Risarækjueldi heppnast vel

Fyrsta risarækjan úr tilraunaeldi Orkuveitu Reykjavíkur er fullvaxin og tilbúin til átu. Orkuveitan ætlar nú að ræða við áhugasama sem eru tilbúnir að halda áfram með eldið. Stjórnarformaður Orkuveitu Reykjavíkur, Alfreð Þorsteinsson, segir að alls hafi fyrirtækið varið um fimmtán milljónum króna í verkefnið. Það sé liður í nýsköpunartilraunum Orkuveitunnar en hún hafi lögboðna skyldu til að sinna slíkum verkefnum. Og hann spyr ennfremur hver ætti að sinna slíkri nýsköpun ef Orkuveitan gerði það ekki. Alfreð segir að verkefnið felist fyrst og fremst í því að sanna að hægt sé að nota heitt vatn til að ala upp risarækjur hér á landi.  Risarækjan lifir í 28 gráðu heitu vatni en það er vatn sem oftast er ekki nýtt. Rækjan er hins vegar gríðarlega verðmæt afurð en kílóverðið er um tvö þúsund krónur. Fyrsta uppskeran var boðin fréttamönnum og matgæðingum í húsi Orkuveitunnar í dag. Úlfar Eysteinsson, veitingamaður á Þremur frökkum, var ánægður með afraksturinn og sagði engan vafa leika á því að risarækjan ætti eftir að slá í gegn. Alfreð segir ljóst að tilraunin hafi heppnast. Stjórnendur Orkuveitunnar munu í framhaldinu fara í viðræður við áhugasama um áframhald á þessu verkefni. Það verður þó ekki með þátttöku Orkuveitunnar en hún mun leggja áherslu á að ná upp í kostnað af verkefninu.