Á þriðja tug fíkniefnamála á Hellu

Talið er að um 11 þúsund gestir hafi verið á Landsmóti hestamanna á Gaddstaðaflötum við Hellu en mótinu lýkur síðar í dag. Á þriðja tug fíkniefnamála hafa komið upp í tengslum við Landsmótið sem telst mikið fyrir fjölskyldu- og íþróttamót. Að mati lögreglumanna sem stóðu vaktina í nótt var ölvun mun minni á mótssvæðinu en var þar í fyrrinótt. Skemmtanahald hefur farið vel fram og engin stórmál komið á borð lögreglunnar. Hins vegar er fjöldinn allur af minni málum, smá pústrum og minni háttar líkamsmeiðingum þar sem gæslufólk hefur orðið að ganga á milli manna. Þá hafa komið upp nokkur mál sem tengjast eignaspjöllum. Fyrr í dag gistu tveir fangageymslur sem sögðust hafa fengið að pufukeyra í morgun glænýjan bíl frá einu bifreiðaumboðanna í Reykjavík. Þeir skruppu á bifreiðinni austur á Hellu á ofsahraða auk þess sem þeir eru grunaðir um að hafa verið undir áhrifum vímuefna. Lítilræði af fíkniefnum fannst við leit í bifreiðinni. Nýja bifreiðin er óskemmd eftir þessa hættuför. Fjölmenni var á tjaldsvæðinu að Skógum en þar er talið að um 500 manns hafi verið, svo og í Galtalækjarskógi þar sem ungmenni tóku að safnast saman þegar líða tók á helgina í tengslum við svokallaða SMS-hátíð sem ungmenni boða með SMS-skeytum sín á milli. Á þessum stöðum hefur verið talsverð ölvun en allt gengið bærilega vel fyrir sig þrátt fyrir það.