Út­för Björg­vins Hall­dórs­sonar í beinni á Vísi og Sýn

Björgvin fæddist 16. apríl 1951 í Hafnarfirði og lést 9. apríl síðastliðinn. Hann skilur eftir sig djúp spor í íslenskri menningarsögu, átti glæstan sólóferil og söng með hljómsveitum á borð við Ævintýri, Brimkló, Ðe lónlí blú bojs, HLH-flokknum og Sléttuúlfunum.

Mikið verður um tónlist í útförinni og munu margir listamenn koma þar fram, þar á meðal Karlakórinn Fóstbræður, Eyþór Ingi, Krummi, Svala, Daníel Ágúst, Mugison, Páll Rósinkranz, Ragnheiður Gröndal og Sigríður Thorlacius. 

Undirleik annast Óskar Einarsson og Guðmundur Pétursson, prestur er Guðni Már Harðarson og mun hann jarðsyngja Björgvin.

„Við fjölskyldan viljum fyrst og fremst þakka fyrir þann mikla hlýhug sem okkur hefur verið sýndur, og allar þær samúðarkveðjur og stuðningskveðjur sem okkur hafa borist frá fjöldanum öllum af fólki. Það er gott og styrkjandi á þessari sorgarstundu að finna til þess hvað pabbi okkar átti sess hjá mörgum Íslendingum og margir eiga minningar tengdar honum og hans tónlist,“ segir í tilkynningu frá fjölskyldu Björgvins.

Sýn bauð fjölskyldunni upp á að senda út frá útförinni til að sem flestir gætu tekið þátt í henni og verður hún sýnd í beinni á bæði Sýn og Vísi.