Kalkþörungaverksmiðja að rísa

Gerð landfyllingar undir kalkþörungaverksmiðju á Bíldudal er langt komin. Stefnt er að því að verksmiðjan taki til starfa síðla næsta árs. Heimamenn segja tilkomu hennar ígildi stóriðju fyrir byggðina. Umsvifin á Bíldudal minna reyndar dálítið á stóriðjuframkvæmdir, að minnsta kosti þegar horft er til þeirra stórvirku vinnuvéla sem þar athafna sig um þessar mundir. Þar er verið að búa til nýja landfyllingu og viðlegukant fyrir kalkþörungaverksmiðju sem írskt fyrirtæki mun reisa í samvinnu við Björgun hf. Um leið og jarðefnin eru tekin úr hlíðinni fyrir ofan ysta hluta byggðarinnar er tækifærið notað til að búa til snjóflóðavarnir. Stefnt er að því að lóðin verði tilbúin í desember en í kjölfarið mun smíði verksmiðjubyggingar hefjast. Guðmundur Sævar Guðjónsson, forseti bæjarstjórnar Vesturbyggðar segir að þetta verði snyrtilegt hús eins og þeir hafi séð á Írlandi. Það sé alger bylting að hafa verksmiðjuna á þessum stað og það muni veita sveitarfélaginu miklar tekjur. Stefnt er að því að framleiðslan hefjist haustið 2005, eftir tæpt ár. Kalkþörungar eru einkum notaðir sem íblöndunarefni í skepnufóður en einnig við bjórframleiðslu og lyfjagerð. Skip munu dæla kalkþörungasetinu upp af hafsbotni og flytja það að verksmiðjunni en þar veurði efnið þurrkað, síað, malað og sekkjað. Guðmundur segir þetta stóriðju bæjarfélagsins með 12-14 störf á gólfi. Samleggðaráhrifin séu mjög mikil, því að í kringum hvert starf myndist þrjú í viðbót. Náman er sjálfur Arnarfjörðurinn. Þar er áætlað að 37 milljónir tonna af kalkþörungum séu á botni fjarðarins og efni af þessu tagi endist bæjarfélaginu í 200 ár.