Nick Bradford byrjar vel

Keflvíkingar unnu ÍR-inga með 19 stiga mun í seinni leik liðanna í átta-liða úrslitum Hópbílabikars karla í dag. Þar með unnu Keflvíkingar samtals með 62 stiga mun og mæta nágrönnum sínum í Njarðvík í undanúrslitum. Nick Bradford skoraði 27 á 23 mínútum í leik sem markar endurkomu hans til Keflvíkur og ljóst er að hann mun styrkja lið þeirra mikið. Hjá Keflavík skoraði Nick Bradford 27 stig, tók 11 fráköst og stal 5 boltum á sínum 23 mínútum, félagi hans Sverrir Þór Sverrisson bætti við 16 stigum, 8 stoðsendingum og 7 stolnum boltum og þá var Gunnar Stefánsson með 10 stig. Anthony Glover skoraði síðan 9 stig á 12 mínútum og Arnar Freyr Jónsson var með 8 stig og 5 stoðsendingar á sínum 16 mínútum. Hjá ÍR var Grant Davis með 28 stig og 22 fráköst á 27 mínútum en hann fékk síðan fimmtu villu sína í lok 3. leikhluta. Þá var Ómar Sævarsson með 16 stig, 10 fráköst og 6 stoðsendingar og Ólafur Jónas Sigurðsson skoraði 12 stig.