Brunum út frá sjónvarpi fjölgar

Brunum vegna sjónvarpstækja fjölgar ört og eru þeir að verða álíka margir og brunar út frá eldavélum, sem hafa verið algengasti brunavaldur á heimilum í mörg ár. Þetta kemur fram í samantekt Löggildingarstofu, sem byggð er á rannsóknum á 80 brunum í fyrra. Stofnunin áætlar að brunar út frá rafmagni hafi verið 850 í fyrra og rannsakaði hún 80 þeirra og alla þá alvarlegustu. Áætlað tjón í brunum út frá rafmagni var um 300 milljónir króna í fyrra, eða talsvert minna en undanfarin ár og mun minna en tíðkast í öðrum vestrænum ríkjum, eftir því sem Fréttastofan kemst næst. Tjón vegna íkveikju í eldavélum hefur farið ört minnkandi, sem hugsanlega má rekja til þess að fólk noti eldavélar minna en áður, meðal annars með tilkomu örbylgjuofna og smærri eldunartækja. Enn sem fyrr rekur stofnunin lang flest rafmagnsslys til mannlegra mistaka, aðgæsluleysis og rangra vinnubragða. Engin lést hér á landi í rafmagnsslysi í fyrra.