Sálfræðingar segja velferð í hættu

Fulltrúar deilenda í kennaradeilunni hafa verið boðaðir til viðræðna við ríkissáttasemjara klukkan þrjú í dag og samninganefndirnar hafa svo verið boðaðar til fundar í framhaldinu. Svartsýni er í búðum beggja. Félag sálfræðinga segir velferð barna í hættu. Samninganefnd grunnskólakennara kom saman í karphúsinu i morgun til að ráða ráðum sínum fyrir fundinn í dag. Þar er fólk ekki bjartsýnt á að fundurinn í dag skili miklu enda hafi formaður launanefndar sveitarfélagana sagt eftir fundinn í stjórnaráðinu í gær að þeir væru ekki með neitt nýtt í farteskinu. Kostirnir í stöðunni eru ekki margir. Að vísa deilunni í gerðardóm hefur verið útilokað og stjórnvöld segja lagasetningu ekki inni í myndinni. Sáttasemjari á enn það tromp í erminni að leggja fram miðlunartillögu en samningamenn kennara sögðu við fréttastofu í morgun að svo mikið bæri á milli að það yrði erfitt fyrir sáttasemjara að móta slíka tillögu. Fljótlegasta lausnin væri fyrir sveitarfélögin að setja meiri peninga í málið. Það myndi leysa deiluna. Miðlunartillaga felur í sér að farið er framhjá samninganefndunum og tillagan borin undir atkvæði félagsmanna en slikt er þó aldrei gert án samráðs við samninganefndirnar. Samtökin heimili og skóli standa fyrir mótmælum á austurvelli klukkan fjögur á morgun og hvetja þau foreldra til að taka börnin með sér; þau séu saklausir þolendur í deilunni. Á auglýsingu fyrir mótmælin skrifar Egill sem er sex ára: mig langar í skóla en hann á að baki sautján daga skólagöngu og tuttugu og sjö daga verkfall. Félag sálfræðinga við skóla lýsir í ályktun áhyggjum af þeirri stöðu barna sem skapast af langvarandi verkfalli grunnskólakennara. Áhrif þess að rjúfa skólasókn og námsástundun nemenda eru margvísleg og varhugaverð. Velferð margra þeirra gæti verið hætta búin. Sálfræðingar við skóla vilja jafnframt óska þess að mikilvægt starf kennara í þágu barna verði metið að verðleikum eftir því sem kostur er.