Á röngum stað á röngum tíma

Ellefu ára gömul afgönsk stúlka og 23 ára gömul bandarísk kona létust í sjálfsvígssprengjuárásinni sem beint var gegn íslenska friðargæsluliðinu í Kabúl á laugardag. Afganska stúlkan hefur ekki verið nefnd með nafni í erlendum fjölmiðlum. Hún var ein af fjölmörgum börnum sem lifa á því að betla og selja notaðar bækur til útlendinga á götum Kabúl. Hún lést af sárum sínum á sjúkrahúsi snemma á sunnudagsmorgun. Bandaríska konan sem lést hét Jamei Michalsky og var frá bænum Cokato í Minnesota. Hún var fyrrverandi hermaður og starfaði sem túlkur í Uzbekistan. Hún var á ferð í Afganistan til að hitta lækni vegna meiðsla sem hún hlaut í bílslysi. Lissa Michalsky, móðir Jamei, sagði í viðtali við bandaríska fjölmiðla að sjálfsmorðsárásinni hefði verið beint að friðargæsluliðinu og að Jamie hafi átt leið þarna fram hjá fyrir tilviljun þegar árásarmaðurinn sprengdi sig í loft upp. Hún hafi verið á röngum stað á röngum tíma.