Eldsvoði í Njarðvík

Slökkviliðsmenn voru í mikilli hættu þegar þeir börðust við eld sem kviknaði á bifreiðaverkstæði í Njarðvík í nótt þar sem mikið var geymt af flugeldum í óleyfi. Karlmaður var við störf á bifreiðaverkstæðinu við Bolafót í Njarðvík þegar eldurinn kom upp en hann sakaði ekki. Nágrannar urðu eldsins varir um hálf tvö leytið en íbúðarhús eru í 100-200 metra fjarlægð frá iðnaðarhúsinu. Að sögn Guðmundar Björgvinssonar, sem varð vitni að eldsvoðanum, skíðlogaði upp úr þakinu og gassprengingar kváðu við. "Sprengingarnar voru nokkuð öflugar og þakið virtist opnast við þær. Síðan varð mikil flugeldasýning því mikið af flugeldum virðast hafa verið geymdir þarna inni," segir Guðmundur.     Bifreiðaverkstæðið þar sem eldurinn kom upp er í þrískiptu iðnaðarhúsi. Þegar slökkvilið kom á vettvang var þegar gríðarlega mikill eldur og hafði hann borist í annan hluta húsnæðisins þar sem tjaldvagnaleiga er til húsa. Þar voru flugeldarnir voru geymdir og einnig gaskútar. Slökkviliðsmenn lögðu strax áherslu á að koma í veg fyrir að eldurinn breiddist frekar út. Jón Guðlaugsson varaslökkviliðsstjóri segir flugeldana í raun og veru hafa sprungið í andlitið á slökkviliðsmönnunnum. "Það er alltaf hætta þegar maður veit ekki af svona efnum í húsum sem lenda í bruna," segir Jón. Lögregla vinnur nú að rannsókn málsins en talið er að eldurinn hafi kviknað á svæði í kringum loftpressu. Töluvert tjón varð í eldinum en sérstaklega alvarlegum augum er litið á geymslu flugelda sem hvergi voru skráðir. Slökkviliðsmenn hefðu gert sérstakar ráðstafanir hefðu þeir vitað af þeim en til allrar lukku voru þeir ekki komnir langt inn í húsið þegar flugeldarnir sprungu.