Átján mánaða fangelsi fyrir kynferðisbrot

Héraðsdómur Austurlands dæmdi í dag karlmann í 18 mánaða fangelsi fyrir kynferðisbrot, með því að hafa haft samræði við konu sem þannig var ástatt um að hún gat ekki spornað við verknaðinum sökum ölvunar og svefndrunga. Að auki var maðurinn dæmdur til að greiða konunni skaðabætur að fjárhæð 833.207 krónur.

Lögðu hald á 400 grömm af maríjúana

Umtalsvert magn fíkniefna fannst við leit í verslunarhúsnæði í austurborginni í gærkvöld en talið er að þetta séu um 400 grömm af maríjúana. Á sama stað fundust rúmlega 500 dósir af ólöglegu munn- og neftóbaki.

Umdeildar virkjanir í Brasilíu

Brasilíska ríkisstjórnin hefur gefur vilyrði fyrir byggingu tveggja vatnsfallsvirkjana í Madeira fljótinu í Brasilíu. Fljótið er stærsta þverá Amason fljótsins. Virkjunaráformin eru harðlega gagnrýnd vegna mögulegra umhverfisáhrifa við fljótið.

Gagnrýna afskipti sveitarfélaga af sölu Hitaveitu Suðurnesja

Samband ungra sjálfstæðismanna gagnrýnir harðlega afskipti einstakra sveitarfélaga af sölu á eignarhluta ríkisins í Hitaveitu Suðurnesja. Með afskiptum sínum eru sveitarfélögin að beita sér gegn markmiði ríkisstjórnarinnar á einkavæðingu orkufyrirtækja að mati sambandsins. Þetta kemur fram í yfirlýsingu frá sambandinu. Þeir furða sig ennfremur á yfirlýsingu ungliðahreyfingar Samfylkingarinnar.

20 manns verða líflátnir á næstu vikum í Íran

Tuttugu manns verða hengdir í Íran fyrir ýmsa glæpi á næstunni. Eftir herferð í landinu í sumar gegn siðferðisglæpum, hefur lögreglan handtekið tugi fíkniefnaneytenda, smyglara og aðra glæpamenn. „Þeir tuttugu sem verða hengdir voru handteknir fyrir nauðganir, hjúskaparbrot og fleira." Þetta segir talsmaður dómarastéttar í landinu.

Þungt áfall fyrir Vesturland

Ákvörðun stjórnvalda um 30 prósent kvótasamdrátt í þorski er þungt áfall fyrir Vesturland og ekki ríkir einhugur meðal íbúa um nauðsyn þess að grípa til svo harkalegra aðgerða. Þetta kemur fram í yfirlýsingu frá Samtökum sveitarfélaga á Vesturlandi. Talið er að efnhagsleg áhrif skerðingarinnar nemi um 5 milljörðum króna á ári.

Aðrar verslunarkeðjur hækka einnig verð á mat- og drykkjarvörum

Verð á matar- og drykkjarvörum hefur hækkaði í fimm verslunarkeðjum frá því lækkanir á virðisaukaskatti og vörugjöldum tóku gildi í byrjun marsmánaðar. Þetta kemur fram í niðurstöðu verðkönnunar verðlagseftirlits Alþýðusambands Íslands. Mest hækkaði verð í verslunum Hagkaupa á tímabilinu eða um 0,8 prósent. Alþýðusambandið segir niðurstöðuna valda vonbrigðum.

Ólíklegt að ökumaður jeppans í Glasgow lifi af

Samkvæmt læknum sem annast manninn sem keyrði jeppa inn í flugstöðina í Glasgow, þykir ólíklegt að hann haldi lífi. „Maðurinn hlaut 3. stigs bruna á búk og útlimum og ólíklegt er að við náum að bjarga honum," sagði einn læknanna.

Leiðrétting

Ranglega var haft eftir Atla Gíslasyni alþingismanni í frétt á Vísir.is föstudaginn 6. júlí s.l. um ákvörðun sjávarútvegsráðherra niðurskurð á þorskaflaheimildum. Ranghermt var að Atli teldi að enginn vísindalegur grunnur lægi að baki ákvörðuninni. Hið rétta er að Atli sagði að "engin vissa" væri fyrir því að kvótaákvörðunin myndi efla fiskistofna eða atvinnulíf landsbyggðarinnar. Beðist er velvirðingar á þessu.

Lést í umferðarslysi á sunnudaginn

Pilturinn sem lést í umferðarslysi við mynni Norðurárdals um síðustu helgi hét Þorbergur Gíslason til heimilis að Hveramýri 2, Mosfellsbæ.

Bæta þjónustu við blinda og sjónskerta

Menntamálaráðuneytið hefur ákveðið að setja á laggirnar sex nýjar kennslu- og þjónustustöður til að bæta úr brýnum skorti á þjónustu við blinda og sjónskerta. Tillaga þessa efnis var samþykkt á ríkisstjórnarfundi í morgun. Nú starfa einungis tveir starfsmenn á sviði blindrakennslu og þjónusta þeir um 1.500 manns. Fjórir verða sendir út í nám til að afla sér sérhæfingar.

Málverkum að verðmæti milljóna dala stolið í Moskvu

Þjófar í Moskvu stálu 13 málverkum, sem metin eru á margar milljónir dala. Rússneskur ellilífeyrisþegi hafði geymt verkin í óvarinni, tómri íbúð sem að hann á. Kamo Manukyan, fyrrverandi dómari, átti verkin. Þau eru eftir fræga listamenn á borð við Georges-Pierre Seurat, Ivan Aivazovsky og Alexej Jawlenski.

Biðjast afsökunar á rafmagnsleysi

Alcoa Fjarðarál hefur sent út afsökunarbeiðni vegna rafmagnsleysis sem varð á Austurlandi í gær vegna prófana á tæknibúnaði fyrirtækisins. Samkvæmt yfirlýsingunni vinna sérfræðingar fyrirtækisins nú í samvinnu við Landsnet að koma í veg fyrir að þetta geti endurtekið sig. Rafmagn fór af álverinu og af stórum hluta Austurlands í um tvo klukkutíma síðdegis í gær.

Klerkurinn drepinn í áhlaupinu á Rauðu moskuna

Yfirvöld í Islamabad í Pakistan segjast nú hafa drepið klerkinn Abdul Rashid Ghazi í áhlaupinu á Rauðu moskuna sem hófst á miðnætti. Hann er æðsti trúarleiðtogi þeirra vígamanna sem neituðu að gefast upp. Hann hafði lokað sig inni í einu af herbergjunum í kjallara nálægs bænaskóla. Þar var líka fjöldi kvenna og barna sem vígamennirnir notuðu sem mannlega skildi.

Vill að Seðlabankinn lækki stýrivexti

Seðlabankinn verður að lækka stýrivexti og hætta stuðningi sínum við alltof hátt gengi krónunnar að mati framkvæmdastjóra Samtaka atvinnulífsins. Hann segir vaxtastefnu bankans hafa lítil áhrif á þróun verðbólgunnar og vinni gegn því að krónan virki eðlilega sem sjálfstæður gjaldmiðill. Mikilvægasta mótvægisaðgerðin fyrir sjávarútveginn og landsbyggðina er lægra gengi krónunnar að hans mati.

Heill loðfílsungi fannst í Síberíu

Leifar af ungviði loðfíls sem fundust í sífreri í Síberíu á dögunum eru líklega þær heilustu sem fundist hafa af þessari útdauðu skepnu. Talið er að leifarnar séu um 10,000 ára gamlar.

2 látnir og 4 slasaðir eftir flugslys í Flórída

Lítil Cessna 310 flugvél hrapaði á tvö heimili í Sanford, Flórída í morgun. Samkvæmt Cleo Cohen, talsmanni lögreglunnar, eru að minnsta kosti tveir látnir og fjórir alvarlega slasaðir og voru þeir fluttir með tveimur þyrlum á nærliggjandi sjúkrahús. Einnig er einn slökkviliðsmaður til aðhlynningar vegna brjóstverkja.

Vegagerðinni gert að greiða 900 þúsund krónur í skaðabætur

Vegagerðinni var í Héraðsdómi Reykjavíkur í dag gert að greiða Veiðifélagi Skagafjarðar tæpar 900 þúsund krónur í skaðabætur vegna umhverfisraskana völdum vegaframkvæmda. Um var ræða umhverfisáhrif vegna lagningu hringvegar í Norðurárdal. Að auki var Vegagerðinni gert að greiða um 270 þúsund krónur í málskostnað.

Íbúafjöldasprengja yfirvofandi í Kaliforníu

Íbúafjöldasprengja í Kaliforníu er yfirvofandi samkvæmt spá fjármálastofnunar ríkisins sem birtist á heimasíðu L.A. Times í dag. Á næstu 50 árum mun fólksfjöldinn aukast um 75%, sem þýðir fólksfjöldinn í ríkinu mun nálgast 60 milljóna markið.

Náttúruverndarsinnar mótmæla í Kringlunni

Lögreglan á höfuðborgarsvæðinu fylgdi fyrir skömmu út hópi mótmælenda sem voru búnir að koma sér fyrir í Kringlunni í Reykjavík. Mótmælendurnir, sem eru af ýmsum þjóðernum,tengjast samtökunum Saving Iceland sem staðið hefur fyrir mótmælaaðgerðum við Kárahnjúkavirkjun á Austurlandi. Hollenskur talsmaður samtakanna undrast aðgerðir lögreglu og segir um friðsöm mótmæli að ræða.

Ný hraðleið í Leifsstöð

Farþegar á Saga Class hjá Icelandair geta nú notið þess að komast hraðar í gegnum öryggiseftirlit í Leifsstöð en áður. Sérstök braut hefur verið gerð fyrir þá sem ferðast á Saga Class, og mun hún auka bæði þægindi og hraða. Fordæmi fyrir þessa þjónustu þekkist víða, t.d. má nefna Kaupmannahöfn, heathrow og Frankfurt.

Jarðboranir fá risabor

Í dag er skipað upp í Hafnarfirði lang stærsta jarðbor, sem notaður hefur verið hér á landi til þessa. Þyngstu einstöku stykkin vega um 90 tonn, eða sem jafngildir um 60 litlum fólksbílum. Hann getur borað dýpra en gert hefur verið til þessa og nýtist því við tilraunir við svonefndar djúpboranir.

Bandaríkin senda þriðja flugmóðurskipið til Persaflóa

Bandaríkin hafa sent þriðja flugmóðurskipið, Enterprise, til Persaflóans, á svæði nálægt írönsku hafsvæði. Sjóherinn sagði frá þessu í tilkynningu í morgun. „Enterprise er mótvægi við þær truflandi aðgerðir sem sum lönd á svæðinu standa fyrir. Einnig styður það við bakið á hermönnum okkar í Írak og Afganistan.“ sagði í tilkynningunni.

Vegaframkvæmdum upp á 6,6 milljarða króna flýtt

Ríkisstjórnin tilkynnti í morgun að hún ætlar að flýta framkvæmdum í vegagerð upp á 6,6 milljarða króna á næstu fjórum árum. Þetta er gert til að mótvægis við skerðingu á aflamarki á næsta fiskveiðiári.

60 handteknir í aðgerðum gegn mafíunni

Lögreglan á suðurhluta Ítalíu handtók í dag fleiri en 60 manns í aðgerðum gegn mafíunni á svæðinu en hún kallast 'Ndrangheta. Meðlimir hennar eru grunaðir um smygl á eiturlyfjum, fólki og tryggingasvindl. 'Ndrangheta er staðsett í Kalabríu, rétt suður af Napólí, og er orðin stærri en Cosa Nostra mafían sem hefur aðsetur á Sikiley.

Dómsmálaráðherra vill að Valgerður skýri ummæli sín

Dómsmálaráðherra vill að Valgerður Sverrisdóttir, fyrrverandi ráðherra og varaformaður Framsóknarflokksins, skýri ummæli sín um Baugsmálið betur. Valgerður sagði í blaðaviðtali að hún hefði upplifað hvernig sjálfstæðismenn töluðu um Baugsmenn og rannsaka þyrfti upphaf og tilurð málsins.

Skattalækkanir skila sér ekki til neytenda

Lækkanir á virðisaukaskatti hafa ekki skilað sér til neytenda samkvæmt nýrri verðkönnun Alþýðusambands Íslands. Á tímabilinu mars til maí hefur verð þvert á móti farið hækkandi og þá mest um 4,6 prósent í verslunum Krónunnar. Aðeins í Nettó lækkar verð lítillega eða um 0,2 prósent. Upphaflega var gert ráð fyrir að lækkun virðisaukaskatts myndi skila sér í að minnsta kosti 7,4 prósenta verðlækkun til neytenda. Niðurstaðan er vonbrigði að mati Alþýðusambandins.

Bæjarráð Bolungarvíkur virðir ákvörðun sjávarútvegsráðherra

Bæjarráð Bolungarvíkur hittist á fundi í dag þar sem rætt var um skerðingu veiðiheimilda. Á fundinum kom fram að bæjarráðið virði ákvörðun sjávarútvegsráðherra, þar sem hún er byggð á niðurstöðum sérfræðinga um nýtingu fiskistofnanna. Bæjarráðiðið telur þó að tekjutap vegna skerðingarinnar muni nema nokkrum hundruðum milljóna króna.

Einn staður blaktir í laxveiðinni í Borgarfirði

Straumarnir í Hvítá skera sig úr örðum laxveiðisvæðum í Borgarfirði vegna ónenju mikillar veiði, á sama tíma og laxveiði í Borgarfirði er almennt í sögulegu lágmarki. Þar veiddust fjórtán laxar í tveggja daga veiðiholli, sem lauk í gær, en aðeins er veitt á tvær stangir í Straumunum. Það sem af er veiðitímanum hafa veiðst 80 laxar þar, en veiðin er að jafnaði best þegar líður á júlí, þannig að met er í augsýn. Að sögn veiðimanna er mikið af laxi í Hvítá sjálfri, en hann gengur ekki upp í þverárnar vegna vatnsleysis.

Þúsundir fluttar á brott vegna goshættu

Þúsundir Indónesa hafa þurft að flýja heimili sín vegna goshættu í eldfjallinu Mount Gamkonora. Fjallið spýr þegar út ösku og eldi allt upp í fjögur þúsund metra hæð. Smellið á „Spila“ hnappinn til þess að sjá myndir þaðan.

Benedikt búinn að synda 14 kílómetra

Sundmaðurinn Benedikt Hjartarson var búinn að synda 14 kílómetra yfir Ermasundið um klukkan hálf ellefu í morgun. Benedikt lagði af stað um klukkan hálf sex frá Dover í Englandi en áætlað er að hann komi til Calais í Frakklandi í nótt ef vel gengur.

11 látast í sprengjuárás í Afganistan

Sjálfsmorðssprengjumaður gerði í dag árás á hersveitir NATO í suðurhluta Afganistan og varð 11 almennum borgurum að bana. Þó nokkur börn voru á meðal þeirra látnu. Talið er að allt að 30 manns hafi særst í árásinni. Talsmaður NATO í Kabúl sagði að sjö hermenn hefðu særst í henni.

TM og Knattspyrnufélag Siglufjarðar undirrita samstarfssamning

Tryggingamiðstöðin og og Knattspyrnufélag Siglufjarðar hafa undirritað þriggja ára samstarfssamning, og samkvæmt honum mun Tryggingamiðstöðin verða aðalstyrktaraðili Pæjumóts Siglufjarðar. Mótið mun nú heita Pæjumót TM Siglufirði.

Bretar bregðast ókvæða við neitun á framsali

Rússar neituðu því formlega í morgun að framselja Andrei Lugovoy, fyrrum njósnara, og manninn sem er grunaður um að hafa myrt Alexander Litvinenko. Bretar brugðust ókvæða viða og segja svar Rússa við framsalsbeiðninni „óásættanlegt.“ Bretar hafa ávallt haldið því fram að litið sé á morðið á Litvinenko sem mikilvægt mál.

Enn varað við skemmdum á Þingvallavegi

Enn eru miklar skemmdir á klæðningu á 1,5 kílómetra kafla á Þingvallavegi við Grafningsvegamót. Vegagerðin biður ökumenn að fara varlega og sérstaklega bifhjólamenn. Hefur ökuhraði verið takmarkaður við fimmtíu kílómetra.

Afli dróst saman um 346 þúsund tonn á síðasta ári

Afli íslenskra skipa dróst saman um 346 þúsund tonn á síðasta ári miðað við fyrra ár samkvæmt nýútkomnu riti Hagstofunnar um aflaverðmæti og ráðstöfun afla. Á sama tíma jókst aflaverðmæti um 12,1 prósent milli ára. Mest var landað á Austurlandi.

Þrír umsækjendur eru um Sauðárkróksprestakall

Þrír umsækjendur eru um Sauðárkróksprestakall sem auglýst var laust til umsóknar nýlega. Umsóknarfrestur rann út 5. júlí og embættið verður veitt frá 1. ágúst. Kirkjumálaráðherra veitir það að fenginni umsögn valnefndar. Í valnefnd sitja níu fulltrúar prestakallsins auk prófasts og vígslubiskupsins á Hólum.

Lögregluhundur finnur fíkniefni

Tveir karlar og kona voru færð á lögreglustöð á sunnudagsmorgun en í fórum þeirra fundust lyf sem þau gátu ekki gert grein fyrir. Það var sérþjálfaður lögregluhundur frá lögreglunni sem fann fíkniefnin. Fólkið, sem er um tvítugt og var í annarlegu ástandi, var stöðvað við hefðbundið eftirlit en fíkniefnin voru vel falin í bíl þeirra.

Snjór í fyrsta sinn í 90 ár í Buenos Aires

Það eru nærri nítíu ár síðan síðast snjóaði í Bueons Aires, höfuðborg Argentínu, en í gær var komin hvít dula yfir borgina og svæðið í kring. Óvenjukalt er þar miðað við árstíma. Veðurstofa Argentínu sagði þetta í fyrsta sinn síðan 22. júní árið 1918 sem snjó festi. Smellið á „Spila“ hnappinn til þess að sjá myndir þaðan.

Eldur í Smárabíó

Slökkviliðið var kallað að Smárabíó í Kópavogi á tólfta tímanum í kvöld vegna elds í einum sýningarsalnum. Húsið var rýmt. Greiðlega gekk að slökkva eldinn og búið er að opna húsið að nýju. Samkvæmt lögreglu kviknaði í út frá spennubreyti.

Stjórnarslit í Póllandi

Miklar líkur eru á að kosningar verði í Póllandi innan skamms. Sjálfsvarnarflokkurinn hefur ákveðið að slíta stjórnarsamstarfi og án stjórnarþátttöku hans hefur Kaczynski forsætisráðherra ekki meirihluta á þinginu. Hann getur ekki hugsað sér að starfa í minnihlutastjórn.

Segja ummæli Morgunblaðsins særandi

Stjórn Skipstjóra- og stýrimannafélagsins Verðanda hvetur Morgunblaðið til að láta af stanslausum árásum á sjómenn og útgerðarmenn. Í ályktun frá þeim segir að þau ummæli Morgunblaðsins að sjómenn séu að ræna íslenska þjóð séu bæði særandi og meiðandi.

Vill meira umferðareftirlit úr þyrlu

Lögregluflug í þyrlu á að vera fastur liður í íslenskri löggæslu að mati Júlíusar Einarssonar, fyrrverandi lögreglumanns og áhugamanns um löggæslu. Jóhann starfaði um borð í löggæsluþyrlunni TF-GRÓ á árunum 1993-1994 og segir það hafa borið mikinn árangur.

Fjórar til átta líkamsárásir tilkynntar á nóttu

Á aðfararnótt sunnudags var tilkynnt um sex árásir til lögreglu í miðborg Reykjavíkur. Ein árásin var með þeim hætti að ráðist var á mann á Vegamótastíg rétt fyrir klukkan fimm og hann kýldur þrisvar í andlit. Fórnarlambið tengdist árásarmanninum ekkert og gat ekki gefið neina lýsingu á honum.

Stórslysi forðað

Rafmagn komst aftur á í álveri Alcoa Fjarðaráls í Reyðarfirði um klukkan sjö í kvöld og er framleiðsla að færast í átt að eðlilegu horfi. Rafmagnslaust hafði verið í tvær klukkustundir.