Karlar varist beinþynningu

Á síðasta áratug hafa komið fram vísbendingar um að beinþynning sé ekki síður fylgifiskur öldrunar hjá körlum en konum. Vegna þessa var yfirskrift Alþjóðlega beinverndardagsins í gær "Karlar og beinþynning". Beinvernd hefur, líkt og beinverndarfélög víða um heim, hafið átak til að auka vitund karla um beinþynningu. Í fréttatilkynningu frá Beinvernd segir að almennt hafi verið rætt um beinþynningu sem sjúkdóm kvenna . Þó að konur séu enn í meirihluta þeirra sem brotna af völdum beinþynningar sé margt sem bendi til þess að karlar fari hlutfallslega verr út úr beinbrotum vegna hennar og því sé fyllsta ástæða til að vekja karla til umhugsunar um þessi mál. Í tilefni dagsins bauð Beinvernd öllum körlum á Alþingi til hádegisverðarfundar í Iðnó í gær. Þar var þeim afhent nýútkomið fréttabréf Beinverndar auk bæklings um karla og beinþynningu, en þessi bæklingur er alþjóðlegur og kemur út á sama tíma víða um heim.