Senda fleiri eld­flaugar og fall­byssur til Úkraínu

Samkvæmt heimildum Reuters byggir pakki þessi á fjármunum sem varnarmálaráðuneyti Bandaríkjanna fékk endurgreitt vegna nýlegra hergagnakaupa, sem ganga út á að fylla vopnabúr á nýjan leik eftir fyrri hergagnasendingar til Úkraínu.

Óljóst er hvað verður í pakkanum, ef svo má að orði komast, en samkvæmt Reuters stendur til að opinbera hann seinna í dag. Blaðamenn Politico hafa þó heimildir fyrir því að Bandaríkjamenn ætli meðal annars að senda svokallaðar ATACMS-eldflaugar til Úkraínu. ATACMS stendur fyrir Army Tactical Missile System.

ATACMS drífa allt að þrjú hundruð kílómetra en hægt er að skjóta þeim með HIMARS-vopnakerfum sem Úkraínumenn hafa fengið frá Bandaríkjamönnum og Bretum. Úkraínumenn hafa fengið slíkar eldflaugar áður og hafa notað þær til að gera árásir á birgðastöðvar, stjórnstöðvar og jafnvel flugvelli sem Rússar nota.

Bandaríkjamenn eru ekki taldir eiga margar ATACMS en þær eru framleiddar af Lockheed Martin. Einungis fimm hundruð eru framleiddar á ári.

Danir senda stórskotalið

Ráðamenn í Danmörku tilkynntu einnig frekari hernaðaraðstoð til Úkraínu í dag, sem metinn er á um 337 milljónir dala. Í þeim pakka má finna CAESAR-stórskotaliðskerfi frá Frakklandi en það eru nokkurs konar vörubílar sem bera fallbyssur.

Kerfin eru hönnuð til að skjóta 155 mm sprengikúlum af töluverðri nákvæmni og á skömmum tíma. Þá er hægt að keyra þeim á brott áður en andstæðingurinn hefur tíma til að svara skothríðinni.

Danir eru einnig að senda 120 mm sprengivörpur og skotfæri fyrir bæði kerfin. Skotfærin á að senda til Úkraínu í samvinnu við Frakka, Eista og Tékka.

Vólódímír Selenskí, forseti Úkraínu, hefur sent Mette Frederiksen, forsætisráðherra Danmerkur, og dönsku þjóðinni þakkir fyrir aðstoðina. Hann segir þetta sextánda aðstoðarpakkann sem Danir senda til Úkraínu.

Stórskotalið skiptir sköpum í stríðinu í Úkraínu. Þar sem engin aðstoð hefur borist frá Bandaríkjunum um nokkuð skeið hafa ráðamenn í Evrópu reynt að fylla upp í skarðið.

Repúblikanar í fulltrúadeild Bandaríkjaþings hafa staðið í vegi hernaðaraðstoðar frá Bandaríkjunum og komu meðal annars í veg fyrir samþykkt frumvarps sem ætlað var að tryggja aðstoð fyrir Úkraínumenn og aðra og í senn grípa til aðgerða á landamærum Bandaríkjanna og Mexíkó.

Frumvarpið var afrakstur umfangsmikilla viðræðna milli Repúblikana og Demókrata en Repúblikanar sneru baki við frumvarpinu eftir að Donald Trump lýsti því yfir að hann vildi nota ástandið á landamærunum í kosningabaráttu sinni gegn Biden fyrir kosningarnar í nóvember.

Síðan þá hafa Úkraínumenn glímt við umfangsmikinn skort á skotfærum fyrir stórskotalið og fyrir loftvarnarkerfi þeirra, sem hefur komið niður á gengi þeirra á víglínunni í Úkraínu.