Geir mætir í Sprengisand á sunnudaginn

Geir H Haarde fyrrverandi forsætisráðherra sem á dögunum var sakfelldur í Landsdómi af einum ákærulið en sýknaður í hinum, mætir í Sprengisand Sigurjóns M Egilssonar verðlaunablaðamanns á sunnudaginn klukkan 10 á Bylgjunni. Þeir ræða um Landsdóm, dóminn, ákærurnar, dómstóla og stjórnmál, áhrif Landsdómsins á samskipti milli stjórnmálaflokka og stjórnmálamanna.

Stal nærbuxum og íþróttapesyu

Héraðsdómur Reykjavíkur hefur dæmt átján ára gamlan karlmann í fjögurra mánaða skilorðsbundið fangelsi fyrir umferðarlagabrot og þjófnað. Maðurinn stal meðal annars skóm og úlpu í Menntaskólanum í Kópavogi, heyrnartólum úr tölvuverslun og íþróttapeysu og nærbuxum úr íþróttavöruverslun. Hann keyrði einnig bifreið þrisvar sinnum undir áhrifum fíkniefna og var fyrir vikið sviptur ökurétti í sex mánuði. Hann játaði brot sín fyrir dómi.

Skjálftar á Reykjaneshrygg

Jarðskjálftahrina hefur staðið yfir undan Reykjaneshrygg í dag en á heimasíðu Veðurstofunnar má sjá á annan tug skjálfta á svæðinu. Tveir hafa mælst yfir þrjú stig og sá stærri var 3,3 stig og átti hann upptök sín 9,2 kílómetra vestur af Geirfugladrangi á Reykjaneshrygg. Flestir hafa skjálftarnir þó verið um eitt og hálft stig.

Ásgeir Þór Davíðsson jarðsunginn

Ásgeir Þór Davíðsson, eða Geiri á Goldfinger eins og hann var jafnan kallaður, var jarðsunginn frá Hallgrímskirkju í dag. Hann varð bráðkvaddur á heimili sínu 19. apríl síðastliðinn, 62 ára gamall. Ásgeir þótti með líflegri persónuleikum en hann rak umdeildan nektarstað í Kópavogi og hafði áður rekið fjölmarga skemmtistaði víða um borg. Meðal annars Hafnarkrána.

Vekja athygli á auglýsingum á þakviðgerðum

Neytendasamtökin vilja vekja athygli á auglýsingum frá Byggingarfélaginu Reisir ehf. sem auglýsa þakviðgerðir með svokallaðri Pace aðferð. Samtökin segjast hafa fengið nokkur mál inn á borð hjá sér þar sem illa hefur verið gengið frá viðgerðum á húsþökum hjá fólki.

Kaupþingsstjórar fyrir dómi

Hreiðar Már Sigurðsson, fyrrverandi forstjóri Kaupþings, og Magnús Guðmundsson, fyrrverandi forstjóri Kaupþings í Lúxemborg, eru mættir í Héraðsdóm Reykjavíkur þar sem fram fer fyrirtaka í máli sérstaks saksóknara gegn öllum helstu fyrrverandi stjórnendum Kaupþings í aðdraganda bankahrunsins og Ólafi Ólafssyni, eins aðaleigenda hins fallna banka, vegna svokallaðs al-Thani máls. Málið snýst um meinta markaðsmisnotkun og umboðssvik í aðdraganda að falls bankans.

Vitundarvakning um kynferðisofbeldi

Þrír ráðherrar, þau Ögmundur Jónasson innanríkisráðherra, Katrín Jakobsdóttir mennta- og menningarmálaráðherra og Guðbjartur Hannesson velferðarráðherra undirrituðu í dag samning til þriggja ára um vitundarvakningu um kynferðislegt ofbeldi gagnvart börnum.

Tvö dekk á einkavél sprungu við lendingu

Tvö dekk sprungu á einkavél sem var að lenda á Keflavíkurflugvelli í vikunni. Um er að ræða tveggja hreyfla skrúfuvél með sæti fyrir 76 farþega. Engir farþegar voru um borð heldur einungis tveir flugmenn.

Ella kom upp um fíkil á hlaupum

Lögreglan á Suðurnesjum hafði í nótt afskipti af karlmanni á fertugsaldri sem grunaður var um vörslu fíkniefna. Þegar maðurinn varð var við lögreglumenn tók hann á sprett eftir göngustíg, en einn lögreglumannanna hljóp hann uppi og var hann handtekinn og færður á lögreglustöð. Að sögn lögreglu var fíkniefnahundurinn Ella látin fara sömu leið og maðurinn hafði hlaupið. Þar fannst poki með neysluskammti af ætluðu kannabisi, sem maðurinn var talinn hafa hent frá sér á hlaupunum. Hann játaði brot sitt og var látinn laus að því loknu.

Lenti með rænulausan farþega

Flugvél frá flugfélaginu Swissair þurfti að lenda á Keflavíkurflugvelli í gær vegna veikinda farþega. Vélin var á leið til San Francisco í Bandaríkjunum og hafði farþeginn fengið aðsvif og var nánast rænulaus, samkvæmt upplýsingum frá lögreglunni á Suðurnesjum. Hann var fluttur með sjúkrabifreið á Heilbrigðisstofnun Suðurnesja og var vélinni að því búnu flogið áfram til áfangastaðar.

Skýrist á næstu dögum hvað gert verður við tillögur Stjórnlagaráðs

Það skýrist í dag eða á allra næstu dögum hvernig tillögur stjórnlagaráðs verða afgreiddar, segir Valgerður Bjarnadóttir, formaður stjórnskipunar- og eftirlitsnefndar Alþingis. Upphaflega stóð til að þær færu í þjóðaratkvæðagreiðslu samhliða forsetakosningum en ekki náðist samkomulag um það á Alþingi. Ný skoðanakönnun MMR sýnir mikinn vilja þjóðarinnar til þess að tillögur Stjórnlagaráðs verði að frumvarpi á Alþingi

Staðreynd að ráðist er á konur í bílastæðahúsum

Sérmerkt kvennabílastæði eru svar við þeirri staðreynd að ráðist er á konur í bílastæðahúsum. Þetta segir íslensk leikkona sem undrast neikvæða umræðu um bílastæðin.

Segja engin ný rök komin fram

Átta manna hópur sérfræðinga frá Háskóla Íslands, Landbúnaðarháskóla Íslands og Íslenskri erfðagreiningu hafa sent flutningsmönnum þingsályktunartillögu um bann við útiræktun erfðabreyttra lífvera opið bréf, þar sem spurt er hvaða upplýsingar eða rök liggja að baki því að tillagan um bannið sé endurupptekin á þinginu.

Arnarhreiður skemmt af mannavöldum

Í vikunni vaknaði grunur um að spillt hefði verið fyrir varpi hafarnarhjón í eyju á sunnanverðum Breiðafirði, því það sást ekki lengur til parsins sem vikurnar á undan hafði undirbúið varp og byggt hreiður. Málið hefur verið kært til lögreglu.

Þriðjungur ók of hratt á Borgavegi

Brot 82 ökumanna voru mynduð á Borgavegi í Reykjavík í gær. Í tilkynningu frá lögreglu segir að fylgst hafi verið með ökutækjum sem var ekið Borgaveg í vesturátt, að Strandvegi. "Á einni klukkustund, fyrir hádegi, fóru 219 ökutæki þessa akstursleið og því ók meira en þriðjungur ökumanna, eða 37%, of hratt eða yfir afskiptahraða. Meðalhraði hinna brotlegu var 64 km/klst en þarna er 50 km hámarkshraði. Tólf óku á 70 km hraða eða meira en sá sem hraðast ók mældist á 83. Vöktun lögreglunnar á Borgavegi er liður í umferðareftirliti hennar á höfuðborgarsvæðinu. Við fyrri hraðamælingar lögreglunnar á þessum stað hefur brotahlutfallið verið 24-54%,“ segir í tilkynningunni.

Mikill meirihluti vill að tillögur Stjórnlagaráðs verði að frumvarpi

Tveir þriðju hluti þjóðarinnar vill að tillögur Stjórnlagaráðs verði lagðar til grundvallar frumvarpi að nýrri stjórnarskrá. Þetta kemur fram í niðurstöðum nýrrar skoðanakönnunar MMR.

Samningaviðræður eru nær hálfnaðar

Viðræður um 15 af 33 köflum í samningum við Evrópusambandið eru hafnar. Þar af er 10 lokið. Samningsafstaða hefur verið samþykkt í 5 köflum í viðbót við það. Stefnt er að því að samningsafstaða í sjávarútvegsmálum verði tilbúin fyrir sumarfrí. Utanríkisráðherra kynnti skýrslu sína í gær.

Þrír menn teknir í Leifsstöð

Þrír menn með fölsuð vegabréf voru stöðvaðir í Flugstöð Leifs Eiríkssonar í fyrradag. Tveir karlmenn sem ferðuðust saman framvísuðu frönskum vegabréfum er lögregla hafði afskipti af þeim í flugstöðinni. Þeir komu með flugi SAS frá Ósló í Noregi. Við skoðun vegabréfanna kom í ljós að þau eru grunnfölsuð. Mennirnir kveðast báðir vera frá Alsír.

SA kynnir áætlun um afnám hafta

Samtök atvinnulífsins (SA) hafa kynnt áætlun um afnám gjaldeyrishafta sem er að mörgu leyti frábrugðin þeirri áætlun sem stjórnvöld og Seðlabankinn vinna eftir.

Samdómarar Jóns Steinars fullyrða að þeir hafi ekki rætt við blaðamann

Jón Steinar Gunnlaugsson hæstaréttardómari fullyrðir að samdómarar sínir í Hæstarétti hafi þverneitað því að hafa talað nafnlaust við Sigríði Dögg Auðunsdóttur blaðamann áður en hún skrifaði grein í nýjasta hefti Mannlífs. Í greininni fjallar Sigríður Dögg um meint ósætti og flokkadrætti í Hæstarétti, þar sem persónulegir vinir Davíðs Oddssonar skipi annan hópinn en Markús Sigurbjörnsson forseti Hæstaréttar og aðrir dómarar skipi hinn.

Óhjákvæmilegt að loka kirkjum

Agnes M. Sigurðardóttir, verðandi biskup Íslands, segir fjárhagsvanda kirkjunnar orðinn slíkan að erfitt sé að halda öllum kirkjunum gangandi og starfseminni þar innandyra.

SUS gerir tilboð í plastmál forsætisráðherra

"Í tilefni af því að í dag er nákvæmlega ár þar til alþingiskosningar þurfa í síðasta lagi að fara fram hefur Samband ungra sjálfstæðismanna (SUS) gert Sjónlistarmiðstöðinni á Akureyri tilboð í plastmál sem miðstöðin keypti nýlega og Jóhanna Sigurðardóttir, forsætisráðherra, hafði drukkið úr.“

Undir meira álagi og ósáttari við laun

Forstöðumenn ríkisstofnana upplifa meira álag og streitu í starfi nú en fyrir fimm árum. 94 prósent þeirra telja nær alltaf eða oft mikið álag í starfi sínu. Þetta kemur fram í könnun á störfum og starfsskilyrðum forstöðumanna ríkisstofnana, sem gerð var á vegum fjármálaráðuneytisins, Félags forstöðumanna ríkisstofnana og Stofnunar stjórnsýslufræða og stjórnmála við Háskóla Íslands.

Heimaey VE að komast inn á Panamaskurðinn

Fjölveiðiskipið Heimaey VE er nú um það bil að komast inn á Panamaskurðinn á heimleið sinni frá Chile, þar sem það var smíðað, og er það væntanlegt til Eyja eftir hálfan mánuð.

Of erfitt er að saksækja fyrir hatur á netinu

Breyta þarf lögum til að auðveldara sé að saksækja fyrir hatursáróður á samfélagsmiðlum og öðrum vefsíðum sem ekki teljast til hefðbundinna fjölmiðla, að mati Margrétar Steinarsdóttur, framkvæmdastjóra Mannréttindaskrifstofu Íslands.

Líkamsárás í Mjóddinni í nótt

Þrír menn réðust á einstakling við Nettó í Mjóddinni í Reykjavík um miðnæturbil og gengu í skrokk á honum.

Varðskipið Ægir bjargar norskum togara

Varðskipið Ægir kom í nótt norska togarnum Torito til hjálpar, þar sem hann lá með bilaða vél undan austurströnd Grænlands.

Geðrænn vandi ein helsta ástæða fjarvista frá vinnu

Einn af hverjum þremur sem hefur leitað til VIRK – starfsendurhæfingarsjóðs síðan haustið 2009 gefur upp geðrænan vanda sem ástæðu þess að leitað sé aðstoðar. Alls eru þetta um eitt þúsund manns. Stoðkerfisvandi er önnur meginástæða fjarvista frá vinnumarkaði; geðrænn vandi er nefndur af 34% þeirra sem leita til sjóðsins og stoðkerfisvanda nefna 39%.

Undirskriftalisti gegn frumvarpi

Stjórnmálasamtökin Dögun hófu í gær undirskriftasöfnun gegn kvótafrumvarpi ríkisstjórnarinnar. Samtökin hvetja stjórnvöld til að virða loforð í kvótamálum og hvetja forseta Íslands til þess að synja frumvarpinu annars staðfestingar.

ASÍ mótmælir launahækkun

Miðstjórn ASÍ mótmælir þeirri ákvörðun ársfundar Framtakssjóðs Íslands að hækka laun stjórnarmanna sjóðsins um 80 prósent, úr 100 þúsund krónum á mánuði í 180 þúsund krónur á mánuði.

Atvinnulausum konum fjölgar

Atvinnulausum hefur fækkað um 1.000 frá fyrsta ársfjórðungi 2011. Að meðaltali voru, á fyrsta ársfjórðungi 2012, 12.700 manns án vinnu og í atvinnuleit. Það jafngildir 7,2 prósentum vinnuaflsins. Þetta kemur fram í tölum frá Hagstofu Íslands.

Segir verslun hafa stórminnkað þegar umferð var bönnuð á Laugaveginum

"Það hefur komið í ljós að verslun dróst saman um 10 til 20 prósent hjá ýmsum umsvifamiklum verslunum í júlí miðað við árið áður en aukning varð svo í ágúst,“ segir Björn Jón Bragason, talsmaður kaupmanna við Laugaveg sem vitnar þarna til verslana sem voru á Laugaveginum þegar umferð þar var lokað í júlí á síðasta ári.

Innbrot í ljósmyndaverslun: Hryllingur að lenda í þessu

Ljósmyndaverslun á Laugavegi sem brotist var inn í nótt var einungis búin að vera opin í sex vikur. Vörum fyrir hátt í milljón var stolið.

Segir laxarökin ekki virka á alla Þjórsá

Örlög rammaáætlunar eru nú komin í hendur atvinnuveganefndar Alþingis. Formaður þingnefndarinnar, Kristján L. Möller, efast um laxarök gegn virkjunum í Þjórsá og segir að skapa verði þverpólitíska sátt ef rammaáætlun eigi að lifa af ríkisstjórnina.

Vill taka upp ríkisdal og flatan 20 prósenta skatt

Upptaka ríkisdals og flatur tuttugu prósenta skattur eru meðal stefnumála Hægri Grænna sem kynntu forystu flokksins og stefnu sína á fjölmennum fundi í dag. Formaðurinn segir að núverandi ríkisstjórn muni springa á næstu vikum.

Söng hópsöng í Osló

Katrín Jakobsdóttir mennta- og menningarmálaráðherra tók þátt í hópsöng í Osló í dag til að sýna samstöðu með fjölmenningu. Sungið var í tilefni af réttarhöldunum yfir fjöldamorðingjanum Anders Behring Breivik.

Sóley Tómasdóttir: Besti flokkurinn í mótsögn varðandi umhverfismál

Forstjóri Orkuveitu Reykjavíkur segir stofnun hlutafélags um fjármögnun Hverahlíðavirkjunar skynsamlega leið í ljósi þess að enginn peningur er til hjá Orkuveitunni fyrir framkvæmdum. Borgarfulltrúi Vinstri grænna segir þetta vera óskynsamleg einkavæðingaráform sem láta ætti af.

"Niðurskurður hefur haft áhrif á öll svið lögreglunnar"

Snorri Magnússon, formaður Landssambands lögreglumanna, var gestur í útvarpsþættinum Reykjavík síðdegis í dag. Landssambandið fundaði um helgina og ályktuðu lögreglumenn að leggja skuli niður Lögregluna í núverandi mynd.

Staðfesta morðdóm yfir Naoui

Hæstiréttur Íslands staðfesti dóm Héraðsdóms Reykjavíkur yfir Redouane Naoui, sem var dæmdur í sextán ára fangelsi í Héraðsdómi Reykjavíkur í nóvember á síðasta ári.

Helmingur vill Þóru Arnórsdóttur sem næsta forseta

Um 49% landsmanna ætla að kjósa Þóru Arnórsdóttur í komandi forsetakosningum. Ólafur Ragnar Grímsson mælist með um 35% fylgi. Ari Trausti Guðmundsson er með 11,5% fylgi á meðan aðrir eru með um eða undir 3%.

Árásin litin alvarlegum augum

Árás starfsmanns á barn skammtímavistun fyrir fötluð börn í Garðabæ í síðustu viku er litin mjög alvarlegum augum, segir Guðfinna B. Kristjánsdóttir upplýsingastjóri Garðabæjar. Barnið sem varð fyrir árásinni marðist illa á hendi, en hlaut ekki önnur meiðsl. Vísir hefur ekki upplýsingar um hver aðdragandinn að árásinni var.

Stúdentar leita að alvarlegum tilfellum af "prófljótu“

Stúdentaráð Háskóla Íslands hefur ákveðið að efna til samkeppni um hver sé með mestu "prófljótuna“ nú þegar vorprófin standa sem hæst.

Lögreglumenn vilja leggja niður lögregluna í núverandi mynd

Lögreglumenn vilja að lögreglan á Íslandi verði lögð niður í núverandi mynd. Samkvæmt upplýsingum Vísis er ástæðan langvarandi og mikill niðurskurður sem lögregluembættin hafa þurft að sæta. Lögreglumenn þinguðu um helgina. Ályktun eftir þingið er stutt en einföld.

HÍ opnar nýjan vef

Háskóli Íslands opnaði í dag endurnýjaðan vef þar sem áhersla er lögð á lifandi framsetningu efnis og stóraukin þægindi við námsleit. Með því er komið enn betur til móts við þann mikla fjölda sem kynnir sér námsleiðir og starfsemi Háskóla Íslands á hverjum degi. Vefur Háskóla Íslands er einn sá fjölsóttasti á landinu auk þess að tilheyra þeim sem miðla hvað mestu efni. Vefur Háskóla Íslands fær um 70 þúsund heimsóknir vikulega og kemur allnokkur hluti heimsókna erlendis frá.

Harpa hættir að merkja stæði sérstaklega fyrir konur

Stjórnendur í Hörpu hafa ákveðið að breyta merkingum í bílakjallara hússins eftir að mikil umræða skapaðist um þau í morgun. Smugan fjallaði um málið en í húsinu hafa verið stæði sem ertu sérstaklega merkt fyrir fatlaða en einnig fyrir konur. Harpan svaraði í dag fyrirspurn Smugunnar á þann hátt að þetta væri þekkt í Evrópu. Konur væru oft óöruggar og að þeim "líði illa í slíkum húsum og þessum stæðum því gjarnan komið fyrir nálægt inngöngum.“