Gert er ráð fyrir 13 milljarða halla á rekstri borgarsjóðs á árinu

Gert er ráð fyrir 13,4 milljarða halla á rekstri borgarsjóðs Reykjavíkur á árinu. Þar vegur gjaldfærsla lífeyrisskuldbindinga sem nemur 14 milljörðum króna þungt. Borgarsjóður var rekinn með þriggja milljarða halla á síðasta ári en hrinda á af stað aðgerðaráætlun til að ná jafnvægi á rekstri borgarsjóðs.

Í greinargerð sem fylgir fjárhagsáætlun Reykjavíkurborgar segir að há gjaldfærsla lífeyrisskuldbindinga skýrist einkum af launahækkunum á árinu, lágri verðbólgu og óhagstæðri vaxtaþróun. Launakostnaður vegur um 55% af rekstarkostnaði A-hluta að frátöldum lífeyrisskuldbindinga og því er viðbúið að niðurstöður kjarasamninga hafi áhrif á rekstur Reykjavíkurborgar á næstu árum.

Á árinu 2014 var borgarsjóður rekinn með 2,8 milljarða halla og þar hafði aukning launakostnaðar vegna kjarasamninga ársins og endurskoðun á starfsmati mest áhrif.

Telur að vanti upp á fjárframlög frá ríkinu

Reykjavíkurborg segir að ein ástæðan fyrir vaxandi rekstrarhalla megi rekja til fjárhagssamskipta þeirra við ríkið. Sveitarfélögin telja að verulega vanti upp á fjármuni frá ríkinu til að tryggja þjónustu við fatlað fólk og þjónustu við eldri borgara á hjúkrunarheimilum.

Þá telur Reykjavíkurborg einnig að ríkið hafi rukkað sveitarfélögin um tryggingargjald umfram það sem atvinnustig í landinu kallar á.

Á næsta ári er gert ráð fyrir að fjárfest verði fyrir um 10 milljarða króna, halda á áfram uppbyggingu í Úlfarsárdal með byggingu leik- og grunnskóla ásamt menningar og íþróttahús auk þess sem fara á í framkvæmdir vegna byggingu útisundlaugar við Sundhöll Reykjavíkur.

Hrinda á af stað aðgerðaáætlun en markmið hennar er að grunnrekstur borgarinnar verði sjálfbær. Áætlunin gerir ráð fyrir að rekstrinum verði snúið við á næsta ári og muni A-hluti borgarinnar sem heldur utan um grunnreksturinn skila 567 milljón króna afgangi. Þá muni samstæðan, A- og B-hluti verða rekin með tæplega 8,1 milljarða króna afgangi.