Smáralind fyllt af snjó

Félagsskapurinn sem kennir sig við Brettafélag Íslands hefur undanfarið verið duglegur við að skipuleggja alls konar uppákomur. Í dag verður Smáralindin fyllt af snjó þar sem til stendur að halda svokallað jibb session þar sem færustu snjóbrettamenn landsins munu láta ljós sitt skína. Ásgeir formaður sagði Fókus frá þessarri klikkuðu hugmynd. "Þetta er eiginlega svona boðsmót eða snjóbrettasýning, maður leyfir bara færustu brettamönnunum að taka þátt í þessu þar sem þetta er ekkert á allra færi," segir Ásgeir Höskuldsson, betur þekktur sem Geiri, en hann er formaður Brettafélags Íslands. Hann heldur í dag ásamt félögum sínum í Brettafélaginu fyrsta innanhúsmótið í snjóbrettum á Íslandi og verður Vetrargarðurinn í Smáralind fylltur af snjó til þess að gera þetta að raunveruleika. Að jibba eða ekki jibba "Við munum flytja snjó, klaka og alls konar annað dót inn í Vetrargarðinn þar sem við munum vera með eitt svokallað run. Þar verða svo þrír hlutir sem hægt er að "jibba" á," segir Geiri og blaðamaður spyr hvað sögnin "að jibba" þýði. "Að jibba er sú list að hafa eitthvað fyrir framan sig, t.d. handriði, bíl, kannt eða eitthvað svoleiðis síðan renna menn sé að hlutnum og taka eitthvað trikk í loftinu eða á hlutnum. Að þessu sinni verðum við með straight tvípípu handrið, box og eitt stykki stationbíl. Það er frekar auðvelt að koma þessu í kring þar sem það þarf ekki svo mikinn sjó í þetta, bara smá adrennu og pall," segir Geiri. Í kvöld verður svo fyrsti innanhús jibbmeistari Íslands krýndur af keppendunum sjálfum. "Þeir sem taka þátt velja þann sem þykir hafa sýnt bestu taktana í lok kvöldsins -- Power to the people," útskýrir Geiri. Allir þeir bestu á svæðinu Eins og áður hefur komið fram verða allir færustu brettamenn landsins á svæðinu. Eins og er verða bara strákar sem taka þátt því þótt brettastúlkunum sé óðum að fjölga hefur enginn þeira boðið sig fram fyrir þetta mót en sem komið er. "Allir þeir bestu verða þarna og strákarnir í Team Divine sem eru í brettaskóla í Svíþjóð verða komnir til landsins til að taka þátt. Svo er ætlunin að vera með einhverja hljómsveit þarna en ef það gengur ekki eftir munum við bara blasta geisladiskana af krafti," segir Geiri sem biður aðra brettamenn vinsamlegast að láta snjóinn sem fellur frá Skautahöllinni vera í dag þar sem þeir þurfi að nota hann í Smáralindinni. "Þetta byrjar svo kl. 20 í kvöld og stendur í svona tvo tíma. Það er ókeypis inn þannig að maður hvetur bara sem flesta til að láta sjá sig því þetta verður mjög skemmtilegt."