Kristinn nýtur stuðnings

Framsóknarfélög í Norðvesturkjördæmi samþykkja nú hvert af öðru stuðningsyfirlýsingar við Kristinn H. Gunnarsson alþingismann um leið og fordæmd er brottvikning hans úr þingnefndum. Sú ákvörðun þingflokks Framsóknarmanna í þingbyrjun að víkja Kristni H. Gunnarssyni úr þingnefndum hefur kallað á sterk viðbrögð úr hans eigin kjördæmi. Á aðeins einni viku hafa ekki færri en fjögur Framsóknarfélög ályktað til stuðnings Kristni. Framsóknarfélag Dalasýslu kallar þetta mannréttindabrot og atlögu að almennu lýðræði. Framsóknarmenn á Hólmavík segja þingflokkinn vega að lýðræði í flokknum og skora á hann að endurskoða nefndakjörið. Framsóknarfélag Bolungarvíkur og Framsóknarfélag Barðastrandarsýslu hafa einnig ályktað á sömu lund. Sigurður Viggóson, formaður Framsóknarfélags Barðarstrandasýslu segir mjög marga styðja Kristinn og þeir séu fleiri en ætla mætti, enda séu stuðningsmenn hans margir að vinna á bak við tjöldin við að reyna að fá þingflokkinn til þess að breyta afstöðu sinni. Sigurður segir að í fjölmiðlamálinu og Íraksmálinu sé sérstaða Kristins í raun sérstaða allra þeirra framsóknarmanna sem búi í þessu kjördæmi.