Mikil aukning ríkisútgjalda

Ríkið ætlar að eyða meira en milljarði króna á dag af sameiginlegum fjármunum, samkvæmt fjárlögum sem Alþingi samþykkti hér í síðustu viku. Þau gera ráð fyrir að heildarútgjöld ríkissjóðs á næsta ári verði 367 milljarðar króna. Í fyrra voru fjárlögin upp á 315 milljarða, aukning ríkisútgjaldanna milli ára nemur 52 milljörðum króna. Svo hratt þenjast ríkisútgjöldin út milli ára að eyðsluaukningin nemur einum milljarði króna í hverri viku ársins. Og þegar þróun ríkisútgjalda síðasta áratug er skoðuð sést að það hefur verið stanslaus aukning. Fyrir tíu árum námu heildarútgjöld ríksins 160 milljörðum króna. Árið 2000 voru þau komin yfir tvöhundruð milljarða, útgjöldin fóru yfir 300 milljarða árið 2004, og ekkert lát hefur síðan verið á útgjaldaaukningunni. Þegar þróun ríkisútgjaldanna er borin saman við þróun vísitölu neysluverðs sést að útgjöldin hafa hækkað langt umfram almenna hækkun verðlags. Raunhækkun ríkisútgjalda á þessum áratug, umfram verðlagsþróun, nemur um 120 milljörðum króna. Svokölluð verðvísitala samneyslu, sem innifelur meðal annars launahækkanir ríkisstarfsmanna, er mikið notuð við framreikning ríkisfjármála, og miðað við hana er raunaukning ríkisútgjalda heldur minni, eða milli 70 og 80 milljarðar á þessum áratug. Ef við lítum svo á að launahækkanir ríkisstarfsmanna umfram almenna verðlagsþróun teljist ekki aukning ríkisumsvifa, þá fæst út sú niðurstaða að ríkisbáknið hafi allan síðasta áratug stækkað um sem nemur verkefnum upp á 150 milljónir króna í hverri viku. Útþenslan nemur nærri einni milljón króna á hverri einustu klukkustund sólarhringsins.