Sprengdu núgildandi samninga

Áhöfnin á togaranum Sólbaki EA og útgerðarfélagið Brim hafa sprengt núgildandi samninga sjómanna og útvegsmanna með því að stofna einkahlutafélag um útgerð skipsins. Þetta er gert í trássi við vilja samtaka sjómanna en með samþykki Landssambands íslenskra útvegsmanna og Samtaka atvinnulífsins. Færri verða í áhöfn en á sambærilegum skipum og ekki verður lengur þrjátíu klukkustunda hafnarfrí við hverja löndun heldur verður haldið út strax að löndun lokinni. Á móti á svonefnd skiptiáhöfn að tryggja að hver skipverji fái sjö daga frí á hverju þrjátíu daga tímabili. Bæði áhöfnin og talsmenn Brims segjast sjá ávinning af þessu samkomulagi. Verið er að búa togarann til ísfiskveiða en ekki er ljóst hvort samtök sjómanna grípi til einhverra aðgerða.