Friðargæslan var í einkaerindum

Yfirmaður íslenska friðargæsluliðsins í Kabúl var að kaupa teppi þegar sjálfsmorðsárás var gerð á friðargæsluliðana sem fylgdu honum. Friðargæsluliðar eru óánægðir með að hafa þurft að leggja sig í hættu af slíku tilefni. Utanríkisráðuneytið gerir engar athugasemdir við ferðir yfirmannsins og hefur engar upplýsingar um óánægjuna. Friðargæsluliðarnir þrír, sem særðust í árásinni, eru á heimleið eftir að hafa verið heiðraðir fyrir hugrekki og fumlaus viðbrögð þegar þeir urðu fyrir sjálfsmorðsárás talibana um síðustu helgi á fjölfarinni verslunargötu í miðborg Kabúls sem heitir Kjúklingastræti. Fréttastofan hefur fengið staðfest að Hallgrímur Sigurðsson, sem stjórnar flugvellinum í Kabúl, hafi verið í einkaerindum að velja og kaupa teppi þegar ráðist var á fylgdarlið hans, íslensku friðargæsluliðana, sem biðu úti í bíl. Utanríkisráðuneytið gerir engar athugasemdir við þessar ferðir yfirmannsins, sem höfðu þó mjög alvarlegar afleiðingar; tveir vegfarendur létust auk árásarmannsins. Arnór Sigurjónsson, skrifstofustjóri Íslensku friðargæslunnar og talsmaður utanríkisráðuneytisins í þessu sambandi, afþakkaði viðtal í dag, þrátt fyrir ítrekaða beiðni, en lætur hafa eftir sér að íslensku friðargæsluliðunum sé heimilt að fara þar um sem yfirstjórn friðargæslunnar í Kabúl hafi ekki með skýrum og ákveðnum hætti bannað ferðir um. Segir Arnór að hafa beri í huga að slíkir atburðir, eins og sjálfsmorðsárásin um helgina, geti orðið hvar sem er í Kabúl, til dæmis í umferðarteppu sem sé ekki óalgeng í borginni. Fréttastofan hefur upplýsingar um að friðargæsluliðarnir séu afar óánægðir með að þurfa að leggja sig í hættu vegna einkaerinda yfirmanna en þeir verði að fylgja þeim til að gæta öryggis. Eins og þetta dæmi sanni leggi þeir jafnframt aðra í hættu með því að vekja á sér athygli og laða til sín hryðjuverkamenn. Tilefni til slíkra ferða þurfi því að vera ærið. Samkvæmt heimildum fréttastofunnar voru íslensku friðargæsluliðarnir löngu teknir að ókyrrast þegar sprengjuárásin var gerð og höfðu gert yfirmanni sínum viðvart um að þeir hefðu dvalið of lengi á sama stað; það skapaði hættu. Utanríkisráðuneytið synjaði fréttastofunni í dag um skýrslu, sem því var sent um árásina, sem sýnir tímasetningar og önnur atvik.