KR-ingar í Mela­búðinni um stöðu liðsins: „Verða að gyrða sig í brók“

KR hlaut þungan 6-1 skell gegn erkifjendunum í Val í Bestu deildinni í gærkvöldi. Staðan er nú sú að KR er það lið sem hefur skorað flest mörk í Bestu deildinni hingað til á tímabilinu en er á sama tíma það lið sem hefur fengið á sig flest mörk. Liðið er nú stigi frá fallsæti en það er ljóst að þjálfari liðsins, Óskar Hrafn Þorvaldsson, ætlar ekki að víkja frá hugmyndafræði sinni með liðið.

Við litum við í Melabúðinni í dag, degi eftir 6-1 tapið gegn Val, og tókum nokkra Vesturbæinga og stuðningsmenn KR tali. Af þeirra orðum að dæma ríkir enn trú gagnvart þeirri vegferð sem Óskar Hrafn er með liðið á.

„Ekki ég sem baulaði í gær“

„Auðvitað vantar stigasöfnun hjá liðinu en ég fulla trú á því sem að Óskar Hrafn og strákarnir eru að gera,“ segir Oddur Malmberg, mikill stuðningsmaður KR. 

„Þetta er bara spurning um einhvern smá tíma í viðbót. Ég held að við eigum bara eftir að fara upp töfluna. Mér lýst alveg rosalega vel á liðið, þetta er vel spilandi lið. Við töpuðum jú 6-1 fyrir Val en vorum 63% með boltann. Ég horfði á leikinn í gær og auðvitað þarf að þétta vörnina aðeins en ég hef fulla trú á þessu verkefni, held að þetta eigi bara eftir að skána hjá okkur.“

Heyra mátti baul beint að liði KR frá nokkrum stuðningsmönnum KR úr stúkunni á Hlíðarenda í gær en ekki var það Oddur sem baulaði.

„Óskar Hrafn er algjörlega okkar maður. Það var allavegana ekki ég sem baulaði í gær, ég myndi aldrei baula á strákana, aldrei.“

„Stórveldið á betra skilið og stuðningsmenn líka“

Gunnlaugur, starfandi leigubílstjóri og stuðningsmaður KR, var ekki alveg eins bjartsýnn gagnvart stöðu liðsins en hefur hins vegar enn trú á því að Óskar Hrafn sé maðurinn sem KR eigi að treysta á.

„Þetta er bara mjög slæmt. KR-ingar verða bara að gyrða sig í brók. Þetta stórveldi hér í Vesturbænum á betra skilið og við stuðningsmennirnir líka,“ sagði Gunnlaugur sem var síðan spurður út í upplegg KR liðsins sem spilar með miklum sóknarþunga. „Það eru öfgar í þessu, vörn og sókn. Ég skal ekki dæma um það en það er alltaf gaman að sjá sóknarbolta en það verður að þétta raðirnar.“

„Við skulum alveg gefa honum (Óskari Hrafni) séns áfram. Vonandi tekst honum bara, með sínu fólki, að rífa liðið upp. Það á það skilið, gamla stórveldið.“

Ef ætlunarverk Óskars takist verði það mjög merkilegt

Skafti Jónsson, einnig stuðningsmaður KR, segir leikinn í gær náttúrulega hafa verið sorglegan. Í fyrsta sinn í ár hafi leikmenn KR hengt haus.

„En ég held að KR sé á réttri leið. Ég hef tröllatrú á Óskari, hann er samkvæmur sjálfum sér og við verðum bara að standa þetta af okkur með honum og strákunum. Það sem hefur einkennt þetta KR lið í vor er að þeir hafa tapað leikjum sem þeir hafa verið miklu betri aðilinn í, hafa aldrei hengt haus fyrr en í gærkvöldi. Síðasta korterið var þannig að þeir höfðu áttað sig á því að leikurinn væri búinn. En það er í fyrsta skipti í sumar sem það gerist. Það er miklu fleira jákvætt hjá KR heldur en neikvætt, ég hef tröllatrú á því að staðan í töflunni breytist hratt.“

Aðspurður um leikstíl KR liðsins spurði Skafti undirritaðan á móti hvort þetta væri ekki það sem áhorfendur vildu?

„Helling af mörkum í leikjum. Ég vil bara að við skorum fleiri mörk heldur en andstæðingurinn. Það er miklu skemmtilegra að fara á leik sem fer 5-4 heldur en 1-0. Fótbolti á fyrst og fremst að vera skemmtun. Ég bara virði menn fyrir að reyna gera þetta að meiri skemmtun en hefur verið raunin og þarf mikið til því fótbolti er alltaf skemmtun í sjálfu sér.“

„Óskar Hrafn er minn maður. Hann er að reyna að gera hluti sem gæti talist sem ákveðin sköpun. Ég styð hann í því og ef þetta tekst hjá honum, sem ég hef fulla trú á, þá verður það mjög merkilegt.“