Krufning staðfestir voðaskot

Krufningarskýrsla vegna voðaskots sem varð Ásgeiri Jónsteinssyni að bana á Selfossi um miðjan mars hefur borist lögreglunni á Selfossi. Ólafur Helgi Kjartansson, sýslumaður á Selfossi, segir að ekki verði annað ráðið af skýrslunni en að um voðaskot hafi verið að ræða. Skýrslan hafi ekki leitt neitt nýtt í ljós. Þó má samkvæmt skýrslunni leiða að því líkur að skotið hafi hlaupið úr byssunni af stuttu færi. Það var mánudaginn 15. mars sem Ásgeir, sem var ellefu ára þegar hann lést, fannst látinn skammt frá lítilli tjörn á tjaldsvæðinu á Selfossi. Hann lést af völdum byssuskots sem hæfði hann í höfuðið.