Segir kostnað við um­sóknir fimm­tán milljarða á ári

Þetta sagði Bjarni á Facebook í dag en ummæli hans í Silfrinu í Ríkissjónvarpinu í gær um málefni flóttafólks hafa vakið þónokkra athygli. Til að mynda sagði Andrés Ingi Jónsson, þingmaður Pírata, í umræðu um störf þingsins í dag, að Bjarni hefði með ummælum sínum í Silfrinu rofið sögulegt þagnarbindindi þegar hann veitti fyrsta fjölmiðlaviðtal ársins.

„Tilefnið var hneykslan ráðherrans á mótmælum sem eiga sér stað fyrir utan Alþingi þar sem fólk frá Palestínu er að kalla eftir viðbrögðum og aðgerðum ríkisstjórnarinnar. Í viðtalinu í Silfrinu hafnaði hann því að hann væri að slá nýjan tón í útlendingaandúð enda má það svo sem til sanns vegar færa, ríkisstjórn Katrínar Jakobsdóttur hefur stigið þau skref mörg á kjörtímabilinu,“ sagði Andrés Ingi.

Örfáum mínútum eftir að hann steig niður úr pontu Alþingis hafði Bjarni birt færslu á Facebook þar sem hann sór af sér hatursorðræðu og rasisma.

Allt að fimm þúsund umsóknir á ári

Bjarni segir að árin 2022 og 2023 hafi borist á milli 4.000 og 5.000 umsóknir um alþjóðlega vernd hér á landi, hvort ár um sig. 

„Þessar tölur kallast á við heildaríbúafjölda í Vestmannaeyjum, eða í Grindavík, en þess má vænta að fjöldinn verði ekki ósvipaður í ár.“

Kostnaður við að meðhöndla þessar beiðnir hafi verið um fimmtán milljarðar króna á ári. Um 2.800 umsækjendur séu í þjónustu á vegum Vinnumálastofnunar, og meðal annars hafi þurft að leigja hótel til að finna pláss fyrir fólk. 

Gert sé ráð fyrir að bæta þurfi við um 1.000 til 1.500 plássum í búsetuúrræðum á árinu. Fram hafi komið tillögur á þinginu um neyðarráðstafanir þess efnis að sveitarfélög geti breytt skipulagi, svo búa megi á svæðum sem ekki eru ætluð íbúum. Á sama tíma segi sveitarfélög, nú síðast Hafnarfjörður, að þeirra innviðir ráði ekki við frekari fjölgun.

Raunsæi en ekki hatursorðræða falið í umræðunni

Bjarni segir að vart þurfi að hafa fleiri orð en þetta um að öllu máli skipti að þjóðin þurfi að vera raunsæ um getu samfélagsins til að bregðast við vanda fólks á flótta. 

„Flest hljótum við að vilja aðstoða fólk í neyð, en það er líka algjört grundvallaratriði að geta tekið vel á móti því fólki. Lausnir okkar geta ekki byggst á að vera hér með mun rýmri og opnari reglur en aðrir. Linnulaus og vaxandi þrýstingur á innviði skapar hvorki góðar aðstæður fyrir þá sem hingað leita, né þá sem hér eru fyrir – sér í lagi þegar við tökumst á við risavaxnar áskoranir innanlands.“

Þá segir hann að í umræðu um málefni flóttafólks og umgjörð þeirra felist ekki hatursorðræða eða rasismi, heldur raunsæi.

„Umræðan dugar þó ekki ein og sér, heldur er nauðsynlegt að endurskoða gildandi reglur. Dómsmálaráðherra er með frumvörp tilbúin í þeim tilgangi. Mikilvægt er að þau fái framgang á Alþingi, sem því miður hefur allt of oft brugðist í þessum efnum.“