Dramatík fyrir norðan

Þór sigraði granna sína í KA 28-27 í norðurriðli 1. deildar karla í handbolta í gær fyrir framan 700 áhorfendur. Lettneski landsliðsmarkvörðurinn Mareks Skabeikis var hetja Þórs. Auk þess að verja 25 skot varði hann vítakast Halldórs Jóhanns Sigfússonar þegar fjórar sekúndur voru eftir. Aigars Lazdins skoraði níu mörk fyrir Þór og Goran Gusic átta en hjá KA var Halldór Jóhann markahæstur með tíu mörk. KA er í 3. sæti með átta stig en Þór í 5. sæti með fimm stig. Í suðurriðli bar Víkingur sigurorð af Gróttu/KR 22-19. Kristinn Björgúlfsson skoraði sex mörk fyrir Gróttu/KR en Benedikt Jónsson og Andri Berg Haraldsson fimm mörk hvor fyrir Víking. Þá varði Reynir Þór Reynisson 25 skot í marki Víkings. Valur lagði Stjörnuna 27-21. Kristján Karlsson og Sigurður Eggertsson skoruðu sex mörk hvor fyrir Val og Hlynur Jóhannesson varði á þriðja tug skota í markinu. Björn Óli Guðmundsson var markahæstur í liði Stjörnunnar með níu mörk. Í dag mætast ÍBV og Selfoss í Eyjum klukkan 14. Í 1. deild kvenna mætast Stjarnan og Valur klukkan 16.15 og Fram og Grótta/KR klukkan 16.30.