Þjóðleikhúsið rýmt eftir eld

Rýma þurfti Þjóðleikhúsið í gærkvöld eftir að eldur kom upp í eldhúsi Þjóðleikhúskjallarans. Um átta hundruð manns voru í húsinu þegar brunavarnarkerfið fór í gang en svo vel vildi til að hlé var á leiksýningunum Edith Piaf og Svört mjólk. Marteinn Geirsson varðstjóri hjá Slökkviliði höfuðborgarsvæðisins segir að eldurinn hafi nánast verið slokknaður þegar þeir komu á staðinn, en þeir hafi samt brugðist skjótt við og sent reykkafara inn í eldhús. Hann segir að kviknað hafi í feiti, en sem fyrr segir hafi eldurinn verið slokknaður þegar slökkvilið mætti á staðinn. Verr hefði hins vegar getað farið, enda sé húsið gríðarlega stórt, sem hefði getað valdið slökkvilið miklum vandræðum. Bið leikhúsgestanna varð hins vegar ekki löng og héldu sýningarnar áfram gestunum til mikillar ánægju án vafa. Í það minnsta verður ekki deilt um gleðina sem ríkti á tröppum Þjóðleikhússins á meðan slökkviliðið vann sín verk, en Brynhildur Guðjónsdóttir leikkona og hljómsveitin sem spilar í verkinu Edith Piaf létu þá ekki sitt eftir liggja til að skemmta leikhúsgestunum.