Tölur liggja fyrir upp úr 11

Sveitarstjórnarkosningar voru haldnar í nýja sveitarfélaginu á Héraði í dag. Ekki er von á fyrstu tölum fyrr en upp úr klukkan ellefu í kvöld. Kjörsókn í sveitarstjórnarkosningunum í nýja sameinaða sveitarfélaginu á Héraði fór rólega af stað, en tók þó við sér þegar líða tók á daginn. Ríflega 2100 manns eru á kjörskrá og geta þeir valið á milli fjögurra lista. Ennfremur er kosið um nafn á hinu nýja sveitarfélagi og þá eru í boði þrír möguleikar. Egilsstaðabyggð, Fljótsdalshérað og Sveitarfélagið Hérað, en einnig gefst kjósendum kostur á að koma með eigin hugmyndir að nýju nafni. Kjósendur segja stærsta verkefni þeirra sem kjörnir verða að móta hið nýja sveitarfélag, en að öðru leyti séu ekki mörg ágreiningsmál til staðar.