Mikið tjón vegna eldsvoða

Íslendingar sýna ekki nægilega aðgæslu við eldamennskuna og gleyma sér allt of oft, með skelfilegum afleiðingum. Eignatjón vegna eldsvoða af völdum rafmagns nam um þrjú hundruð milljónum króna á síðasta ári. Í ársskýrslu Löggildingarstofu fyrir árið 2003 er að finna upplýsingar um eignatjón sem hefur orðið vegna bruna og slysa af völdum rafmagns, en á árinu voru áttatíu alvarlegir brunar skráðir vegna slíkra bilana. Það er þó aðeins brot af þeim 850 rafmagnsbrunum, sem Löggildingarstofa áætlar að hafi orðið. Sex af hverjum tíu rafmagnsbrunum verða vegna eldavéla og sjónvarpa, og á síðastliðnu ári nam eignatjón af þeim sökum um tvö hundruð milljónum króna. Kjartan Rolf Árnason, hjá rafmagnsöryggisdeild Löggildingarstofu segir að fólk verði að verða meðvitaðra um að það sé varasamt að skilja eldavélina á og rafmagnstæki sömuleiðis, á sama hátt og við vitum að það sé hætulegt að aka hratt í umferðinni. Brunum vegna sjónvarpstækja fjölgaði umtalsvert á síðasta ári og samkvæmt Löggildingarstofu eru þeir að verða álíka margir og brunar vegna eldavéla, sem hafa verið algengastu brunavaldar á heimilum í mörg ár. Kjartan segir að fólk noti sjónvarpstæki sín meira en áður og þau séu jafnframt fleiri og það bjóði aukinni hættu heim.