Flugbann á ákveðnum svæðum

Tvisvar til þrisvar í viku yfir vetrartímann er ákveðnum svæðum í flugumferðarsvæði landsins lokað vegna æfingaflugs Bandaríkjahers, að sögn Heimis Más Péturssonar, upplýsingafulltrúa Flugmálastjórnar. Í gærmorgun milli klukkan fimmtán mínútur gengin í tíu og hálf ellefu var til dæmis í gildi lokun yfir miðju landinu á svokölluðu LOMA svæði. Heimir segir að æfingar Bandaríkjahers fari fram á ákveðnum svæðum sem flugmenn viti af og því komi lokanirnar ekki á óvart. Annað flugumferðarvæði sem reglulega er lokað af þessum sökum er út af Faxaflóa yfir opnu hafi.