Canizares framlengir við Valencia

Markvörðurinn Santiago Canizares hjá Valencia hefur framlengt samning sinn við félagið til ársins 2009 og verður því kominn nær fertugu þegar hann rennur út. Canizares hefur verið mjög sigursæll með Valencia síðan hann gekk í raðir liðsins árið 1998 en hann lék áður með Real Madrid.

Van der Vaart heldur tryggð við HSV

Fyrirliði Hamburger Sportverein, Rafael van der Vaart, reiknar með því að halda áfram að spila með þýska liðinu enda þótt það falli úr þýsku Bundesligunni. Hann er samningsbundinn félaginu til 2010.

Real Madrid hefði geta fengið Ronaldo

Fyrrum unglingaliðsþjálfari Sporting Lissabon í Portúgal segir að Real Madrid hafi á sínum tíma hafnað tækifæri til að fá Cristiano Ronaldo til liðs við sig árið 2003. Madrid hefur verið orðað við Ronaldo í vetur í kjölfar einstakrar spilamennsku hans með Manchester United.

Þórir Ólafsson fer frá Lubbecke

Þýska félagið Lubbecke hefur tilkynnt að samningur Þóris Ólafssonar verði ekki framlengdur þegar hann rennur út í sumar. Þórir hefur verið í röðum þýska liðsins síðan 2005 en var áður hjá Haukum. Hann hefur skorað 90 mörk í 39 úrvalsdeildarleikjum fyrir liðið.

Beyoncé prýðir forsíðu Sports Illustrated

Poppgyðjan Beyoncé Knowles prýðir forsíðu hins gríðarlega vinsæla sundfataheftis tímaritsins Sports Illustrated sem út kemur árlega. Í blaðinu má sjá fjölda mynda af söngkonunni fögru þar sem hún spókar sig á ströndinni.

Ég hata homma

Fyrrum NBA leikmaðurinn Tim Hardaway fór hamförum í útvarpsviðtali sem tekið var við hann í spjallþætti á útvarpsstöð í Miami í gærkvöldi þegar hann var spurður út í það þegar fyrrum leikmaðurinn John Amaechi kom út úr skápnum á dögunum.

Glasgow-liðin múta dómurum

Vladimir Romanov, meirihlutaeigandi í skoska knattspyrnufélaginu Hearts í Edinborg, hefur nú enn á ný komið sér í fréttirnar með skrautlegum yfirlýsingum sínum. Romanov segir Glasgow risana Celtic og Rangers múta dómurum.

Valente framlengir við Everton

Portúgalski landsliðsmaðurinn Nuno Valente hefur framlengt samning sinn við enska úrvalsdeildarfélagið Everton til ársins 2008. Bakvörðurinn á að baki 27 landsleiki með Portúgal en hefur verið á meiðslalista hjá Everton síðan í byrjun janúar. Hann hefur spilað 43 leiki með Everton síðan hann gekk í raðir félagsins árið 2005.

Englendingar skera niður æfingaleiki

Enska knattspyrnusambandið hefur ákveðið að skera niður æfingaleiki enska landsliðsins á næstu árum. Liðið mun því leika 18 æfingaleiki á næstu fjórum árum í stað 20. Þetta var málamiðlun milli þjálfaranna sem vildu færri leiki og knattspyrnusambandsins sem vildi fleiri leiki vegna tekjusöfnunar og sjónvarpsréttar.

Larsson: Ég fer aftur til Svíþjóðar

Sænski markahrókurinn Henrik Larsson hefur nú tekið af allan vafa um framtíð sína hjá Manchester United og segist harðákveðinn í að snúa aftur til Helsingborg þann 12. mars þegar lánssamningur hans rennur út.

Mpenza á leið til City

Enska úrvalsdeildarfélagið Manchester City er nú sagt við það að ganga frá samningi við belgíska framherjann Emil Mpenza sem leikið hefur í Katar undanfarið. Mpenza er mikill markahrókur og gerði garðinn frægan í Þýskalandi. Fréttir herma að Mpenza geri samning við City út leiktíðina með möguleika á framlengingu í sumar.

Robinho: Tottenham er ekki nógu stór klúbbur fyrir mig

Brasilíski framherjinn Robinho neitar því alfarið að hann sé á leið til Tottenham á Englandi. Orðrómur þess efnis fór af stað í morgun eftir að Robinho hafði lýst því yfir að hann væri óánægður hjá Real Madrid. "Ef ég fer frá Real verður það til að fara til annars stórs félags - og Tottenham er ekki stórt félag," sagði Robinho.

Ársmiðahafar komast á leik Milan og Celtic

Evrópska knattspyrnusambandið hefur ákvaðið að leyfa 37.000 handhöfum ársmiða hjá AC Milan að mæta á leik liðsins gegn Celtic í Meistaradeildinni þann 7. mars. Stuðningsmenn Celtic fá um 4.500 miða á leikinn. Þá hefur Inter fengið grænt ljós á að hleypa 36.000 áhofendum á viðureign sína gegn Valencia í næstu viku þar sem gestirnir fá um 1.800 miða. San Siro völlurinn tekur 85.000 manns í sæti.

Birgir Leifur á pari

Birgir Leifur Hafþórsson lék í nótt fyrsta hringinn á Indenesíumótinu á pari vallar eða 72 höggum. Birgir náði sér ekki á strik á fyrstu níu holunum, en lék síðari níu á tveimur undir pari.

Langþráður sigur hjá Boston

Þrettán leikir fóru fram í NBA deildinni í nótt og þar bar hæst að Boston Celtics náði loksins að vinna leik eftir 18 töp í röð. Liðið vann auðveldan sigur á Milwaukee 117-97 á heimavelli, en lið Milwaukee er ekki með mikið betri árangur og hefur tapað 17 af síðustu 20 leikjum sínum.

Skiptir VÍK um nafn á aðalfundi í kvöld?

Aðalfundur Vélhjólaíþróttaklúbbsins (VÍK) verður haldinn í dag, fimmtudaginn 15. febrúar í húsnæði ÍSÍ við Engjaveg kl. 20.30. Á dagskránni verða hefðbundin aðalfundarstörf s.s. skýrsla stjórnar og kosning stjórnar og nefnda. Fyrir liggur lagabreytingartillaga um að breyta nafni VÍK úr "Vélhjólaíþróttaklúbburinn" í "Vélhjólaíþróttafélagið VÍK" og munu fundarmenn kjósa um tillöguna. Fáist hún samþykkt mun nafni félagsins verða breytt í framhaldinu.

Arsenal áfram eftir ótrúlegan leik

Arsenal er komið í fimmtu umferð enska bikarsins eftir 3-1 sigur á Bolton í ótrúlegum leik í kvöld þar sem úrslitin réðust í framlengingu. Arsenal hafði virtist vera með unninn leik í höndunum eftir að Adebayor kom liðinu yfir, en Meite jafnaði fyrir Bolton í blálokin á venjulegum leiktíma.

Fín byrjun hjá Jóni Arnóri

Jón Arnór Stefánsson spilaði í kvöld sinn fyrsta leik fyrir ítalska liðið Lottomatica Roma þegar það vann góðan sigur á franska liðinu Pau Orthez í Evrópudeildinni 78-68. Jón skoraði 11 stig og stal tveimur boltum á aðeins 16 mínútum í leiknum og það er ekki amaleg byrjun hjá kappanum sem var varla búinn að taka upp úr töskunum eftir félagaskiptin frá Spáni.

Öruggur sigur Bremen

Nokkrir leikir voru á dagskrá í UEFA bikarnum í kvöld. Bremen vann sannfærandi 3-0 sigur á Ajax á heimavelli, AZ Alkmaar þurfti að sætta sig við 3-3 jafntefli við Fenerbahce í Tyrklandi eftir að hafa komist í 3-1, þar sem Grétar Rafn Steinsson spilaði 90 mínútur fyrir AZ.

Hestasýningin Apassionata 2007

Stórsýningin Apassionata var haldin í Finnlandi helgina 2 – 4 febrúar síðastliðinn í stórri sýningarhöll í Helsinki. Í heild voru þetta 4 sýningar og á þær mættu 30.000 manns eða um 7500 manns á hverja sýningu sem segir allt um áhugann á svona sýningum erlendis.

Leverkusen lagði Blackburn

Þýska liðið Bayern Leverkusen lagði enska liðið Blackburn 3-2 í fjörugum leik liðanna í 32-liða úrslitum Evrópukeppni félagsliða í kvöld. Ramelöw, Callsen-Bracker og Schneider skoruðu mörk heimamanna en þeir Bentley og Nonda skoruðu fyrir enska liðið, sem er í ágætri stöðu fyrir síðari leikinn á Englandi.

Joe Johnson í stjörnuleikinn

Bakvörðurinn Joe Johnson hjá Atlanta Hawks var í kvöld tekinn inn í Austurstrandarliðið fyrir stjörnuleikinn í NBA sem fram fer í Las Vegas á sunnudagskvöldið. Johnson kemur inn í liðið í stað Jason Kidd hjá New Jersey sem tekur ekki þátt vegna meiðsla. Johnson skorar að meðaltali 25 stig í leik og spilar sinn fyrsta stjörnuleik á ferlinum um helgina.

Gerrard: Hræðumst ekki Barcelona

Steven Gerrard, fyrirliði Liverpool, segir sína menn ekki óttast að mæta Barcelona í 16-liða úrslitum Meistaradeildarinnar í næstu viku. Hann segir reynslu leikmanna og þjálfara Liverpool koma liðinu til góða í einvíginu.

Queiroz: Ronaldo veit að United er besta félag í heimi

Carlos Queiroz, aðstoðarmaður Alex Ferguson hjá Manchester United, hefur skorað á landa sinn Cristiano Ronaldo að fara ekki frá félaginu. Hann segir Ronaldo vel geta fullkomnað glæstan feril sinn hjá enska félaginu og segir að hann geti orðið einn besti leikmaður í sögu félagsins.

Everton kaupir Tim Howard

Everton festi í dag formlega kaup á bandaríska landsliðsmanninum Tim Howard frá Manchester United og hefur hann skrifað undir fimm ára samning við Everton. Howard hefur verið í láni hjá Everton í vetur og hefur á þeim tíma stimplað sig inn sem aðalmarkvörður liðsins. Kaupverðið var ekki gefið upp.

Birgir Leifur hefur leik í kvöld

Birgir Leifur Hafþórsson á teig klukkan 23:30 að íslenskum tíma í kvöld á Opna Indónesíumótinu. Hann er kominn með bloggsíðu og var rétt í þessu að skrifa blogg dagsins og segir meðal annars frá því að verið er að búa til þátt um hann á Europeantour weekly.

Gangið í lið með mér eða látið lífið

Claudio Ranieri byrjaði ekki glæsilega í þjálfarastarfi sínu hjá ítalska liðinu Parma, því í dag var hann látinn biðjast afsökunar á harkalegum yfirlýsingum sínum á blaðamannafundinum þegar hann tók við liðinu.

Altintop segist vera á leið til Bayern

Tyrkneski miðjumaðurinn Hamit Altintop hjá Schalke segist ætla ganga í raðir meistara Bayern Munchen í sumar. Altintop hefur ekki átt fast sæti í liði Schalke í vetur, en hann hefur þegar tilkynnt að hann ætli að fara frá félaginu í sumar þegar verður með lausa samninga.

Catania fær þunga refsingu

Ítalska liðið Catana þarf að spila síðustu heimaleiki sína í ár fyrir luktum dyrum á hlutlausum velli og þá hefur félagið verið sektað um rúmlega 33 þúsund evrur. Þetta var niðurstaða ítalska knattspyrnusambandsins í dag eftir að lögreglumaður lét lífið í óeirðum fyrir utan Massimo-völlinn í byrjun mánaðarins.

Lilleström burstaði KR

Norska liðið Lilleström var ekki í vandræðum með KR á æfingamótinu í La Manga á Spáni og sigraði 5-0 eftir að hafa verið yfir 2-0 í hálfleik. Áður hafði KR tapað 1-0 fyrir Valerenga í fyrsta leik sínum á mótinu.

Bolton - Arsenal í beinni á Sýn í kvöld

Leikur Bolton og Arsenal í enska bikarnum verður sýndur beint á Sýn í kvöld og hefst útsending 19:55. Arsene Wenger segir sína menn ekki óttast neitt þó liðið hafi tapað þremur síðustu leikjum sínum á útivelli gegn Bolton.

Ítalar í toppsæti FIFA listans

Ítalska landsliðið náði í dag toppsætinu á styrkleikalista FIFA í fyrsta skipti í 13 ár. Brasilíumenn eru nú í öðru sæti eftir að hafa verið á toppnum í nær 5 ár. Íslenska landsliðið er í 95. sæti og fellur um tvö sæti síðan listinn var síðast birtur.

Ronaldinho og Eto´o féllust í faðma á æfingu

Þeir Ronaldinho og Samuel Eto´o hjá Barcelona virðast hafa grafið stríðsöxina frá því í gær en þeir félagar féllust í faðma og slógu á létta strengi á æfingu í hádeginu. Eto´o gagnrýndi félaga sinn harðlega í gær en nú virðist hann amk hafa náð sáttum við Ronaldinho.

Eiður Smári á hörðum aukaæfingum

Spænska fréttasíðan Mundo Deportivo greinir frá því í dag að Eiður Smári Guðjohnsen æfi nú manna mest hjá liði Barcelona og sást hann æfa einn í gær og í morgun. Það er því greinilegt að landsliðsfyrirliðinn ætlar að vinna sér sæti í liðinu á ný og er Frank Rijkaard mjög ánægður með einbeitingu hans.

Dirk Nowitzki fór hamförum í sigri Dallas

Þjóðverjinn Dirk Nowitzki var sannarlega betri en enginn í nótt þegar Dallas lagði Milwaukee á útivelli 99-93. Dallas var um tíma 16 stigum undir í síðari hálfleik, en vann lokaleikhlutann 28-11. Nowitzki skoraði 38 stig, hirti 11 fráköst og gaf 8 stoðsendingar fyrir Dallas en Andrew Bogut skoraði 16 stig og hirti 17 fráköst fyrir Milwaukee. Dallas er langefst í deildinni með 43 sigra og aðeins 9 töp.

Okur og Allen í stjörnuleikinn

Í nótt var tilkynnt að þeir Mehmet Okur frá Utah Jazz og Ray Allen frá Seattle yrðu varamenn fyrir þá Allen Iverson og Steve Nash í liði Vesturstrandarinnar í stjörnuleiknum í NBA um næstu helgi.

Middlesbrough marði sigur

Úrvalsdeildarliðið Middlesbrough er komið í fimmtu umferð enska bikarsins eftir sigur á Bristol City í vítaspyrnukeppni í kvöld. Staðan eftir venjulegan leiktíma var 2-2 en Yakubu hjá Boro afrekaði það að skora mark í leiknum en brenna svo af víti bæði í framlengingu og vítakeppninni.

Kiel lagði Lemgo

Kiel varð í kvöld fyrsta liðið til að tryggja sér sæti í undanúrslitum þýska bikarsins í handbolta með nokkuð öruggum útisigri á Íslendingaliði Lemgo 35-32. Kiel hafði yfir í hálfleik 17-15. Leikurinn var sýndur beint á Sýn.

New Jersey - San Antonio í beinni í kvöld

Leikur New Jersey Nets og San Antonio Spurs verður sýndur beint á NBA TV sjónvarpsstöðinni klukkan hálf eitt í nótt. New Jersey verður án leikstjórnandans Jason Kidd sem á við bakmeiðsli að stríða og gæti misst af stjörnuleiknum um helgina fyrir vikið. San Antonio þarf nauðsynlega á sigri að halda eftir að hafa aðeins unnið tvo af fyrstu sex leikjum sínum á átta leikja keppnisferðalagi.

Iverson missir af stjörnuleiknum

Allen Iverson hjá Denver Nuggets varð í kvöld nýjasta nafnið á sjúkralistanum fyrir stjörnuleikinn í NBA deildinni sem fram fer í Las Vegas á sunnudaginn. Vesturstrandarliðið er því án leikstjórnanda í augnablikinu og því þykir víst að annað hvort Deron Williams frá Utah eða Chris Paul frá New Orleans taki stöðu Iverson í hópnum.

Birgir Leifur: Besta Sushi sem ég hef smakkað

Atvinnukylfingurinn Birgir Leifur Hafþórsson er nú kominn til Indónesíu þar sem hann mun taka þátt í sínu fyrsta móti á árinu á Evrópumótaröðinni. Sjónvarpsstöðin Sýn verður með beina útsendingu frá lokadegi mótsins á sunnudagsmorguninn.

Kiel - Lemgo í beinni

Stórleikur Kiel og Lemgo í þýska bikarnum í handbolta verður sýndur beint á Sýn klukkan 19:10 í kvöld. Þar gefst áhorfendum Sýnar tækifæri til að sjá landsliðsmennina Loga Geirsson og Ásgeir Örn Hallgrímsson í eldlínunni.

Stuðningsmenn West Ham ósáttir við Curbisley

Vandamálin hrannast upp hjá Alan Curbishley knattspyrnustjóra West Ham. Leikmenn liðsins eru sagðir óánægðir með stjórnarstíl hans og rúmlega helmingur stuðningsmanna liðsins vill láta reka hann. Þá gæti West Ham misst stig í úrvalsdeildinni vegna félagaskipta Carlosar Tevez og Javiers Masherano.

Dregið í riðla á EM

Í dag var dregið í riðla fyrir Evrópumót undir 21 árs landsliða karla í knattspyrnu en úrslitakeppnin verður í Svíþjóð eftir tvö ár. Ísland var í þriðja styrkleikaflokki og lenti í sjöunda riðli með Belgíu, Slóvakíu, Austurríki og Kýpur. Riðlarnir eru tíu og sigurvegarar hvers riðils komast áfram ásamt fjóru bestu þjóðunum í öðru sæti riðlanna.

Newell sektaður fyrir karlrembu

Mike Newell, knattspyrnustjóri Luton Town, var í dag sektaður um 6,500 pund fyrir að ausa fúkyrðum yfir kvenkyns aðstoðardómara eftir leik í nóvember sl. Newell sagði að konur ættu ekki heima í fótbolta og sagði þessa ráðstöfun vera aumkunarverða tilraun til að jafna bilið milli kynjanna.