Setti svefnlyf í bananatertu

Tæplega fertug kona í Óðinsvéum hefur verið handtekin fyrir tilraun til manndráps en hún stakk sextán ára son sinn með hníf í brjóstið. Konan hefur ítrekað reynt að myrða son sinn, meðal annars hefur hún sett svefnlyf í banana­tertu og pottrétt.

Þurfa að skríða til Reykjavíkur

"Ef flugvöllurinn fer og þá allur aðflugsbúnaður með er væntanlega ekkert annað að gera en að fljúga aðflugið til Keflavíkur og skríða svo til Reykjavíkur í sjónflugi," segir Jón K. Björnsson, flugrekstrarstjóri hjá Þyrlu­þjónustunni í Reykjavík.

Enn óljóst hvað olli brunanum á Ísafirði

Ekki liggur enn fyrir hvað olli eldsvoða í íbúðarhúsi við Aðalstræti á Ísafirði í fyradag, þar sem einn íbúi hússins fórst. Lögreglumenn frá Ísafirði ásamt tæknimönnum frá lögreglunni í Reykjavík unnu að rannsókn málsins fram á kvöld í gærkvöldi, en niðurstaða liggur ekki fyrir.

Rúmensk stjórnvöld hafa ekkert að fela

Forseti Rúmeníu, Traian Basescu, segir engin fangelsi á vegum bandarísku leyniþjónustunnar, CIA, hafa verið í landinu. Sagði forsetinn að hann myndi leyfa utanaðkomandi rannsókn til að sanna að þarlens stjórnvöld hefðu ekkert að fela.

Fengu lægri laun en lofað var

Gera ekki samninga í Eystrasaltsríkjum

Rúmlega tíu prósent af starfsfólki íslenskra fyrirtækja í Eystrasaltslöndunum eru í stéttarfélögum og þá helst starfsmenn matvælafyrirtækja. Kjarasamningar eru fátíðir. Forystumenn þriggja landssambanda hittast í dag til að ákveða aðgerðir.

Tillögu Breta illa tekið

Það hitnaði í kolunum í fjárlagadeilu Evrópusambandsins er breska stjórnin, sem fer nú með formennskuna í sambandinu, lagði fram tillögu sína að fjárhagsáætlun þess fyrir tímabilið 2007-2013. Samkvæmt tillögunni á að skera útgjöld úr sameiginlegum sjóðum sambandsins niður um 24 milljarða evra, andvirði um 1.800 milljarða króna.

Ekki konungleg hátign

Nýfæddur sonur norska krónprinsins Hákons og Mette-Marit prinsessu hefur fengið nafnið Sverre Magnus eða Sverrir Magnús upp á íslensku. Hann fær hins vegar ekki titilinn hans konunglega hátign, að því er greint var frá í norskum fjölmiðlum.

Á annað hundrað létust

Í það minnsta 128 manns biðu í gær bana í flugslysi í Teheran í Íran. Talið er að vélarbilun hafi valdið því að herflugvél rakst utan í fjölbýlishús og hrapaði til jarðar. Mikið öngþveiti skapaðist á slysstaðnum.

Þurfa að borga tæpa milljón

Skipstjóri á Suðurnesjum og starfsmaður útvegsfyrirtækis hafa verið dæmdir til að greiða 400.000 krónur hvor um sig fyrir fiskveiðibrot. Skipstjórinn lét hjá líða að færa í afla­dag­bók afla úr veiði­ferð sem far­in var í byrj­un maí frá Grinda­­vík og pass­aði ekki upp á að 431 kíló af löngu yrði vikt­að með öðr­um afla á hafnarvigt.

185 milljónum veitt í erfðafræðirannsóknir og örtækni

Hundrað áttatíu og fimm milljónum var veitt til erfðafræðirannsókna og örtækni í dag. Þau verkefni sem fengu styrk snúa meðal annars að stofnfrumrannsóknum, arfgengu heilablóðfalli, sem er séríslenskur sjúkdómur, og lyfjagjöf í bakhluta auga.

Ástæða til að kanna fákeppni á matvælamarkaði

Forstjóri Samkeppniseftirlitsins telur ástæðu til að kanna hvort ráðandi staða eins aðila á matvælamarkaði sé misnotuð í ljósi þess að þar ríki fákeppni. Eigandi Fjarðarkaups segir styrk Baugs yfirþyrmandi, svo mjög að smáu fyrirtækin séu undir hælnum á heildsölum sem aftur eru undir hælnum á Baugi.

Rottugangur við leikskóla á Seltjarnarnesi

Rottugangur er við leikskólann Mánabrekku á Seltjarnarnesi og vinna meindýraeyðar og starfsmenn bæjarins að úrbótum. Rotturnar virðast hafa sótt í sandkassa við leikskólann sem nú hafa verið fjarlægðir.

Sagði dómurunum að fara til fjandans

Gríðarlegur viðbúnaður er vegna réttarhalda yfir Saddam Hussein, fyrrverandi forseta Íraks. Réttahöldin héldu áfram í dag en í gær strunsuðu lögfræðingar hans út úr réttarsalnum eftir að hafa verið meinað að tjá sig um réttmæti réttarhaldanna.

Mannskæður dagur í Írak

Að minnsta kosti fjörutíu manns féllu í sjálfsmorðsárás í Írak í dag. Sjálfsmorðsárásum virðist ekki ætla að linna í landinu en samtökin al-Qaida hafa sagt að þannig verði það, uns Bandaríkjamenn séu á bak og burt og samtökin hafi náð völdum í landinu.

Menntamálaráðherra harðlega gagnrýndur

Þriðja umræða um fjárlögin fór fram á Alþingi í dag. Fjárlagafrumvarpið hefur ekki tekið breytingum frá annarri umræðu en minnihlutinn hefur þó lagt til fjölmargar breytingatillögur. Menntamálaráðherra var harðlega gagnrýndur við upphaf þingfundar í dag fyrir að hafa tjáð sig í fjölmiðlum um nýtt frumvarp um Ríkisútvarpið, áður en því var dreift í þinginu.

130 látnir eftir flugslysið í Íran

Að minnsta kosti eitt hundrað og þrjátíu manns fórust í flugslysinu í Íran í dag þegar herflugvél skall á íbúðabyggingu í Teheran, höfuðborg landsins. Óttast er að tala látinna eigi eftir að hækka enn frekar en fjölmargir eru slasaðir.

Aðstandendur samkynhneigðra skora á Alþingi

FAS, Samtök foreldra og aðstandenda samkynhneigðra, afhentu forseta Alþingis áskorun í dag þar sem skorað er á þingið að breyta hjúskaparlögum nr. 31/1993 á þann veg að þau þjóni bæði gagnkynhneigðu og samkynhneigðu fólki.

Rafmagnslaust í hluta Garðabæjar

Rafmagnslaust er í hluta Garðabæjar vegna háspennubilunar og eru Flatir og Móar nú myrkvuð, sem og verslunarmiðstöðin Garðatorg og íþróttamiðstöðin. Viðgerð stendur yfir, samkvæmt upplýsingum Orkuveitunnar.

Vatnsskortur í austurhluta Mosfellsbæjar

Aðalvatnslögn fyrir austurhluta Mosfellsbæjar fór í sundur fyrir skömmu vegna jarðvinnuframkvæmda. Íbúar á svæðinu gætu því orðið vatnslausir eitthvað fram á kvöld en viðgerð stendur yfir. Vonast er til að vatnslögnin verði komin í samt lag síðar í kvöld.

Óska eftir stuðningi stjórnvalda

Samtök íslenskra líftæknifyrirtækja vilja að stjórnvöld leggist á árárnar með íslenskum hátækniiðnaði og sprotafyrirtækjum til að tryggja áhugaverð störf og arðbæran rekstur hér á landi. Þetta kemur fram í tilkynningu sem SÍL sendi frá sér í dag vegna uppsagnanna hjá Hjartavernd og líftæknifyrirtækinu Urður, Verðandi, Skuld á dögunum en fyrirtækin eru meðal stærstu félaga SÍL.

Varast ber að hagga við grundvallarþáttum ÖSE

Varast ber að hagga við grundvallarþáttum sem ÖSE, Öryggis- og samvinnustofnun Evrópu, byggist á og þá einkum sjálfstæði hennar á sviði mannréttindamála. Þetta sagði Geir H. Haarde utanríkisráðherra í ræðu sinni á fundi utanríkisráðherra aðildarríkja ÖSE í Ljubljana, höfuðborg Slóveníu, í dag.

Enn óljóst um eldsupptök á Ísafirði

Enn er óljóst hvað olli brunanum í tvíbýlishúsi á Ísafirði í gær þar sem karlmaður á sextugsaldri fórst. Tveir lögreglumenn frá Ríkislögreglustjóra komu til Ísafjarðar fyrir hádegi til að aðstoða lögregluna þar við að rannsaka eldsupptök. Að sögn varðstjóra á vakt er ómögulegt að segja til um hvenær rannsókn lýkur.

Cameron kjörinn leiðtogi Íhaldsflokksins í Bretlandi

David Cameron hefur verið kjörinn leiðtogi Íhaldsflokksins í Bretlandi. Hann hlaut meira en sextíu og fimm prósent greiddra atkvæða og meira en helmingi fleiri atkvæði en David Davis sem var í framboði gegn honum.

Tryggingamiðstöð fær vottun fyrir nýjan vef

Tryggingarmiðstöðin hlaut í dag vottun frá Sjá ehf. og Öryrkjabandalagi Íslands fyrir nýjan vef fyrirtækisins, fyrir að standast kröfur um aðgengi fyrir fatlaða. Vefurinn fær bæði vottun fyrir forgang 1 og 2 og er TM fyrsta einkafyrirtæki á Íslandi til að fá slíka vottun. Dæmi um breytingar sem orðið hafa á vef TM eru að nú geta blindir og sjónskertir notað talgerfla og sérhönnuð lyklaborð með síðunni eða stækkað letrið.

Fimm sprengjur í vegköntum nærri Madríd

Að minnsta kosti fimm sprengjur sprungu í vegköntum í nágrenni Madrídar á Spáni fyrir stundu. Ekki hafa borist fréttir af manntjóni en fyrstu fregnir herma að sprengingarnar hafi verið minniháttar.

Leikskólagjöld lækka um áramót

Leikskólagjöld fyrir áttastunda dag lækka um fimm þúsund krónur á mánuði í Reykjavík frá næstu áramótum og niðurgreiðsla á þjónustu dagforeldra verður aukin.

Þarf hugsanlega að loka deildum aftur í Kópavogi

Hugsanlegt er að loka þurfi deildum á ný í leikskólum Kópavogsbæjar eftir að ástandið hafði batnað allnokkuð frá því sem það var snemma í haust. Enn vantar í starfsfólk í nokkur stöðugildi og þá hafa nokkrir starfsmenn sagt upp frá og með áramótum.

Jacob Zuma ákærður fyrir nauðgun

Jacob Zuma, fyrrverandi varaforseti Suður-Afríku, hefur verið ákærður fyrir nauðgun. Zuma mætti fyrir rétt vegna málsins í dag en ekki var greint frá ákærunni fyrr en þá.

Að minnsta kosti 94 látnir eftir flugslys

Talsmaður lögreglunnar í Teheran hefur staðfest að allir farþegarinar 94 sem voru í herflugvél sem brotlenti á tíu hæða íbúðablokk í borginni í morgun hafi látist. Engar fregnir hafa enn borist af því hvort einhver hafi látist í blokkinni þegar flugvélin lenti á henni, en yfirvöld segja um 250 manns hafa búið þar.

Hryðjuverkamenn hafi verið fluttir frá leynifangelsum

Ellefu hryðjuverkamenn úr samtökum al-Qaida voru fluttir í snarhasti úr leynifangelsum í Austur-Evrópu þegar fréttir af fangelsunum birtust í fjölmiðlum. Þetta hefur fréttastöðin ABC eftir núverandi og fyrrverandi starfsmönnum leyniþjónustunnar, sem fullyrða að fangelsin hafi enn verið starfrækt fyrir mánuði síðan.

Svifryksmengun 20 sinnum yfir heilsuverndarmörk í ár

Svifryksmengun hefur fimm sinnum farið yfir heilsuverndarmörk í Reykjavík upp á síðkastið, síðast á laugardaginn. Þar með hefur hún farið tuttugu sinnum yfir mörkin í ár og þar sem til stendur að lækka mörkin til muna getur þetta orðið viðvarandi ástand af og til.

Santander-flugvöllur rýmdur vegna sprengjuhótunar

Aðskilnaðarsamtökin ETA segjast hafa komið fyrir sprengju á alþjóðaflugvellinum í Santander á Spáni. Lögregla hefur rýmt flugvöllinn og sent sprengjusérfræðinga á svæðið.

Óttast að allir farþegar herflugvélar hafi farist

Óttast er að allir farþegar hafi farist þegar herflugvél með meira en níutíu farþega brotlenti á tíu hæða íbúðablokk í Teheran höfuðborg Írans rétt fyrir ellefu. Ekki liggur enn fyrir hvort mannfall hafi orðið meðal íbúa blokkarinnar.

Menntamálaráðherra efins um framhaldið

Þorgerður Katrín Gunnarsdóttir menntamálaráðherra, sagði á Alþingi í morgun, að samræmd próf í núverandi mynd, í framhaldsskólum heyri líklega sögunni til, hún var þó ekki reiðubúin að slá þau af fyrr en að höfðu samráði við fagaðila.

Ráðherra gerir alvarlegar athugasemdir við öryrkjaskýrslu

Heilbrigðisráðherra mun í dag gera alvarlegar athugasemdir við skýrslu Stefáns Ólafssonar prófessors um hag öryrkja á Íslandi í samanburði við hag öryrkja annars staðar á Norðurlöndum. Stefán hefur nú þegar gert lítið úr athugasemdum forsætisráðherra, sem sagði að niðurstöður Stefáns væru rangar í mörgum meginatriðum.

Héraðsdómshús landsins plástruð í dag

Plástrar verða settir á héraðsdómshús landsins í dag í því augnamiði að vekja athygli á vanheilsu réttarkerfisins eins og það er orðað. Að plástruninni standa þau samtök og þær stofnanir sem standa að 16 daga átaki gegn kynbundnu ofbeldi undir yfirskriftinni: Heilsa kvenna, heilsa mannskyns: stöðvum ofbeldið.

Ráðist á lögregluskóla í Írak í morgun

Minnst tuttugu og sjö manns létust í sjálfsmorðsárás í lögregluskóla í Írak í morgun. Tvær konur gengu inn í skólastofu í skólanum hlaðnar sprengiefni og sprengdu sig í loft upp. Meira en þrjatíu slösuðust í árásinni.

Barn lést í skjálftanum í A-Afríku

Barn lést og nokkrir eru slasaðir eftir jarðskjálftann sem reið yfir Austur-Afríku í gærdag. Skjálftinn mældist 6,8 á Richter og nokkur hús hrundu í Kongó. Í einu húsanna varð barn undir braki og lést. Það var lán í ólani að upptök skjálftans voru á dreifbýlu svæði og því urðu afleiðingarnar minni en óttast var í fyrstu.

Útskrifaður af gjörgæsludeild eftir bílslys

Maðurinn sem sem slasaðist alvarlega í hörðum árekstri jeppa og fólksbíls á mótum Akrafjallsvegar og Akranesvegar í fyrrakvöld, er enn á gjörgæsludeild en verður líklega útskrifaður þaðan síðar í dag og fluttur á almenna deild, að sögn vakthafandi læknis á gjörgæsludeild.

Herflugvél brotlenti í Teheran

Herflugvél með áttatíu farþega brotlenti í Tehran, höfuðborg Írans, nú rétt í þessu. Svo virðist sem flugvélin hafi flogið beint á byggingu, en frekari upplýsingar liggja ekki fyrir að svo stöddu.

Aukinn búðarþjófnaður um jólin

Búðarþjófnaður tvöfaldast í desembermánuði á ári hverju. Mikið af fólki eru þá í verslunum og nýta þjófarnir sér það, sem sumir hverjir eru mjög bíræfnir.

Fimmti hver Dani óttast hryðjuverk í háloftunum

Fimmti hver Dani óttast að verða fórnarlamb hryðjuverka í flugvélum eða flugstöðvum samkvæmt nýrri könnun sem Flugmálastjórn Danmerkur hefur gert. Þar kemur einnig fram að fjórði hver Dani flýgur sjaldan eða aldrei og það er fólk í þeim hópi sem segist óöruggast í flugi.

Langflestir búa enn í skýlum og búðum

Næstum ári eftir að flóðbylgjan skall á löndum við Indlandshaf búa enn langflestir þeirra sem misstu heimili sín í hamförunum í neyðarskýlum eða tjaldbúðum. Þetta er niðurstaða bandarískrar könnunar sem gerð var í Indlandi, á Srí Lanka og norðurhluta Súmötru í Indónesíu sem varð einna verst úti.

Enn á gjörgæsludeild eftir bruna

Annar drengjanna sem brenndust illa þegar þeir voru fikta við eldfiman vökva í Grafarvogi fyrir rúmum tveimur vikum er enn á gjörgæslu, að sögn vakthafandi læknis. Ástand drengsins er stöðugt en óljóst er hvenær hann verður fluttur á almenna deild þar sem félagi hans dvelur nú, en hann brenndist ekki eins illa.