Kona, sem var ákærð fyrir að hafa haft uppi alvarlegar og rangar sakargiftir með því að hafa með framburði fyrir lögreglu og fyrir dómi leitast við að koma því til leiðar að fjórir menn yrðu sakaðir um kynferðisbrot gegn henni, var sýknuð í Héraðsdómi Reykjavíkur á föstudaginn.

Konan var ákærð í júlí fyrir að saka þrjá menn fyrir að nauðga sér. Mennirnir neituðu allir staðfastlega sökum og sýndu fram á það með hljóðupptökum úr símum sínum.

Stúlkan hefur á hinn bóginn borið að vilji hennar hafi ekki staðið til þess að hafa kynferðismök við mennina og hafi henni verið þröngvað til kynferðismaka.

Í dómsorði segir að hún hafi verið staðföst í framburði sínum um atvik að þessu leyti í skýrslutökum hjá lögreglu og fyrir dómi og var framburður hennar trúverðugur að mati dómsins. Þá er lýsing á atvikum sem höfð er eftir henni í skýrslu um læknisskoðun á Neyðarmóttöku í fullu samræmi við skýrslur hennar hjá lögreglu og fyrir dómi.

Þá kemur fram að konan var undir áhrifum amfetamíns þegar atburðurinn átti sér stað. Hún heldur því fram að hún muni ekki eftir öllu sem gerðist vegna þessa. Það er staðfest af sérfræðingum að dómgreind bilist eftir að manneskja hefur neytt ákveðins lágmarks magns af amfetamíni. Sjálf reyndist konan vera sjöfalt yfir þeim mörkum.

Sérfræðingur bar fyrir dómi að konan hafi lýst einkennum sem væru vel þekktar afleiðingar áfallastreitu og hefðu þessi einkenni komið í kjölfar þess atburðar sem hér um ræðir. Vitnið sagði vel þekkt að þeir, sem aðhefðust eitthvað sem samræmdist ekki þeirra „karakter", reyndu að útskýra það sem gerðist, jafnvel með því að búa til nýjar minningar.

Annar sérfræðingur sagði að konan hefði sýnt einkenni sem samræmdust því að hún hefði mátt þola kynferðislegt ofbeldi. Þessi einkenni væru þekkt hjá þeim sem hefðu verið í aðstæðum þar sem þeir upplifðu sig bjargarlausa og óttaslegna. Hefði hegðun hennar verið mjög trúverðug miðað við að hún hefði upplifað eitthvað skelfilegt sem sæti í henni.

Dómurinn taldi að hljóðupptökur sem liggja frammi í málinu verði að virða í því ljósi að konan var undir miklum áhrifum amfetamíns þegar hún lét þau orð falla sem þar koma fram. Þá eru hljóðupptökur sem fundust í símum mannanna samtöl sem áttu sér stað eftir að konan hafði haft kynferðismök við mennina. Verður ekkert af upptökunum ráðið hvað átti sér stað á milli þeirra þar á undan.

Er það því mat dómsins að ekkert hafi fram komið sem hnekki staðhæfingu konunnar um að hún hafi skynjað atvik með þeim hætti sem hún lýsti. Er því ósannað að ákærða hafi haft ásetning til að bera mennina fjóra röngum sökum. Konan var því sýknuð.