna. Þeir hika margir hverjir ekki við að berja borgara með stálröri skuldi þeir húsaleigu, taka fjölskyldur meintra skuldara í gíslingu og ráðast á afa og ömmu, pabba og mömmu og hóta að gera jafnvel smábörnum mein. Og yfirvöld virðast eiga fá eða engin úrræði til að bregðast við ástandinu. DV mun hins vegar halda áfram umfjöllun sinni um þetta þjóðfélagsmein í blaðinu á morgun, sem og aðra daga. Meira höfum við ekki um málið að segja að svo stöddu."  Virðingarfyllst, Illugi Jökulsson og Mikael Torfason, ritstjórar DV