Gistinóttum fjölgar um tíu prósent milli ára

Gistnóttum fjölgaði um tíu prósent í fyrra miðað við árið á undan samkvæmt nýjum tölum Hagstofunar. Þær voru alls 2,5 milljónir í fyrra og fjölgaði gistinóttunum á öllum tegundum gististaða.

Lögregla á Sauðárkróki stöðvaði 50 fyrir hraðakstur um helgina

Lögreglan á Sauðárkróki stöðvaði um 50 ökumenn um helgina fyrir of hraðan akstur við reglubundið eftirlit. Að sögn varðstjóra voru þeir sem hraðast óku á rétt um eða yfir 120 kílómetra hraða á klukkustund. Margir voru á faraldsfæti um helgina enda skólafrí framundan og páskar. Því hafi lögregla ákveðið að hafa öflugt eftirlit með aksturshraða. Varðstjóri lagði áherslu á forvarnargildi sýnilegrar löggæslu og sagði að þó menn gætu vissulega svekkt sig á því að þurfa að greiða sektir þá verði seint settur verðmiði á það ef einhver þessara ökumanna hefði lent í slysi.

Steinasafnarar sækja í Héðinsfjarðargöng

Íslenskir steinasafnarar kætast þessa dagana vegna borunar Héðinsfjarðarganga en þar hafa ýmsir fágætir steinar fundist undanfarið. Íslenskt grjót er jafnvel sagt búa yfir lækningamætti.

Ný reiðhöll í Dýrafirði

Vestfirðingar fjölmenntu á opnunarhátíð Knapaskjóls, nýrrar reiðhallar á Söndum í Dýrafirði, sem var formlega vígð í gær. Það er hestamannafélagið Stormur sem stóð fyrir byggingu hallarinnar. Nú á að bæta aðstöðu til iðkunnar hestaíþrótta á Vestfjörðum, aðstöðu til þjálfunar, keppni, reiðkennslu og annars er varðar íslenska hestinn.

Sautján sendiherrar á kjörtímabilinu

Á kjörtímabilinu sem nú er að ljúka hafa sautján nýir sendiherrar verið skipaðir í embætti á vegum utanríkisráðuneytisins og tvö ný sendiráð opnuð. Framlag úr ríkissjóði til sendiráða Íslands hefur hækkað nokkuð til samræmis við það.

Byrgismálið til ríkissaksóknara

Rannsókn á meintum misbeitingarbrotum Guðmundar Jónssonar í Byrginu er á lokastigi og verður málið sent til Ríkissaksóknara á næstu dögum. Í það minnsta átta konur lögðu inn kæru á hendur Guðmundi en málið hefur verið til rannsóknar hjá Sýslumanninum á Selfossi.

Iðnaðarráðherra hefur áhyggjur af efnahagsmálum

Jón Sigurðsson, iðnaðarráðherra, hefur áhyggjur af því að efnahagslífið í landinu líði fyrir ákvörðun Hafnfirðinga um að hafna stækkun álversins. Hann segir óheppilegt að kosningar af þessu tagi beinist gegn einu fyrirtæki og vanda verði betur til verka ef færa eigi valdið til íbúanna.

Frjálslyndir gera innflytjendamál að kosningamáli

Frjálslyndi flokkurinn, sem lagði aðaláherslu á baráttu gegn kvótakerfinu fyrir síðustu kosningar, gerir innflutning á erlendu vinnuafli til landsins að einu helsta baráttumáli sínu. Flokkurinn byrjar kosningabaráttu sína í dag á heilsíðuauglýsingu gegn erlendu vinnuafli.

Norðurál stefnir að álveri í Helguvík innan þriggja ára

Norðurál stefnir að því að hefja smíði 250 þúsund tonna álvers í Helguvík strax á þessu ári og þar á að bræða fyrsta álið innan þriggja ára. Ekkert bendir til að Suðurnesjamenn muni hafa neitt um það að segja að stóriðjuver rísi í bakgarðinum, ólíkt Hafnfirðingum.

Vinstri grænir fagna úrslitunum í Hafnarfirði

Stjórn Vinstrihreyfingarinnar - græns framboðs fagnar úrslitum í álverskosningunni í Hafnarfirði. Þetta kemur fram í ályktun stjórnarinnar sem samþykkt var í dag. Þar segir að úrslitin séu mikilvægur áfangi í baráttunni fyrir náttúru- og umhverfisvernd og gegn stóriðjustefnu stjórnvalda. Í ályktuninni segir enn fremur að það sé athyglisvert að rúmur helmingur Hafnfirðinga hafni stækkun þó að aðeins bæjarfulltrúi Vinstri grænna hafi andæft stækkunaráformum.

Mjólkursamsalan blæs á tollkvótagagnrýni

Mjólkursamsalan segir tilboð sín í tollkvóta á osti ekki til þess fallin að hleypa upp verðlagi á ostum. Þetta kemur fram í fréttatilkynningu. Í henni segir að MS hafi keypt kvóta sem nemur 19,2 tonnum af þeim 100 tonna ostkvóta sem nýlega var úthlutað og hafi tilboð MS verið undir meðalverði og töluvert undir hæsta verði.

Blátt áfram fagna lögum um fyrningarfrest

Blátt áfram fagnar samstöðu stjórnmálaflokka í málefnum um lengingu á fyrningarfresti í alvarlegum kynferðisbrotum gegn börnum. Lögin voru samþykkt 16. mars síðastliðinn. Blátt áfram safnaði 23 þúsund undirskriftum á þremur árum sem sendar voru til ráðherra og þingmanna.

Þrír teknir fyrir ölvun

Þrír ökumenn voru teknir fyrir ölvunarakstur á höfuðborgarsvæðinu í gærkvöldi og nótt. Tveir þeirra voru stöðvaðir í miðborginni. Í fyrra tilfellinu var um konu á sextugsaldri að ræða, en um þrjú leitið stöðvaði lögregla karlmann á fertugsaldri. Þriðji ökumaðurinn, karlmaður á fimmtugsaldri, var tekinn í Kópavogi undir morgun, en hann á einnig von á sekt vegna hraðaksturs.

Margar kvartanir vegna hávaða í heimahúsum

Mikið barst af kvörtunum til lögreglu á höfuðborgarsvæðinu vegna hávaða í heimahúsum. Ekki fóru öll partýin vel fram. Hins vegar var rólegra í miðborginni en oft áður og ekki mjög margir á ferli. Einn gestur skemmtistaðs nefbrotnaði. Það var eina tilfellið um slys á fólki sem lögreglu er kunnugt um, fyrir utan árás á tvo lögreglumenn sem hlutu minniháttar meiðsl í andliti.

Málflutningur frjálslyndra ekki grundvöllur fyrir samstarfi

Varaformenn Vinstri grænna og Samfylkingarinnar segja málflutning frjálslyndra í málefnum innflytjenda ekki góðan grundvöll fyrir samstarfi. Katrín Jakobsdóttir varaformaður Vinstri grænna útilokar þó ekki samstarf við flokkinn. Þetta kemur fram í svari Katrínar við opnu bréfi Sigurðar Ólafssonar alþjóðastjórnmálafræðings.

Hátíðarhöld í Reyðarfirði

Álverið í Reyðarfirði er tekið til starfa. Geir H. Haarde forsætisráðherra ásamt framsóknarráðherrunum Jóni Sigurðssyni og Valgerði Sverrisdóttur og einum starfsmanni klipptu saman á borða í kerskála Alcoa Fjarðaáls í gær og markaði sú athöfn formlegt upphaf starfseminnar. Sólveig Bergmann og Sigurður Ingólfsson eru með þessa frétt.

Hlýtt á landinu

Þrettán stiga hiti var klukkan níu í morgun á Kollaleyru í Reyðarfirði og ellefu stiga hiti á Hallormsstað, samkvæmt mælum Veðurstofunnar. Þeir sýna hlýindi um land allt á þessum fyrsta degi aprílmánaðar.

Áhersla frjálslyndra: Hömlur á innflytjendur

Frjálslyndi flokkurinn birtir heilsíðuauglýsingu í Fréttablaðinu í morgun undir yfirskriftinni: Viljum við sitja uppi með sömu vandamál og aðrar þjóðir sem hafa leyft óhindraðan innflutning erlends vinnuafls. Spurt er hver kaup og kjör íslenskra iðnaðar- og byggingaverkamanna verði þegar hægist um á vinnumarkaði.

Viðrekstur á ferð

Lögreglumenn í Reykjanesbæ veittu bifreið athygli laust eftir miðnætti í nótt. Karlmaður sem var farþegi framan í bílnum sat hálfur út um gluggann og baðaði út höndum á meðan bifreiðin var á ferð. Lögreglumenn fengu þá skýringu að farþegi í aftursæti bifreiðarinnar hefði leyst vind. Mengunin hefði verið það mikil að farþeginn í framsætinu sá sér ekki fært að vera inni í bifreiðinni á meðan.

Frítt áfengi í unglingasamkvæmi

Um klukkan 11 í gærkvöldi fékk lögreglan á höfuðborgarsvæðinu tilkynningu um að frítt áfengi væri veitt í samkvæmi fyrir 16 ára unglinga í heimahúsi á Laufásvegi. Lögreglan fór á staðinn og hitti fyrir um 100 ungmenni á aldrinum 14-18 ára. Þau sögðust hafa borgað þúsund til fimmtán hundruð króna aðgangseyri. Partýhaldarinn var 15 ára stúlka. Hún var afar ölvuð.

Tveir lögreglumenn á slysadeild

Tveir lögreglumenn fóru á slysadeild í morgun eftir að maður sló þá fyrir utan Sólon í miðborg Reykjavíkur. Lögreglan hafði verið kölluð til þar sem maðurinn lét ófriðlega fyrir utan kaffihúsið. Hann sló þá þegar þeir reyndu að tala við hann. Lögreglumennirnir hlutu minniháttar meiðsl í andliti.

Kynþáttahatur sagt vaxandi vandamál

Þörf er á að bregðast við vaxandi kynþáttahatri, að sögn framkvæmdastjóra Alþjóðahúss. Samtök kvenna af erlendum uppruna íhuga að kæra frambjóðanda Frjálslynda flokksins vegna ummæla um innflytjendur.

Stækkun álversins hafnað

Tillaga um breytt deiliskipulag vegna stækkunar álvers Alcan í Straumsvík var felld í íbúakosningu í Hafnarfirði í gær. 50,3 prósent sögðu nei en 49,7 prósent sögðu já. 88 atkvæðum munaði á fylkingunum.

Niðurstaðan mikil vonbrigði

Baldur Baldursson hjá Hag Hafnarfjarðar, sem studdi stækkun álversins í Straumsvík, sagði niðurstöðuna í kvöld mikil vonbrigði og að stuðningsmenn Hags væru mjög ósáttir.

Stór og erfið ákvörðun fyrir Hafnfirðinga

„Við erum bara mjög ánægð,“ sagði Pétur Óskarsson, talsmaður Sólar í Straumi, eftir að ljóst varð að Hafnfirðingar hefðu hafnað stækkun álversins í Straumsvík.

Sjálfsagt að skoða kröfur um endurtalningu

Lúðvík Geirsson, bæjarstjóri í Hafnarfirði, segir sjálfsagt að skoða kröfur um endurtalningu í atkvæðagreiðslunni um stækkun álversins í Straumsvík en innan við prósenti munaði á fylkingum. 50,3 prósent voru andvíg stækkuninni en 49,7 prósent voru hlynnt henni.

Farið verður að vilja bæjarbúa

Lúðvík Geirsson, bæjarstjóri í Hafnarfirði, sagði í viðtali á vef Ríkisútvarpsins að það væri ekki bæjarfulltrúa að taka afstöðu í málinu aðspurður um þær fullyrðingar um að bæjarfulltrúar hefðu átt að skýra frá afstöðu sinni.

Baráttan hafi á vissan hátt verið ósanngjörn

Rannveig Rist, forstjóri Alcan, sagði þegar nýjustu tölur voru ljósar, þar sem meirihluti Hafnfirðinga er enn á mót stækkun álversins, að hún væri ekki búin að gefa upp alla von. Eftir ætti að telja utankjörfundaratkvæði og staðan gæti því breyst.

Andstæðingar álvers enn með forystuna

Andstæðingar stækkunar álvers Alcan í Straumsvík hafa enn forystu eftir að öll atkvæði fyrir utan utankjörfundaratkvæði hafa verið talin eða 11.569. Aðrar tölur voru lesnar upp rétt í þessu. Alls eru 5860 andvíg stækkun álversins en 5638 með stækkuninni en 71 atkvæði var autt og ógilt.

Næstu tölur lesnar upp klukkan 21.30

Búist er við að næstu tölur í atkvæðagreiðslunni í Hafnarfirði um stækkun álversins í Straumsvík verði lesnar upp klukkan 21.30 en atkvæðin eru talin í Íþróttahúsinu við Strandgötu. Bein útsending verður á Vísi með viðtölum við fulltrúa andstæðra fylkinga.

Treystir sért ekki til að spá fyrir um úrslitin

Pétur Óskarsson, talsmaður Sólar í Straumi sem barðist gegn stækkun álversins í Straumsvík, sagði í fréttum Stöðvar 2 í kvöld þegar fyrstu tölur lágu fyrir að við þessar aðstæður væri hægt að fagna frábærri kjörsókn hjá Hafnfirðingum. Hann treysti sér hins vegar ekki til að spá fyrir um hvort andstæðingar álversins myndu halda forystu sinni til enda.

Féll niður af gámi um borð í skipi

Karlmaður brotnaði á nokkrum stöðum þegar hann féll niður af gámi um borð í skipinu Kársnesi í Hafnarfjarðarhöfn á sjöunda tímanum í kvöld. Að sögn vakthafandi læknis á slysadeild slasaðist maðurinn ekki alvarlega en hann virðist hafa borið hendurnar fyrir sig þegar hann lenti.

Kosningin er sigur fyrir lýðræðið

Lúðvík Geirsson, bæjarstjóri í Hafnarfirði, fagnaði því hversu góð þátttaka var í kosningunni og sagði hana sigur fyrir lýðræðið. Spurður hvort hann vildi gefa upp hvort hann hefði kosið með eða á móti álverinu sagði Lúðvík að hann hefði kosið rétt, annað vissi hann ekki.

Hefur ekki gefið upp vonina

Rannveig Rist, forstjóri Alcan, sagði á Stöð 2 eftir að fyrstu tölur í atkvæðagreiðslunni í Hafnarfirði urðu ljósar að ef þetta yrðu úrslitin yrði verksmiðjunni líklega lokað, hún myndi daga uppi eins og náttröll ef hún yrði ekki stækkuð. Hún sagðist þó ekki hafa gefið upp von enda munurinn á fylkingunum lítill.

Íhuga á breytingar á lögum um friðhelgi einkalífsins

Bogi Nilsson, ríkissaksóknari, segir menn þurfa að hugleiða það hvort ekki sé kominn tími til að endurskoða þann hluta almennra hegningarlaga sem lýtur að friðhelgi einkalífsins. Þetta segir hann í kjölfar þess að maður var sýknaður í héraðsdómi fyrir heimildarlausa myndatöku af naktri stúlku.

Flugstöð við Húsavík til sölu á spottprís

Flugstöðin á Húsavíkurflugvelli er til sölu fyrir spottprís. Heimamenn vilja verja mannvirkið og eru mjög ósáttir.

Útlit fyrir að seinkun verði á endanlegum tölum

Útlit er fyrir að úrslit í atkvæðagreiðslunni um stækkun álvers Alcan liggi ekki fyrir fyrr en á ellefta tímanum í kvöld eftir því sem greint var frá í fréttum Sjónvarpsins fyrir stundu.

Andstæðingar með nauma forystu eftir fyrstu tölur

Þeir sem vilja að álver Alcan í Straumsvík verði ekki stækkað hafa forystu samkvæmt fyrstu tölum úr atkvæðagreiðslu um stækkunina sem fram fór í Hafnarfirði í dag. Búið er að telja 5950 atkvæði af 12.752 og eru 3000 andvígir stækkun álversins en 2950 með henni.

Samkomulag um vörn gegn kynferðisglæpum gegn börnum

Samkomulag hefur náðst, innan Evrópuráðsins, um tillögu að bindandi samningi um vernd barna gegn kynferðislegu ofbeldi en fastlega er búist við að samningurinn verði fullgildur hér á landi síðar á þessu ári. Það kallar á lagabreytingar, segir forstjóri Barnaverndarstofu, meðal annars um skilgreingu á kynferðisofbeldi gegn börnum sem og heimildir lögreglu til notkunar tálbeitu.

Toghleri klemmdist milli skips og ísjaka

Minnstu munaði að illa færi þegar sjór flæddi inn í togara, þegar hann var að veiðum í hafís við Austur-Grænland í vikunni. Toghleri togarans, sem er grænlenskur og heitir Ocean Tiger, klemmdist á milli skipsins og ísjaka og rifnaði stórt gat á skutinn undan þrýstingnum.

Saka samkeppnisyfirvöld um seinlæti

Stofnendur Iceland Express saka samkeppnisyfirvöld um að hafa með seinlæti sínu gert Icelandair kleift að knésetja sig og neytt stofnendur til að selja félagið langt undir raunverði.

Segir Hafnfirðinga munu una úrslitum kosninganna

Hafnfirðingar kjósa í dag um stækkun álversins í Straumsvík. Mikil spenna ríkir enda afar tvísýnt um úrslit en kjörstöðum verður lokað eftir tæpan hálftíma. Lúðvík Geirsson, bæjarstjóri í Hafnarfirði, segir kosningaþátttökuna sýna að rétt hafi verið að ganga til kosninga um málið.

Ríflega tíu þúsund höfðu kosið klukkan 18

10.017 manns höfðu kosið í atkvæðagreiðslunni um stækkun álvers Alcan í Hafnarfirði nú klukkan 18 þegar ein klukkustund er eftir af kjörfundi. Af þeim kusu tæplega 1200 utan kjörfundar. Bein útsending er frá Hafnarfirði á Vísi og má nálgast hana uppi í hægra horni skjásins.

Fjarðaál tekið til starfa

Álverið í Reyðarfirði er tekið til starfa. Geir H. Haarde forsætisráðherra ásamt framsóknarráðherrunum Jóni Sigurðssyni og Valgerði Sverrisdóttur og einum starfsmanni klipptu saman á borða í kerskála Alcoa Fjarðaáls á fjórða tímanum í dag og markaði sú athöfn formlegt upphaf starfseminnar. Hátíðarhöld hafa staðið yfir í Reyðarfirði í dag og þau halda áfram á Fáskrúðsfirði í kvöld þar sem slegið verður upp heljarinnar dansleik. Formleg vígsluathöfn álversins verður þó síðar enda er verksmiðjan enn í smíðum.

Rétt um helmingur hefur kosið

Um klukkan fimm höfðu 8.587 bæjarbúar komið á kjörstað til að kjósa um stækkun álversins í Straumsvík. Á kjörskrá eru 16.648 manns, 1195 kusu utankjörfundar. Kjörfundur hófst klukkan tíu í morgun og verður kjörstöðum lokað klukkan sjö í kvöld. Kosið er á þremur stöðum, í Áslandsskóla, íþróttahúsinu við Strandgötu og í Víðistaðaskóla. Kjósendur geta farið á hvaða kjörstað sem þeir vilja til að kjósa þar sem notast er við rafræna kjörskrá. Fyrstu tölur verða birtar í fréttum Stöðvar 2 klukkan sjö. Einnig verður hægt að fylgjast með kosningunum á visi.is. Búist er við að talning ljúki um klukkan tíu í kvöld.