Næstum fram af klettabelti

Minnstu munaði að stór flutningabíll með tengivagni steyptist fram af hundrað metra klettabelti á Ennishálsi í Strandasýslu í gær, þegar hann rann stjórnlaus afturábak, í fljúgandi hálku, niður bratta brekku í átt að klettabrún. Þetta gerðist í kjölfar þess að driflæsing bílsins bilaði. Á síðustu stundu fóru afturhjól tengivagnsins ofan í rás við veginn og við það snérist bíllinn þversum á veginum og stöðvaðist. Starfsmenn Vegagerðarinnar komu á vettvang með veghefil og drógu bílinn upp brekkuna. Bíllinn var keðjulaus þannig að tilviljun ein virðist hafa ráðið því að tengivagninn fór útaf ofan vegar, en ekki neðan.