Makalausar veislur til vandræða

Jólin eru hátíð ljóss og friðar en á aðventunni hafa prestar í nógu að snúast við að hjálpa pörum sem rata í vanda. Makalaus vinnustaðapartí koma þar við sögu.

Ungir ökumenn orsaka fjölda banaslysa

Ungir ökumenn eiga stóran þátt í alvarlegustu umferðarslysunum sem orðið hafa á þessu ári. Upplýsingafulltrúi Umferðarstofu kallar eftir ábyrgð foreldra í þessum efnum. Þrjátíu manns á aldrinum fimm til áttatíu og átta ára hafa látist í 27 umferðarslysum það sem af er árinu 2006. Þetta er mesti fjöldi banaslysa síðan árið 2000 þegar 32 létust.

Óttuðust stórslys

Hluta miðbæjarins í Vestmannaeyjum var lokað í gærkvöld þegar eldur kviknaði í Fiskimjölsverksmiðju Ísfélagsins. Ediksýra í tonnavís var geymd í húsinu og óttuðust menn mjög að stórslys hlytist af.

Tvö vinnuslys á Kárahnjúkum í gær

Ekkert lát virðist vera á vinnuslysum við Kárahnjúka, en tvö slys urðu þar í gær. Vinnueftirlitið vill stöðva framkvæmdir þar til búið er að gera úrbætur í öryggismálum. Fyrra slysið í gær varð með þeim hætti að kínverskur verkamaður fékk ofan á sig steypuklump þar sem verið var að steypusprauta göng, en síðan féll maður niður úr stiga. Hvorugur er alvarlega slasaður en báðir voru fluttir á sjúkrahús.

Eldri borgarar ræða framboð

Fjölmennur fundur vegna mögulegs framboðs eldri borgara fyrir Alþingiskosningarnar á næsta ári stendur nú á Hótel Borg. Tillaga að framboði eldri borgara var samþykkt með miklum meirihluta á fundi Félags eldri borgara í Reykjavík fyrir helgi.

Cantat-3 jafnvel óvirkur í 2 til 3 vikur

Hugsanlegt er að Cantat-3 sæstrengurinn verði óvirkur í 2 til 3 vikur. Bilun er í stengnum milli Íslands og Kanada, um 1500 km vestur af Íslandi á um 3000m dýpi. Líklegt er að kalla þurfi út viðgerðarskip vegna bilunarinnar.

Flugdólgur skilinn eftir í Halifax

Íslenskur karlmaður, sem lét ófriðlega í flugvéla á vegum Heimsferða á leið frá Kúbu til Íslands í gær, var skilinn eftir ásamt konu sinni í Halifax í Kanda. Maðurinn mun hafa angrað áhöfn og farþega og barið konu sína þegar hún reyndi að róa hann.

Piparkökuhús verðlaunuð

Til að búa til verðlauna- piparkökuhús þarf að vera skipulagður og hafa auga fyrir því smáa sem gefur lífinu lit, segja sigurvegarar í piparkökuhúsasamkeppni sem Grafarvogskirkja efndi til, en verðlaunin voru afhent í morgun.

Færri kertabrunar

Fyrstu tvær vikurnar í desember hefur kertabrunum fækkað um 75% frá meðaltali síðustu ára sem telur 24 kertabruna á tímabilinu. Einungis sex kertabrunar hafa verið tilkynntir.

Fangageymslur fullar í Reykjavík

Fangageymslur lögreglunnar í Reykjavík voru fullar í morgun eftir erilsama en þó stórslysalausa nótt. Að sögn lögreglu var töluvert um ölvun í miðborginni. Lítið fór fyrir jólaskapinu nú þegar vika er til hátíðar ljóss og friðar. Erfiðlega gekk að tjónka við menn og fólk fært í fangageymslur þar sem það svaf úr sér áfengisvímu.

Hluta miðbæjarins var lokað

Hluta miðbæjarins í Vestmannaeyjum var lokað í gærkvöld þegar eldur kviknaði í Fiskimjölsverksmiðju Ísfélagsins. Ediksýra í tonnavís var geymd í húsinu og óttuðust menn mjög að stórslys hlytist af. Sex menn út eiturefnadeild Slökkviliðsins í Reykjavík voru sendir til Eyja með þyrlu Landhelgisgæslunnar og voru að fram á nótt við að koma sýrunni undan eldtungunum. Að sögn lögreglunnar í Vestmannaeyjum leikur grunur á að kveikt hafi verið í.

Fallegasti jólaglugginn

Gluggi verslunar Blue Lagoon að Laugavegi 15 í Reykjavík hlaut viðurkenningu Þróunarfélags miðborgarinnar fyrir fallegasta jólagluggann í ár. Einar Örn Stefánsson framkvæmdastjóri félagsins sagði að einfalt og stílhreint útlit jólagluggans hefði vakið athygli dómnefndarinnar.

Bilun í Cantat sæstreng

Bilun kom upp í Cantat sæstreng Símans um kl. 23:30 í gærkvöld og hefur bilunin áhrif á netsamband til útlanda þar sem bandbreid minnkar. Ekki er vitað hvað veldur sambandsleysinu en unnið er að því að komast að hvað veldur. Bilunin hefur óveruleg áhrif á talsímaumferð.

Óku á vegg

Tvær stúlkur 16 og 17 ára gamlar, voru handteknar í Grindavík í nótt grunaðar um að hafa tekið bifreið ófrjálsri hendi og ekið henni á steinhleðsluvegg við skemmtistaðinn Festi. Þær sluppu án teljandi meiðsla en bifreiðin er mikið skemmd sem og veggurinn. Stúlkurnar gistu fangageymslur lögreglu í Keflavík í nótt.

Dansað í kringum jólatré með froskalappir

Eitt sérstæðasta jólaball landsins var haldið í dag en þar var synt en ekki gengið í kringum jólatréð. Sportkafarafélag Íslands stóð fyrir þessu jólaballi í gjánni Silfru á Þingvöllum og að sjálfsögðu mættu jólasveinarnir á svæðið með froskalappir á fótum og súrefniskúta á baki.

Bjartsýnn á framtíðina þrátt fyrir lítið fylgi flokksins

Elsti stjórnmálaflokkur landsins, Framsóknarflokkurinn, fagnaði níutíu ára afmæli sínu í dag. Formaðurinn segist bjartsýnn á framtíðina en aldrei í sögu flokksins hefur fylgi hans mælst jafn lágt.

Reykjanesvirkjun formlega vígð

Reykjanesvirkjun var formlega vígð síðdegis í gær en hún markar tímamót í sögu Hitaveitu Suðurnesja, sem margfaldar rafmagnsframleiðslu sína með þessari framkvæmd. Reykjanesvirkjun kostaði yfir 13 milljarða í byggingu en nær öll raforkuframleiðslan fer til Norðuráls í Hvalfirði.

Jákvæðar viðræður um Hatton Rockall

Í gær fóru fram í Kaupmannahöfn viðræður Íslands, Bretlands, Írlands og Danmerkur, fyrir hönd Færeyja, um Hatton Rockall-málið, en öll þessi ríki gera tilkall til landgrunnsréttinda utan 200 sjómílna á svæðinu.

Fimm hafa látist það sem af er desember

Rúmlega tvítugur maður lét lífið í bílveltu á Álftanesvegi í nótt. Þrjátíu hafa látist í umferðinni það sem af er árinu, þar af fimm í desember.

Ástarbréf íslenskra kvenna á safn

Ástarbréf íslenskra kvenna til eina skipverja franska rannsóknarskipsins Pourquois-pas sem komst lífs af þegar skipið strandaði út af Reykjanesi árið 1936, verða að öllum líkindum afhent Íslendingum með vorinu. Frændi skipverjans, sem nú er látinn, er staddur hér á landi. Olivier Le Bihan er mikilsvirtur safnstjóri í Frakklandi, en hann stjórnar fagurlistasafninu í Bordeaux.

Styrkja byggingu nýs íþróttahúss á Höfn

Útgerðarfyrirtækið Skinney-Þinganess ætlar að styrkja byggingu nýs knattspyrnuhúss á Höfn í Hornafirði með að minnsta kosti 60 milljóna króna framlagi. Þetta er í tilefni að því að fyrirtækið fagnar nú 60 ára afmæli sínu.

Háhraðatengingar á sunnanverðu Snæfellsnesi

Í dag ganga þrjú sveitarfélög á Vesturlandi frá samningi við Hringiðuna um háhraðatengingar á sunnanverðu Snæfellsnesi. Sveitarfélögin eru Borgarbyggð, Eyja- og Miklaholtshreppur og Snæfellsbær.

Messa hjá rússnesku rétttrúnaðarkirkjunni

Í morgun var messa rússnesku rétttrúnaðarkirkjunnar haldin í Dómkirkjunni. Þetta er önnur messan frá stofnun deildarinnar á íslandi, en tilefnið var að fagna degi Sánkti Nikulásar.

Opið í Bláfjöllum

Opið er á skíðasvæðinu í Bláfjöllum í dag. Svæðið opnaði klukkan eitt og verður opið til klukkan fjögur. Stólalyftan Gosi í Suðurgili er í gangi og einnig kaðallyftan Patti broddgöltur við Bláfjallaskála.

Bónus gagnrýnir verðkönnun ASÍ á bókum

Bónus gagnrýnir framkvæmd verðkönnunar á bókum sem gerð var í vikunni og neituðu Alþýðusambandinu að kanna verðlag í matvöruverslunum sínum. Þetta var gert þrátt fyrir yfirlýsingar forsvarsmanna Bónuss að þeir hefðu ekkert út á matvöruverðskannanir ASÍ að setja.

Framsóknarflokkurinn fagnar afmæli í skugga lágs fylgis

Framsóknarflokkurinn fagnar níutíu ára afmæli í dag og aldrei í sögu flokksins hefur fylgi hans mælst jafn lágt. Í tilefni afmælisins munu framsóknarfélög um land allt standa fyrir hátíðardagskrá.

Rúmlega tvítugur maður lét lífið í bílveltu á Álftanesvegi

Rúmlega tvítugur maður lét lífið í bílveltu á Álftanesvegi í nótt. Slysið varð á fyrsta tímanum í nótt en maðurinn var einn í bílnum. Hann var á leið út á Álftanes þegar bíll hans fór út af við Selskarð og valt. Maðurinn var látinn þegar lögreglan kom á staðinn. Tildrög slysins eru óljós. Þrjátíu hafa látið lífið í umferðinni á árinu en alls létust nítján í umferðinni á síðasta ári.

Sek þar til sakleysi sannast

Kona í Vestamannaeyjum fékk tæplega fjögur þúsund króna stöðumælasekt, fyrir að leggja bíl sínum ólöglega í Reykjavík í síðasta mánuði. Það þykir svo sem ekki í frásögur færandi, nema vegna þess að bæði konan, og bíllinn hennar, voru í Vestmannaeyjum umræddan dag. Hún fékk þau svör hjá Bílastæðasjóði að hún yrði að borga sektina eða sanna fjarveru sína úr höfuðborginni og myndi úrskurðarnefnd þá taka ákvörðun um niðurfellingu sektarinnar.

Stjórn VG styður Álfheiði

Stjórn VG styður yfirlýsingu Álfheiðar Ingadóttur, fulltrúa flokksins í stjórn Landsvirkjunar, fyrr í dag. Álfheiður gekk af síðasta fundi núverandi stjórnar Landsvirkjunar í dag til að mótmæla því að raforkuverðið til Alcan sé ekki gefið upp. Í yfirlýsingu frá VG segir að slíkt standist ekki kröfur um opna og lýðræðislega stjórnsýslu.

Þrír myrtir í skotárás á Jamaíka

Byssumenn drápu þrjá menn og særðu tvo til viðbótar nærri nokkrum fínustu hótelum við Montego-flóa á Jamaíka í dag, sama dag og ferðamannavertíðin byrjar þar fyrir alvöru. Byssumennirnir, sem klæddir voru í einkennisbúninga lögreglu, skutu á fólk sem stóð á gangstétt úr bíl á ferð. Árásin tengjast bardögum götugengja.

Samkomulag framlengt

Rannveig Rist, forstjóri Alcan, og Friðrik Sophusson, forstjóri Landsvirkjunar, undirrituðu í dag samkomulag sem framlengir fram á mitt næsta ár viljayfirlýsingu fyrirtækjanna um gerð raforkusamnings til stækkunar álversins í Straumsvík.

Flugumferð gæti lamast við Ísland

Allt stefnir í að flug lamist hér á landi og á milli landa um áramót, en flugumferðarstjórar undirrituðu ekki samninga við Flugstoð sem tekur við íslenska flugstjórnarsvæðinu um áramótin. Útlitið er afar slæmt, segir formaður Félags íslenskra flugumferðarstjóra, en deilt hefur verið um lífeyrismál.

Athugasemd gerð við innihald vefsíðu

Verkfræðinemi, sem birti ítarlegan leiðarvísi á íslensku um sprengjugerð og kveikibúnað á háskólavefsíðu sinni, skrifaði leiðbeiningarnar ekki sjálfur heldur fann þær við heimildaöflun á vefnum. Forseti verkfræðideildar hafði samband við nemann í dag og gerði athugasemd við innihald síðunnar.

Nýtt fríblað í Austur-Skaftafellssýslu

Frá og með áramótum verður fríblaðinu Eystra-Horni dreyft frítt inn á öll heimili í Austur-Skaftafellssýslu. Þannig taka útgefendur þátt í þeirri þróun fjölmiðlamarkaðarins að prentuðum fréttamiðlum er æ meira dreyft ókeypis. Einnig er verið að svara kalli auglýsenda um aukna dreifingu blaðsins. Frá þessu er sagt á fréttavefnum horn.is.

Nýr fjárfestingarbanki stofnaður

Nýr íslenskur fjárfestingarbanki var stofnaður í dag, Askar Capital. Bankinn hefur störf um áramótin og verður með starfsstöðvar í Reykjavík, Lundúnum, Lúxemborg, Búkarest og Hong Kong. Eigið fé við stofnun er 11 milljarðar króna og starfsmenn rúmlega 40.

Nýr miðbær í Garðabæ

Nýr miðbæjarkjarni verður byggður í Garðabæ á næstu þremur til fjórum árum. Breytingarnar eru stórfelldar, hluti af Garðatorgi verður rifinn og mun verkið kosta sjö til átta milljarða. Samningurinn um breytingu á miðbæjarskipulagi Garðabæjar var undirritaður í dag á Garðatorgi. Það er fasteignaþróunarfélagið Klasi sem mun að mestu fjármagna uppbygginguna, en bærinn mun eiga og reka bílakjallara sem verður undir torginu.

Hörð gagnrýni á rektor Háskólans á Akureyri

Rektor Háskólans á Akureyri var óvænt harðlega gagnrýndur á ársfundi skólans í dag. Deilt var á að starfsmannastefnu skorti auk þess sem ófaglega hafi verið staðið að uppsögnum kennara í ár. Rektor vísar því á bug.

Prófkjörsfrestur liðinn hjá Framsókn í Suðurkjördæmi

Prófkjörsfrestur hjá Framsóknarflokkinum í Suðurkjördæmi rann út í dag klukkan 17:00. 12 gefa kost á sér, þar af koma fjórir frá Árborg en tveir frá Reykjanesbæ. Aðeins einn er frá Vestmannaeyjum. Prófkjörið fer fram þann 20. janúar á næsta ári.

Staðfest gæsluvarhald yfir síbrotamanni

Hæstiréttur staðfesti í dag gæsluvarðhaldsúrskurð héraðsdóms yfir síbrotamanni sem nýlega var dæmdur í 5 ára fangelsi. Hann mun sitja í gæsluvarðhaldi allt til mánudagsins 10. janúar, eða meðan hæstiréttur rannsakar mál hans. Hann er ákærður fyrir röð minniháttar afbrota.

Gæsluvarðhald staðfest yfir dæmdum nauðgara

Hæstiréttur Íslands staðfesti í dag gæsluvarðhaldsúrskurð yfir Edward Koranteng, karlmanni á þrítugsaldri, en maðurinn er kærður fyrir að nauðga þrettán ára stúlku í lok nóvember. Maðurinn var í vikunni dæmdur fyrir að nauðga annarri fjórtán ára stúlku á síðasta ári.

Guðni sakar Hjálmar um að ganga á bak orða sinna

Guðni Ágústsson, varaformaður Framsóknarflokksins og landbúnaðarráðherra, segir framboð Hjálmars Árnasonar í fyrsta sæti í prófkjöri Framsóknarflokksins í Suðurkjördæmi hafa komið sér algjörlega í opna skjöldu. Guðni sakar Hjálmar um að hafa gengið á bak orða sinna því fyrir um mánuði hafi hann lýst yfir stuðningi við Guðna í fyrsta sæti.

Íþróttahúsið við MS og Vogaskóla opnað aftur

Íþróttahús Menntaskólans við Sund og Vogaskóla hefur verið opnað aftur. Heilbrigðiseftirlitið stöðvaði starfsemi íþróttahússins eftir alvarlegar athugasemdir við ófullnægjandi þrif og öryggisþætti.

Minna hlutfall ráðstöfunartekna fer í mat

Hlutdeild matvæla í heimilisútgjöldunum fer stöðugt lækkandi. Á tímabilinu 2002-2004 fóru 14,4% ráðstöfunartekna heimilanna í þennan lið, en á tímabilinu sem rannsóknin nær til, fóru aðeins 12,9% til kaupa á matvörum og óáfengum drykkjarvörum. Húsnæði, hiti og rafmagn er sem fyrr lang fjárfrekasti liðurinn og sá sem hækkar mest.

Samningur um raforku tilbúinn eftir tvær vikur

Vonast er til að samningur milli Landsvirkjunar og Alcan um raforkuverð vegna hugsanlegrar stækkunar álversins í Straumsvík verði tilbúinn eftir tvær vikur. Samninganefndir fyrirtækjanna eru nú langt komnar með að ganga frá samningi.

ASÍ stendur við bókaverðkönnun sína

Alþýðusamband Íslands hefur farið yfir framkvæmd sína á verðkönnun á bókum sem Bónus gagnrýndi harðlega í gær. Niðurstaða ASÍ er sú, að eðlilega hafi verið staðið að framkvæmdinni og Alþýðusambandið stendur við könnunina.