Skipverjarnir sluppu ómeiddir

Þrír skipverjar á bátnum Ósk KE sluppu ómeiddir þegar eldur kviknaði í stýrishúsi bátsins út af Garðskaga í gær. Tjón hleypur á milljónum króna. Eldurinn kviknaði um borð í Ósk VE síðdegis í gær, þegar báturinn var staddur í góðu veðri um tólf sjómílur vestur af Garðskaga, en báturinn er um 25 tonn, og var sjósettur í febrúar. Viðvörunarkerfi fór í gang og skömmu síðar fylltist allt af reyk. Við óhappið drapst á vélinni og urðu öll stjórntæki óvirk, en skipverjum þremur, sem voru um borð, tókst að kæfa eldinn. Þeir náðu sambandi við nálæga báta um farsímna og tók báturinn Happadís Ósk í tog, en vél hennar bilaði áður en til lands var komið. Báturinn Keflvíkingur tók þá Happadís í tog, en björgunarbátur frá Landsbjörgu kom síðan Ósk til hafnar í Keflavík. Sævar Brynjólfsson, skipstjóri segir að þeir hafi verið sambandslausir og alltaf sé hætta þegar eldur sé annars vegar. Ekki er ljóst hvers vegna eldurinn kviknaði. Stjórntæki eru ónýt og er margt skemmt vegna elds og sóts og nemur tjónið milljónum króna. Jón Guðlaugsson, varaslökkviliðsstjóri brunavarna Suðurnesja segist telja að skipverjar hafi brugðist hárrétt við, enda hafi þeir náð að loka eldinn af, þannig að hann hafi kafnað.