10 milljarða hækkun lífeyris

Lífeyrisskuldbindingar ríkisins hækka um 10 milljarða sé miðað við rúmlega 16 prósenta hækkun dagvinnulauna kennara. Hækki laun kennara um 35 prósent á samningstímanum hækka lífeyrisskuldbindingar ríkisins um allt að 20 milljarða. Pétur Blöndal lagði fram fyrirspurn til fjármálaráðherra um kjarasamninga grunnskólakennara og lífeyrisskuldbindingar. Hann spurði hversu ætla mætti að lífeyrisskuldbindingar ríkssjóðs aukist á samningstímanum miðað við 16,3% launahækkun eins og sagt hafi verið að tilboð launanefndar sveitarfélaga feli í sér. Þá spurði hann einnig hvaða afleiðingar kröfur stéttarfélaga grunnskólakennara hefðu en þær hefðu verið sagðar í fjölmiðlum ígildi launahækkunar uppá 35%. Í svari fjármálaráðuneytisins segir að heildarskuldbindinga ríkisins vegna grunnskólakennari hafi í lok síðasta árs verið 64,3 milljarðar. Sé miðað við forsendur þær sem Pétur Blöndal gefur sér, muni 16,3% hækkun á samningstímanum fela í sér hækkun á lífeyrisskuldbindingum sem nemur níu til tíu milljörðum króna. Þá muni hækkun launa um 35% með sama hætti valda 19 til 20 milljarða hækkun skuldbindingarinnar.