Útboð vegna þriðju kynslóð farsíma

Póst- og fjarskiptastofnun býður innan skamms út tíðnisvið fyrir þriðju kynslóð farsíma. Gert er ráð fyrir að heimildirnar verði gefnar út í apríl á næsta ári en þær gilda í fimmtán ár.

Berlingske Officin segir upp 350 manns

Útgáfufyrirtækið Berlingske Officin hyggst segja upp 350 starfmönnum á næstu tveimur árum en það jafngildir áttunda hverjum starfsmanna. Þetta er gert vegna fjárhagsvanda félagsins.

Frjálslyndir funda klukkan hálf sex

Miðstjórnarfundur Frjálslynda flokksins verður haldinn á Kaffi Reykjavík klukkan hálf sex í dag. Á fundinum verður fjallað um deilur sem staðið hafa meðal leiðtoga leiðtoga flokksins og um stöðu Margrétar Sverrisdóttur framkvæmdastjóra flokksins.

Afhentu barnaskóla í Malaví

Yfirvöld í Malaví fengu á dögunum afhentan formlega Malembo barnaskólann frá fulltrúum Þróunarsamvinnustofnunar Íslands. Um fimm mánuði tók að byggja skólann en í honum eru tíu skólastofur. Malembo er fiskimannaþorp í suðurhluta Malaví en þar sinnir Þróunarsamvinnustofnun margvíslegum verkefnum með heimamönnum.

Fann kannabisplöntur við húsleit á Súðavík

Lögreglan á Ísafirði lagði hald á sjö kannabisplöntur í húsleit á Súðavík í gærkvöld. Sú stærsta reyndist vera um 60 sentímetrar. Fram kemur í tilkynningu frá lögreglu að einn heimilismanna hafi viðurkennt að eiga plönturnar og hafa ætlað afrakstur ræktunarinnar til sölu.

Mikill áhugi á lýtalækninganámi í Danmörku

Umsóknum læknanema um framhaldsnám í lýtalækningum hefur fjölgað mikið í Danmörku undanfarin ár sem meðal annars má rekja til góðra atvinnuhorfa. Frá þessu greinir Nyhedsavisen.

Dorrit Moussaieff valin kona ársins

Dorri Moussaieff forsetafrú er kona ársins 2006 samkvæmt útnefndingu tímaritsins Nýs lífs. Þetta verður tilkynnt á samkomu í Iðusölum í Lækjargötu klukkan 19 í kvöld.

Eignir lífeyrissjóðanna nálgast 1500 milljarða

Eignir lífeyrissjóðanna námu 1.425 milljörðum króna í lok október og jukust um tæpa níu miljarða í mánuðinum. Frá þessu er greint í Morgunkorni Glitnis og vísað í tölur Seðlabankans.

Góðar löggur

Níu af hverjum tíu kvörtunum um framferði breskra lögregluþjóna, sem bornar voru fram á síðasta ári voru tilefnislausar, að mati sjálfstæðrar rannsóknarnefndar sem fær slíkar kvartanir til meðferðar. Kvörtunum fjölgar þó sífellt, og eru lögregluþjónum þyrnir í augum.

Samkynhneigðir unnu sigur á færeyska lögþinginu

Færeyska lögþingið hefur samþykkt, með 17 atkvæðum gegn 13, að samkynhneigðir skuli njóta lagaverndar gegn háði og ofsóknum. Samskonar frumvarp var fellt með yfirgnæfandi meirihluta á síðasta ári.

Stefnir í netjól á Íslandi

Það stefnir í netjól á Íslandi. Landsmenn kaupa jólagjafir sem aldrei fyrr í gegnum Netið, en ekki er víst að allir geri sér grein fyrir flutningskostnaði og gjöldum þegar pantað er.

Gagnrýnir fjölgun í öryggissveitum

Ismail Haniyeh, forsætisráðherra Palestínumanna, gagnrýndi í dag Mahmoud Abbas, forseta, fyrir að fjölga í liði öryggissveita á Gaza ströndinni. Hann sagði að rétta leiðin til þess að koma í veg fyrir ofbeldi væri að virða sigur Hamas í þingkosningunum, sem skiluðu þeim til valda.

Aðeins sex vinnuslys við álverið á Reyðarfirði

Aðeins sex skráningarskyld vinnuslys hafa orðið við byggingu álversins í Reyðarfirði frá upphafi samanborið við rúmlega þúsund vinnuslys við Kárahnjúkavirkjun. Árangurinn í Reyðarfirði er einsdæmi við mannvirkjagerð hér á landi.

Stefnir í stríð í Sómalíu

Allt stefnir í alvarleg stríðsátök í Sómalíu eftir að íslamskir skæruliðar umkringdu borgina Baidoa í suð-vestur Sómalíu í morgun. Þar hefur bráðabirgðastjórn landsins hreiðrað um sig. Stjórnvöld í Eþíópíu viðurkenna að þau hafa flutt hergögn til stjórnvalda síðustu daga auk þess sem liðsmenn í eþíópíska hernum eru sagðir bíða átekta, tilbúnir til átaka ef látið verði sverfa til stáls.

Tveir bankar spá óbreyttum stýrivöxtum

Greiningardeildir Landsbankans og Glitnis spá því báðar að Seðlabankinn ákveði að halda stýrivöxtum óbreyttum í 14 prósentum á næsta vaxtaákvörðunarfundi bankans í næstu viku, 21. desember næstkomandi. Þetta er þvert á fyrri spár bankanna sem gerðu ráð fyrir 25-50 punkta hækkun.

Leitar logandi ljósi að raðmorðingja

Breska lögreglan leitar nú logandi ljósi að raðmorðingja sem hefur myrt fimm vændiskonur nærri Ipswich á Englandi. Óttast er að ódæðismaðurinn fremji annað morð áður en lögregla hefur hendur í hári hans.

Ekkert lát á ofsaakstri ungra pilta

Sautján ára unglingur var sviptur ökuréttindum á staðnum eftir að lögreglan mældi hann á liðlega hundrað og fjörutíu kílómetra hraða á Gullinbrú í Grafarvogi í nótt. Fimm 17 ára piltar hafa verið stöðvaðir vegna ofsaaksturs á nokkrum dögum.

Afhentu ráðherrum Piparköku-Ísland

Samtökin Framtíðaralandið stóð fyrir táknrænum gjörningi í morgun þegar þau afhentu bæði umhverfisráðherra og iðnaðarráðherra piparköku í líki Íslands. Piparkökurnar verða til sölu nú fyrir jólin en með þeim vilja samtökin benda á að Ísland sé land stórkostlegra möguleika.

Kópavogsbær kynnir skipulagshugmyndir á Kársnesi

Kópavogsbær kynnir fyrir íbúum í kvöld nýjar hugmyndir um skipulag vestast á Kársnesi á svokölluðu endurbótasvæði. Nokkur styr hefur staðið um breytingarnar en bæjaryfirvöld í Kópavogi segja að með hugmyndunum sé verið að byggja svæðið upp á nýtt eftir að það hafi verið í niðurníðslu.

Að minnsta kosti 17 fallnir í árásum í Írak í morgun

Að minnsta kosti sautján hafa fallið í tveimur bílsprengjuárásum í Írak í morgun. Tíu létust og 25 særðust þegar bílsprengja sprakk í úthverfi sjía í Bagdad-borg í morgun nærri stað þar sem verkamenn koma saman og leita vinnu.

Tekjur 10 þúsund hjóna lækkuðu milli áranna 2004 og 2005

Tekjur um 10 þúsund hjóna, eða fjórðungs þeirra hjóna sem greiddu einhverja vexti vegna íbúðkaupa, lækkuðu milli áranna 2004 og 2005 samkvæmt útreikingum Fjármálaráðuneytisins.

Hafa áhyggjur af næturgestum í sundlauginni

Nokkuð hefur borið á því að óboðnir gestir hafi fengið sér sundsprett í sundlauginni á Neskaupstað, í skjóli nætur, þegar sundlaugin hefur verið lokuð. Íþrótta- og tómstundaráð Fjarðabyggðar hefur af þessu nokkrar áhyggjur þar sem sundfólkið er algjörlega eftirlitslaust á þessum tíma og enginn til að fylgjast með ef slys verða.

Lofar Bandaríkjamönnum persónuvernd á ný

Verðandi formaður laganefndar bandaríska þingsins lofaði í dag að berjast gegn því sem hann kallaði tilhneigingu Georges Bush til þess að fótum troða réttindi bandarískra þegna, í nafni baráttunnar gegn hryðjuverkum.

Dómsuppsaga í málum gegn olíufélögunum

Dómar verða kveðnir upp í málum Reykjavíkurborgar og Strætó bs. á hendur stóru olíufélögunum klukkan þrjú í dag.

Morðingi Hariris var ekki líbanskur

Rannsóknarlögreglumenn á vegum Sameinuðu þjóðanna telja sig hafa dregið upp nokkuð grófa mynd af sjálfsmorðssprengjumanni sem myrti Rafik Hariri í gífurlegri sprengingu, út frá einni tönn og 33 ofurlitlum, skaðbrunnum húðflipum. Rannsóknarnefndin segir hann hafa verið á þrítugsaldri og að hann hafi ekki verið líbanskur.

Ekki hægt að eiga kökuna og éta hana líka

Samtökin Framtíðarlandið hafa bakað piparkökur í líki hins vogskorna Íslands til að punta upp á íslensk heimili fyrir jólin. Samtökin vekja með þessu athygli á því að framtíð Íslands er í okkar höndum og benda á að þeir sem eru gráðugir og vilja éta kökuna strax, þeir geta ekki um leið átt hana og notið hennar sem augnayndis yfir jólin.

Ísraelar virða enn vopnahléð á Gaza

Ehud Olmert, forsætisráðherra Ísraels, sagði í kvöld að Ísraelar hefðu ekki í hyggju að svara fyrir sig þó að Palestínumenn hafi skotið um 20 eldflaugum frá Gaza eftir að vopnahlé komst á þar þann 26. nóvember. Vopnaðir hópar á Gaza segja nýlegar árásir Ísraelshers gegn skæruliðum á Vesturbakka Jórdanar brot á vopnahlénu, þó það sé einungis í gildi á Gaza.

Fuglesang á geimgöngu

Fyrsti Svíinn sem hefur komið út í geiminn er nú á leið í spásértúr í geimgalla á 28 þúsund kílómetra hraða á sporbaug um jörðu. Christer Fuglesang, fer í kvöld við annan mann út fyrir geimstöðina, til að halda áfram að byggja hana, sem er megintilgangur ferðar geimskutlunnar Discovery.

Aðgerðir lögreglu ekki dánarorsök

Flest bendir til þess að maður sem lést eftir að hafa fengið hjartastopp í lögreglubíl, hafi látist vegna áhrifa eiturlyfja, en aðgerðir lögreglumanna hafi ekki átt þar neinn hlut að máli. Þetta kom fram í tíu-fréttum fréttastofu sjónvarps. Endanleg niðurstaða mun líta dagsins ljós eftir um það bil þrjár vikur.

Annan gagnrýnir allsherjarþingið

Kofi Annan, framkvæmdastjóri Sameinuðu þjóðanna, gagnrýndi meðlimi allsherjarþings S.þ. í kvöld fyrir að bregðast ekki við vaxandi ofbeldi í átökum Ísraela og Palestínumanna. Hann flutti sitt síðasta ávarp um Miðausturlönd fyrir öryggisráðið í kvöld, þar sem hann lætur af störfum sem framkvæmdastjóri um áramótin.

Öflugur jarðskjálfti á miklu dýpi nærri Indónesíu

Öflugur neðansjávarjarðskjálfti hreyfði við norðausturhluta Indónesíu í kvöld en engin hætta er á flóðbylgju vegna þess hve djúpur sjórinn er þar sem skjálftinn á upptök sín. Skjálftinn mældist 6,5 á Richter-kvarðanum og átti upptök sín um 252 kílómetra norðaustur af eyjunni Sulawesi, á 237 kílómetra dýpi undir yfirborði sjávar og jarðskorpunnar.

Þrýstihópur um Lónsheiðargöng innan Samstöðu

Baráttuhópur um göng undir Lónsheiði í stað núverandi vegstæðis um Hvalnes- og Þvottárskriður hefur verið stofnaður undir verndarvæng regnhlífarsamtakanna Samstöðu, að sögn fréttavefjarins horn.is. Samtökin sameina marga þrýstihópa sem berjast fyrir bættu umferðaröryggi á landinu. Þau voru upphaflega stofnuð til að berjast fyrir tvöföldun Reykjanesbrautar.

Rabbíinn vildi ljósastiku í jólaskreytingarnar

Flugvallaryfirvöld í Seattle í Bandaríkjunum tóku niður 14 jólatré eftir að rabbíi í borginni fór fram á risastórri sjö arma ljósastiku yrði bætt við jólaskreytingarnar. Trén voru sett upp aftur í gær eftir að rabbíinn fullvissaði flugvallarstjórnina um að hann myndi ekki þröngva gyðinglegum áhrifum inn í jólaljósin með dómsúrskurði.

Íbúum kynnt nýtt og umdeilt skipulag Kársness

Íbúum Kársness í Kópavogi verður kynnt nýtt rammaskipulag á íbúafundi á morgun, þar sem gert er ráð fyrir endurnýjaðri höfn á tæplega 5 hektara landfyllingu og þéttskipaðri fjölbýlishúsabyggð vestast á nesinu. Íbúar á Kársnesinu eru margir uggandi yfir því að hverfið muni þróast frá þeirri lágreistu og kyrrlátu íbúðabyggð sem það hefur verið.

Kona flutt á slysadeild eftir veltu á Eyrarbakkavegi

Kona var flutt á slysadeild í Reykjavík eftir að fólksbíll hennar valt nokkra hringi á Eyrarbakkavegi rétt upp úr sex í kvöld. Lögregla beitti klippum til að ná konunni út úr bílnum en hún var ein í bílnum. Hún stefndi í átt að Selfossi og var stödd um það bil miðja leið milli Eyrarbakka og Stekka. Lögreglan á Selfossi segir flughált á veginum.

Jón H.B. afneitar ótrúverðugleika

Jón H.B. Snorrason, yfirmaður efnahagsbrotadeildar, telur af og frá að yfirmenn embættis Ríkislögreglustjóra hafi gert sig ótrúverðuga með yfirlýsingum um sakborninga í Baugsmálinu.

Forseti Chile fylgdi Pinochet ekki til grafar

Augusto Pinochet, fyrrverandi einræðisherra Chile, var borinn til grafar í höfuðborginni, Santiago, í dag. Hann lést á sunnudaginn, 91 árs að aldri.

220 milljónir í skólamáltíðir í Afríku

Íslenska ríkið ætlar að leggja fram 220 milljónir króna næstu tvö árin til kaupa á skólamáltíðum fyrir grunnskólabörn í Úganda og Malaví. Það verður hluti af átaki Matvælaáætlunar Sameinuðu þjóðanna sem gengur undir nafninu "Málsverður á menntavegi".

Tónskáldasjóður stofnsettur

Tónskáldasjóður 365 var stofnsettur í dag á degi íslenskrar tónlistar. Markmið sjóðsins er að styrkja tónskáld og textahöfunda til nýsköpunar á sviði tónlistar. Styrkir úr sjóðnum munu nema allt að 6 milljónum króna á ári. Að sjóðnum standa Samband tónskálda og eigenda flutningsréttar (STEF) og 365 miðlar ehf.

Landbúnaðarvörur hækka minna en vísitala neysluverðs

Landbúnaðarvörur hafa lítið eða ekkert hækkað í verði frá bændum í ár, meðan vísitala neysluverðs hefur hækkað um 7% frá því í janúar. Bændasamtökin segja mjólkurvörur ekkert hafa hækkað í heildsölu á þessu ári og ávextir og grænmeti hafi hækkað minna en vísitala neysluverðs. Þessar vörur hafi því í raun lækkað í verði.

Vestfirðingar buðu lægst í Djúpveg

KNH á Ísafirði og Vestfirskir verktakar buðu lægst í gerð Djúpvegar um Mjóafjörð, Vatnsfjörð og Reykjanes en tilboð voru opnuð í dag. Þetta er stærsta vegagerð í fjórðungnum frá því Vestfjarðagöngum lauk og felst meðal annars í gerð svipmikillar stálbogabrúar yfir Mjóafjörð. Þegaar verkinu lýkur eftir 2 ár verður komið bundið slitlag milli Ísafjarðar og Hólmavíkur.

Vilja vita hvaða lögreglumenn áttu í hlut

Lögreglan reynir að hindra að upplýsingar um lögreglumenn, sem handtóku mann, sem lést í vörslu þeirra, komist til ofbeldismanna sem hafa hótað lífláti.

Orð Olmerts sögð rangtúlkuð

Ísraelskt stjórnmálalíf er á öðrum endanum eftir að Ehud Olmert, forsætisráðherra landsins, nefndi Ísrael í hópi kjarnorkuvelda í sjónvarpsviðtali sem birt var í gær. Stjórnarliðar segja orð hans rangtúlkuð en stjórnarandstæðingar segja forsætisráðherrann hins vegar vanhæfan í varnarmálum og vilja að hann víki.

Nauðgaði fjórtán ára stúlku

Rúmlega tvítugur karlmaður, Edward Apeadu Koranteng, var í dag dæmdur í Héraðsdómi Reykjavíkur í þriggja ára fangelsi fyrir að nauðga fjórtán ára stúlku. Nauðgunin átti sér stað á síðasta ári en fyrir hálfum mánuði var maðurinn kærður fyrir að nauðga þrettán ára stúlku.

Mikil aukning ríkisútgjalda

Umsvif ríkisins hafa á síðasta áratug aukist að jafnaði um eina milljón króna að raungildi á hverri einustu klukkustund sólarhringsins. Á næsta ári verður gefið enn meira í, en nýsamþykkt fjárlög gera ráð fyrir 52 milljarða króna útgjaldaaukningu frá síðustu fjárlögum.